Kev txawj ntse tsim tawm thiab cov lus nug txog tib neeg.
Kev txawj ntse tsim tawm los yog AI tab tom nkag los nyob hauv neeg lub neej heev zuj zus. Nws muaj zog rau kev sib xa xov, kev ua hauj lwm, kev kawm thiab kev rov xav txog hauv kev ntseeg. Kev tsim kho mus sai ntawm AI, ua kom muaj tej lus nug uas lub Koom Txoos nyob twj ywm tsis tau. Hauv qhov no lub ntsiab lus kawg ntawm Vaj Qhia Leo Ib, hais txog Magnifica Humanitas tau xav txog kev ncaj ncees, xav txog tib neeg kev txawj ntse thiab teeb meem ntawm lub meej mom hauv kev ua neeg.
Tsab ntawv no hais txog qhov sib txawv meej tseeb ntawm tib neeg thiab kev txawj ntse tsim tawm los yog AI raws li hais nyob hauv nqe lus 99 tias ; kev txawj ntse tsim tawm ‘tsis tau hla tej kev paub, tsis muaj lub cev ntaj ntsug, tsis paub txog kev sov siab los yog kev mob siab. Tsis tau loj hlob hauv kev sib raug zoo thiab tsis paub sab hauv tias yog kev nyiam kev hlub. Kev ua hauj lwm, kev phooj kev ywg los yog kev lees txais yog hais txog dab tsi.’ Tab txawm tias nws muaj kev ntim xeem lus, kev pub laij thawj los yog kev sib pom dej siab tau, tsis kav nws tsis muaj kev yuav ua tib zoo xav, kev saib xyuas kev ncaj ncees los yog txoj sia sab hauv. Nws txoj kev ua raug tsim los hauv tus yam ntxwv ntim cov ntsiab lus, tsis yog los ntawm kev paub hauv lub neej los yog kev txiav txim hauv kev ncaj ncees.
Tej kev sib txawv no yog qhov lub Koom Txoos txhawj xeeb txog. Kev txawj ntse tsim tawm los yog AI tuaj yeem ua xws li neeg tau, tab sis nws tsis yog neeg xwb. Nws tsis txawj loj hlob nyob hauv kev nyuab siab, kev sib raug zoo thiab kev txiav txim siab ncaj ncees. Vaj Qhia tsab ntawv hais tias ; tej kev sib txawv no yog qhov ntsuas txog kev siv thiab kev txhim kho Technology uas tab tom tshwm sim.
Kev vam meej ntawm Technology thiaj tsis raug tsis lees paub thiab raug tso nyob hauv kev ncaj ncees. Kev txhawj xeeb tsis yog nyob ntawm kev txhim kho tshiab xwb, tab sis yog nyob hauv kev ua kom ntseeg tias lub meej mom hauv kev ua neeg, kev saib xyuas thiab fab ntsuj plig yog qhov tseem ceeb. Qhov kawg no Vaj Qhia tsab ntawv thov kom ua tib zoo xav nyob hauv txheej neeg uas muaj kev pauv ntxeev sai. Thov kom rov ua tib zoo xav txog lub ntsiab ntawm kev ua neeg nyob hauv lub ntiaj teb, uas raug teeb nyob hauv kev txawj ntse tsim tawm muaj ntau zuj zus. Thiab txhib kom muaj kev muab siab rau hauv kev paub txog kev ncaj ncees, kev ua tiag nyiaj thiab kev lees txais.
Kwv tij Hmoob sawv daws ! Hnub no peb tham txog kev txawj ntse tsim tawm los yog AI thiab neeg los xaus li no xwb. Zim txwv no AI thiab Technology vam meej sai heev. Li ntawd, thov kom peb sawv daws xyuam xim txog kev siv AI thiab Technology txheej tshiab. Yuav ceev faj txog kev ncaj ncees thiab qhov tsim nyog hauv kev siv.
Thov Tswv Ntuj pub txiaj ntsim rau nej nyob hauv kev nyiam kev hlub.
Lwm zaus peb mam sib ntsib dua, nyob zoo nej sawv daws !
