Nyab Laj ua cov kab ke tsa Leej Ntshiab thawj zaug nyob hauv lawv lub teb chaws. Txiv Plig Truong Buu Diep yog tus raug tsa ua Leej Ntshiab.

Tswv Qhia Tagle uas yog tus sawv Vas Tis Kas chaw tshaj lub Moo Zoo thiab tus sawv cev ntawm Vaj Qhia Leo 14 ua tus coj lub Txoos. Muaj Tswv Qhia Marek Zalewsk uas yog Vas Tis Kas tus tiam lis nyob Nyab Laj teb, muaj cov Tswv Qhia Liab thiab cov Tswv Qhia tuaj ntawm Nyab Laj teb, Thaib teb, Los Tsuas teb, Khas Phus Chas teb thiab 2,000 tus Txiv Plig koom ua lub thaj txi Ntuj.

Hauv lub thaj txi Ntuj Tswv Qhia Tagle tau tshaj Vaj Qhia Leo 14 tsab ntawv tsa Txiv Plig Truong Buu Diep ua Leej Ntshiab, nws yog tus tau txais txoj hmoov zoo. Yog tom qab uas Tswv Qhia Le Tan Loi nyob Can Tho cev ntawv thov tso tsa ua Leej Ntshiab raws txoj cai. Hauv cov lus nthuav ntawv Moo Zoo, Tswv Qhia Tagle hais tias : “Txiv Plig Truong Buu Diep tau txoj hmoov zoo. Nws tseem ncaj ncees rau Yes Xus Pleev hauv kev ua tub txib rau cov neeg ntseeg, rau cov neeg pluag txom nyem thiab cov teev lwm txoj kev ntseeg. Tab txawm nws raug hiam, tsis kav nws txhib kom cov neeg ntseeg ua pov thawj txog qhov tseeb hauv kev sib haum xeeb, thiab kev cia siab hauv lub ntiaj teb uas muaj kev phem thiab muaj kev sib tawg.”

Ua ntej yuav xaus lub thaj txi Ntuj, Tswv Qhia Tagle tau hais Vaj Qhia Leo 14 cov lus rau lub Koom Txoos nyob Nyab Laj teb. Thiab ua tsaug rau cov coj lub Koom Txoos, cov nom tswv thiab cov neeg ntseeg ntau caum txhiab leej uas tuaj koom lub thaj txi Ntuj loj zaum no. Hauv kev xaus lub thaj txi Ntuj, Tswv Qhia Le Tan Loi hais tias : “Kev tsa Leej Ntshiab tsis yog hais txog qhov xaus cov hauj lwm, tab sis yog kev pib ntawv Cog Lus Tshiab uas yuav xyaum tus qauv kev ntseeg, kev cia siab thiab kev ua Leej Ntshiab tub txib.”