Hauv kev ua tus coj lub Txoos qhib lub rooj sab laj, Tswv Qhia Kikuchi tau hais txog qhov nws mus ncig tsham ib lub zos nyob hauv lub nroog Ende nyob Is Ntos Nes Xias teb tsis ntev tag los. Nws tau pom cov neeg liaj neeg teb ua lub neej kaj siab lug, muaj meej mom thiab txawj sib pab, tab txawm peev txheej muaj tsawg kuj xij.
Nws hais tias : “Ntawm kuv, mas nov yog kev sib koom siab tseeb tiag. Tsis yog tias yog lub tswv yim xwb, tab sis yog kev ua lub neej mus kev ua ke, sib txhawb nqa thiab cog kev cia siab.” Tswv Qhia hais ntxiv tias : “Lub Koom Txoos cov hauj lwm tsis yog pib ntawm kev ua tej lub Koom Haum, tab sis yog pib ntawm tsoom pej xeem tej kev sib pab thiab ua hauj lwm rau cov neeg xav tau kev pab.”
Cov tuaj koom lub rooj sab laj muaj ze ntawm 200 leej, xam nrog cov Tswv Qhia Liab, cov Tswv Qhia, cov Txiv Plig thiab cov sawv cev neeg ntseeg. Tswv Qhia Kikuchi thov kom cov tuaj koom lub rooj sab laj ntseeg tias ; kev thov Ntuj, kev sib tham thiab kev rov xav txog yog qhov lub rooj sab laj yuav coj mus txhawb nqa cov tsev teev Ntuj nyob thoob As Xias. Nws hais tias : “Peb tsis muaj cuab kav ua ib zaug los hloov tau lub ntiaj teb, tab sis peb pib nyob hauv cov zej zog tej kev sib pab. Qhov ntawd yog kev cia siab loj hlob, thiab yog qhov lub Koom Txoos zeem tseeb txog kev sib luag ntawm Synodal.” Lub rooj sab laj yuav muaj mus tas ib lis piam hauv lub ntsiab lus tias : “Kev nqua hu kom muaj kev pauv ntxeev raws Synodal thiab cov hauj lwm ua tus choj thiab ua tus tuam choj nyob As Xias”, yuav muaj mus txog hnub tim 26 lub 7 hli no.
