Tus thawj tswj lub pwm tsav cov Tswv Qhia As Xias (FABC), hais kom cov tub tshaj Ntuj Lus Online nyob As Xias coj Yes Xus txoj kev nyiam kev hlub mus rau lub ntuj digital.”
“Thov siv qhov platform uas twb muaj lawm, tsis yog ua kom muaj neeg raws qab coob, nias tes coob los yog ntsia pom coob. Tab sis yog ua kom tau tshaj lub Moo Zoo, tau ua lwm tus tub txib thiab tuam choj hauv kev sib koom siab.” Tswv Qhia Ferrao hais cov lus no nyob hauv qhov xyam Video uas xa mus rau cov tub tshaj Ntuj Lus Online nyob As Xias teb thawj zaug, hauv hnub tim 11 lub 9 hlis no.
Tswv Qhia piav tias; digital yog qhov chaw tshaj Ntuj Lus thiab ua kom tib neeg tsim kev sib raug zoo, nrhiav lub ntsiab thiab teeb cov lus nug tob nyob hauv cov tub tshaj Ntuj Lus Online lub neej. Nws hais tias lawv raug hu los ua kom lub Koom Txoos tshwm sim nyob hauv tej chaw ntawd los ntawm lub tswv yim, lub peev xwm thiab ua tim khawv txog kev ua neeg ntseeg tseeb tiag. Nws hais txog kev pauv ntxeev hauv lub rooj sau siab tias ; ntawm cov muaj hwj chim mus txog kev ua pov thawj. Cov muaj hwj chim yuav ua kom neeg nyiam tau. Kev ua pov thawj ntawd yog ua qhov tob dua ntawd. Kev ua pov thawj ua kom pom txog Yes Xus ntau dua pom tus kheej. Ntawm Tswv Qhia Ferrao, mas kev ua pov thawj hauv lub ntuj digital tsis yog tias tso cov ntsiab lus hais txog kev ntseeg tawm xwb. Tab sis kuj yuav cia ntawv Moo Zoo nyob hauv cov neeg ntseeg tej kev mloog, kev hais lus, kev ua tawm thiab nyob ib sab ntawm cov neeg nyob Online thiab. Nws muab cov hauj lwm no los xyaw nrog kev ua hauj lwm ua ke, uas yog hais txog kev mloog, kev nyob ib sab thiab kev mus ua ke. Nws hais tias : “Kev ua hauj lwm ua ke hu kom peb mus ua ke, thiab txhib cov tub tshaj Ntuj Lus Online kom lawv mloog ua ntej yuav hais lus, xub nkag siab tso mam txiav txim, nyob ib sab ua ntej yuav qhia thiab sib koom tes ntau dua sib tw.” Tswv Qhia Ferrao txhawb kom cov tuaj sau siab ua kom qhov platform digital yog qhov chaw cov neeg mloog tau hnov, raug tos txais thiab qhuas. Tshwj xeeb tshaj yog cov tub ntxhais hluas, cov tab tom nrhiav qhov tseeb, cov tab tom ntsib teeb meem thiab cov uas pom tias lawv nyob nrug deb ntawm cov neeg ntseeg. Nws tseem thov kom muaj kev ua hauj lwm ua ke ntau dua qub nyob hauv cov tub tshaj Ntuj Lus Online nyob thoob As Xias teb, zoo dua kev nrhiav suab npe rau ntiag tug. Kev ua hauj lwm hauv digital phim yuav txhawb kom muaj kev sib koom tes, thiab pab lub Koom Txoos txhim kho kev sib koom siab hauv kev tshaj lub Moo Zoo hauv tus yam ntxwv tshiab. Hais txog Tswv Qhia Ferrao, mas lub hom phiaj tseeb tiag ntawm cov hauj lwm digital, tsis yog tsim kom muaj suab npe los yog muaj hwj chim. Tab sis yog kev ua pov thawj txog Yes Xus, uas taw mus deb dua cov tub tshaj Ntuj Lus tej hauj lwm, kom mus txog Leej Pleev thiab tsim kev sib koom siab nyob hauv ib tsoom neeg.
