Thaib cov tsev kawm ntawv Kav Tos Liv muab kev ntseeg thiab kab lis kev cai Thaib los ua sib xyaws nyob hauv hnub hwm cov xib hwb qhia ntawv

Cov tsev kawm ntawv Kav Tos Liv nyob thoob Thaib teb, tau npaj ua cov kab ke hwm cov xib hwb qhia ntawv hauv lub 6 hli no. Yog muab kev ntseeg thiab Thaib cov kab lis kev cai los ua sib xyaws, kom tau hwm cov xib hwb qhia ntawv nyob hauv txoj kev ntseeg uas tsoom pej xeem feeb coob yog teev hawm Phus Thas. Kab ke hwm cov xib hwb qhia ntawv muaj ua txhua txhua xyoo. Yog cov kab ke hwm thiab ua tsaug rau cov xib hwb pub kev txawj ntse. Cov tsev kawm ntawv tau muab Thaib cov kab lis kev cai thiab kev ntseeg los sib xyaws ua ke hwm cov xib hwb, kom pom txog kev muab siab rau ntawm lub Koom Txoos uas xav kho cov kab lis kev cai kom haum kev ntseeg thiab kev nkag siab hauv cov kev teev hawm. Kab ke hwm cov xib hwb qhia ntawv yog ua nyob hauv lub caij pib lub xyoo kawm ntawv. Yog Thaib cov kab ke uas ib txwm ua los ntev. Cov me nyuam kawm ntawv yuav hwm lawv tus xib hwb hauv kev pe nrog rau paj ntoos uas yog lub cim hauv kev txawj ntse, kev ua neeg me thiab kev muab siab rau. Hauv Kav Tos Liv cov tsev kawm ntawv, cov kab ke no tau muab hloov los ua kev teev Ntuj, kev hu nkauj, kev foom hmoov zoo thiab muab paj ntoos los tso rau ntawm tus mlom Yes Xus, tus mlom niam Mab Liab los yog tus Leej Ntshiab tuav pov hwm tus mlom xub ntiag. 

Lub pwm tsav tsev kawm ntawv Kav Tos Liv nyob Thaib teb, uas saib xyuas ntau pua lub tsev kawm thoob Thaib teb, txhawb nqa txoj kev cai no hauv cov kab ke sib xyaws. Yog kev txuag tej kab lis kev cai Thaib thiab hloov qee yam kom haum kev ntseeg Kav Tos Liv. Tus qauv no txhawb nqa kev sib haum xeeb nyob hauv cov tsev kawm ntawv uas muaj cov tub kawm teev Phus Thas thiab kev ntseeg ua ke.

Hauv lub tsev kawm ntawv hwm me nyuam Yes Xus nyob hauv lub xeev Singburi, mas cov kab ke no yog qhia txog kev sib koom tes ntawm cov kev teev hawm. Muaj Txiv Plig thiab cov hauj sam hauv lub zos tuaj sib koom ua ke. Thiab hauv lub tsev kawm ntawv hwm Leej Ntshiab Zam nyob Thabom hauv lub xeev Loei, mas cov qub tub kawm rov tuaj ua ke pe lawv cov xib hwb. Cov xib hwb qhia ntawv kuj hwm cov Leej Phauj hauv lub koom haum Mab Liab mus saum ntuj uas yog tus tswv ntawm lub tsev kawm ntawv.

Tus thawj xib hwb hais tias “Kev ua cov kab ke hwm xib hwb xyoo no, yog txhawb nqa kev sib hwm, kev sib mloog thiab fab ntsuj plig hauv zej zog. Thiab kuj yog tus piv txwv hauv kev sib tham, kev sib koom tes ntawm cov kev teev hawm thiab tej kab lis kev cai.”