Tus lwm thawj tswj cov Tswv Qhia As Xias los yog FABC hais tias : tej zaum lub Koom txoos As Xias yuav nyob ntsiag to tsis tau, ua ntej yuav txog lub rooj sab laj loj.

Hauv cov lus xa mus rau Radio Veritas Asia, mas FABC tus lwm thawj tswj thiab yog tus Tswv Qhia nyob Tokyo tau ua kom pom txog lub ntsiab lus hauv lub rooj sab laj.      

“Kev nqua hu kom muaj kev pauv ntxeev hauv lub pwm tsav thiab cov hauj lwm, kom ua tus choj thiab ua tus tuam choj nyob As Xias.” Uas hais tias lub Koom Txoos Kav Tos Liv As Xias feem coob yog cov haiv neeg tsawg. Yuav tsum mus ua ke nrog cov neeg muaj kab lis kev cai, muaj kev ntseeg thiab muaj kev cai sib txawv.

Tswv Qhia Kikuchi hais tias kev muaj feem cuam raws li Synod, tsis yog tsim kev sib raug zoo hauv lub Koom Txoos xwb, tab sis yog hais txog tsim kev sib tham nrog zej zog kom dav tuaj. Nws piav tias yog kev nqua hu kom muaj kev pauv ntxeev thiab muaj hauj lwm ua. Txhib kom lub Koom Txoos ua qhov tseeb nyob hauv zej zog, hauv kev tseev tsim, hauv kev lag luam thiab hauv tej kab lis kev cai sib txawv nyob As Xias.

Ua ke ntawd kuj yog lub Cim ntawm kev cia siab hauv cov neeg pluag txom nyem, hauv kev tsis sib haum xeeb thiab lwm yam kev txhawj xeeb. Nws hais txog tias kev sib luag yuav tsum yog ua tiag ntau dua kev ntsia pom tias yog lam xav los kev daws kho uas yog tib txog kev tawm xwb. Lub Koom Txoos tsim nyog txhawb nqa kom sawv daws ua tus tuam choj, ua hauj lwm ua ke txhawb nqa kev thaj yeeb, kev sib haum xeeb, kev sib txhawb nqa thiab txuag neeg lub meej mom.

FABC lub rooj sab laj ib lis piam, yuav sau tas cov Tswv Qhia nyob thoob As Xias teb tuaj nyob ua ke, kom tau tuav xam tias lub Koom Txoos yuav sib koom ua ib tug, muaj feem cuam thiab ua cov hauj lwm tau li cas ? Ua ke ntawd kuj yuav ua tawm txog qhov tseeb hauv kev tshaj lub Moo Zoo thiab hauv cov zej zog uas muaj ntau yam sib txawv nyob hauv xeev ntuj no.