Vaj Qhia Leo 14 thov kom cov neeg ntseeg ua tus tsim kev sib koom siab nyob hauv lub ntuj uas tab tom muaj kev sib tawg
Hnub tim 6-12 lub 6 hli no Vaj Qhia Les Os 14 mus tsham Xyis Pas Yas teb ua zaum ob. Muaj cov Tswv Qhia, cov Txiv Plig, cov Leej Phauj, cov neeg ntseeg thiab cov tub ntxhais hluas tuaj tos txais Vaj Qhia coob kawg nyob hauv lub tsev teev Ntuj hwm Ntoo Cuam Ntshiab thiab hwm Leej Ntshiab Aws Las Lias nyob Npas Xes Los Nias.
Vaj Qhia xav txog ob yam hauv lub Koom Txoos xws li tus nkauj nyab thiab Yes Xus lub Cev. Vaj Qhia hais tias lub Koom Txoos tshwm sim los ntawm Tswv Ntuj txoj kev nyiam kev hlub, thiab loj hlob nyob hauv cov neeg ntseeg kev ua neeg me, kev mloog lus thiab kev ua tub txib.
Vaj Qhia rov hais txog ntau yam paj tshab uas Tswv Ntuj pub thiab cov hauj lwm hauv lub Koom Txoos. Nws hais tias kev ua tub txib uas ntsia pom thiab qhov zais ntshis yog cov hauj lwm tseem ceeb ntawm lub Koom Txoos. Tab txawm muaj ntau yam sib txawv li no, tsis kav Vaj Qhia tseem hais ntxiv tias cov neeg ntseeg yuav sib koom ua ib tug nyob hauv tib tug Leej Ntuj Plig, thiab yuav tau txais lub zog kev sib koom tes ntawd nyob hauv tsov rog, kev sib tawg hauv zej zog thiab kev tsis sib haum xeeb uas muaj heev zuj zus hauv zej zog. Vaj Qhia thov kom cov neeg ntseeg ua tus tsim kev sib koom siab, kev lees txais, kev sib haum xeeb thiab kev thaj yeeb. Tab txawm tias kev ua li ntawd yog kev txi tus kheej thiab kev zam tus kheej kuj xij. Vaj Qhia thov kom cov Kav Tos Liv ua tus kho kev sib tawg thiab ua pov thawj txog lub Moo Zoo nyob hauv lub neej sib nyiam sib hlub thiab sib koom siab.
