Vaj Qhia Leo thov kom tso cov neeg raug ntes nyob Hais Tis, thiab muab kev pab cuam rau Nes Pas teb, tom qab raug dej nyab loj.
Vaj Qhia hais tias : “Kuv thov kom cia li tso cov neeg raug ntes tsis txhob cia ntev.” Thiab nws thov kom cov muaj feem cuam nrog saib xyuas tsoom pej xeem kev nyab xeeb thiab tso tseg kev ua phem txhua yam. Vaj Qhia tseem ua tawm kev pom dej siab txog cov neeg raug dej nyab nyob Nes Pas thiab Tis Npes thiab. Nws thov Ntuj pub rau cov neeg tuag, cov neeg raug mob, cov raug dej tshoob ploj lawm thiab lawv cov tsev neeg nrog rau cov tub nrhiav neeg tuag. Vaj Qhia kuj thov kom txhua lub teb chaws ntsia pom thiab muab kev pab cuam rau cov neeg tau txais kev kub ntxhov. Vaj Qhia tau pab nyiaj rau lub Koom Haum Caritas Nepal, kom tau pab cuam cov neeg raug dej nyab, pab txhiam xws noj, tej yam cheem tsum siv thiab chaw nyob chaw pw. Muaj xov xwm tshaj tawm tias muaj neeg tuag li ntawm 700 tawm leej nyob Nes Pas thiab nyob Tis Npes. Ntau txhiab leej neeg khiav tsiv teb tsaws chaw thiab ploj lawm 3,000 leej tseem nrhiav tsis tau tau. Tam sim no cov tub nrhiav cov neeg tuag thiab cov neeg pab cuam tseem ua hauj lwm ntxiv mus tas zog.
Hauv cov lus ua ntej no, Tswv Qhia Parolin uas yog Vas Tis Kas tus lwm thawj tswj hais tias : “Vaj Qhia tau tu siab txog cov neeg tuag thiab kev piam sij los ntawm dej nyab. Nws cog lus tias nws yuav thov Ntuj pab cov tub nrhiav neeg tuag thiab cov raug kev kub ntxhov.” Rov thov dua kev thaj yeeb.
Vaj Qhia Leo 14 rov thov kev thaj yeeb dua ib zaug ntxiv. Nws txhib kom ib tsoom neeg yeej kev sib tawg, txhawb nqa kev ncaj ncees thiab xyaum zam txim txhaum. Nws hais txog kev ntseeg ntawm Leej Ntshiab Aus Nkus Tis Nus, nws txhawb cov neeg ntseeg kom ua cov dej muaj txoj sia nyob hauv Tswv Ntuj kev thaj yeeb, thiab hauv lub ntuj muaj qhov txhab. Vaj Qhia nco txog hnub thov Ntuj rau kev saib xyuas yam tsim tawm nyob ntiaj teb, uas yog hnub tim lub 9 hlis no. Yog qhov pib ntawm cov neeg ntseeg lub caij tsim uas xyoo no muaj lub ntsiab lus tias : “Dej ntawm txoj sia.” Vaj Qhia thov kom muaj kev hloov siab, kom cov peev txheej thiab kev muab siab rau ntawm tib neeg uas tau siv los rhuav tshem, tuaj yeem coj mus
siv rau kev txuag yam tsim tawm thiab hloov los txhawb nqa lub neej.
