Cov neeg ntseeg tshaj lub Moo Zoo uas tau txais txoj hauj lwm tshiab no yog tuaj ntawm 25 lub tsev teev Ntuj nyob hauv lub Cheeb Koom Txoos tuaj. Muaj Tswv Qhia Sagayaraj nyob Thanjavur ua tus coj lub thaj txi Ntuj koom nrog cov Txiv Plig 30 tawm leej. Hauv cov lus nthuav ntawv Moo Zoo, Tswv Qhia Sagayaraj tau hais txog 3 yam tseem ceeb ntawm cov hauj lwm uas muab rau cov tshaj lub Moo Zoo pab tshiab no. Xws li tshaj txog Tswv Ntuj kev nyiam kev hlub, kev ua tim khawv tias Tswv Ntuj nyob nruab nrab hauv nws haiv neeg, thiab kev ua kom lub Moo Zoo tshwm sim tseeb tiag nyob hauv lawv kev ua lub neej. Tswv Qhia hais tias : “Tswv Ntuj yog tus muaj kev nyiam kev hlub, Tswv Ntuj nrog nej nyob thiab Tswv Ntuj nyob ntawm nej ib sab tas mus li.” Nod yog qhov tseem ceeb uas cov tshaj lub Moo Zoo tsim nyog yuav theej mus rau ib tsoom neeg uas lawv tau ntsib tau pom. Tswv Qhia Sagayaraj tseem hais ntxiv txog zaj Es Mes Nus Es nyob hauv ntawv Moo Zoo, uas hais txog Tswv Ntuj nrog peb nyob. Nws hais tias cov tshaj lub Moo Zoo tsim nyog yuav pab kom tib neeg nco tias; Tswv Ntuj tsis tau nyob deb peb los yog peb mus tsis txog, tab sis Tswv Ntuj nyob rawv ntawm peb ib sab tas mus li. Dhau no lawm Tswv Qhia tseem hais tias kev tshaj lub Moo Zoo tsis yog yuav vam txog lo lus xwb, tab sis kev ua lub neej neeg ntseeg hauv kev kev ncaj ncees ruaj nreb rau kev ntseeg, kuj yog kev tshaj lub Moo Zoo tau ib yam. Tswv Qhia hais tias : “Yog nej ua lub neej xws li cov neeg ntseeg zoo, mas lub Moo Zoo kuj yuav raug tshaj tawm mus.” Nws txhawb dej siab rau cov tshaj tshaj lub Moo Zoo pab tshiab, kom ruaj nreb rau lawv txoj kev ntseeg thiab rau Leej Pleev, tab txawm yuav ntsib kev txhawj xeeb thiab txhua yam teeb meem kuj xij. Tswv Qhia Sagayaraj tseem thov kom lawv pab tsim pawg ntseeg uas muaj kev nyiam kev hlub, kev ntseeg, kev ncaj ncees thiab txhawj xeeb txog lwm tus. Nws muab thawj pab neeg ntseeg los ua piv txwv kom pom tias ; qhov uas muaj cov neeg ntseeg ua lub neej raws kev ntseeg tseeb tiag ntawd, tuaj yeem txhawb kom lwm tus tig los raws Yes Xus tau. Cov neeg ntseeg uas yog cov tshaj lub Moo Zoo tau txais kev qhuab qhia 1 xyoos. Muaj kawm kev ntseeg Hnub Chiv 15 zaug, nrog rau lwm yam hauv kev tshaj lub Moo Zoo thiab kev ntseeg ntawm cov neeg ntseeg. Cov hauj lwm no yog pab kav xwm fab lub thaj txi Ntuj thiab kev ntseeg ntawm lub Cheeb Koom Txoos Thanjavur ua tus npaj, uas muaj Txiv Plig A Paulraj ua tus saib xyuas.
