Zam ntawv Moo Zoo qhia peb tias ; thaum Yes Xus txiav txim siab tias nws yuav pib ua nws cov hauj lwm nyob ntawm ib tsoom neeg xub ntiag, mas nws mus txais lub Cim Ntxuav ntawm Zam nyob ntawm tus dej Yos Las Das. Zam Ntxuav Plig paub tias Yes Xus yog Mes Xias thiab Zam hais tias nws yog tus yaj uas Tswv Ntuj xa tuaj kom tau ntxuav ntiaj teb neeg cov txhaum.
Zam ntawv Moo Zoo tseem piav ntxiv tias : thaum Zam Ntxuav Plig 2 tug tim xyoob hnov hais tias Yes Xus yog Tswv Ntuj tus yaj, mas nkawd raws Yes Xus mus. Ib tug nyob hauv 2 tug tim xyoob ntawd hu ua As Nres uas nws yog Pob Zeb tij laug.
Thov peb nco lub npe no cia, vim peb yuav tau pom lub npe no nyob hauv ntawv Moo Zoo hnub no. Yes Xus rov ntawm Nas Xas Les thiab tus dej Yos Las Das los, mas nws tsis mus nrog tsev neeg nyob. Nws tsis ua kws ntoo xws li yav tag los. Nws mus nyob ruaj rau Kas Fas Naus, ntawm ntug dej ntuj, nyob ntawm Ntxas Npus Loos thiab Nas Tas Lis ciam teb. Thaum nws txiav txim siab tawm hauv Nas Xas Les thiab mus nyob ntawm ntug dej ntuj Tis Npes Lias, mas nws muaj 34 xyoos. Nyob ntawm ntug dej ntuj, mas muaj 3 lub nroog tseem ceeb thiab peb yuav pom Yes Xus ua hwj huam yees ntxwv ntau kawg nyob ntawd. Peb kuj yuav hnov Yes Xus tshaj lub Moo Zoo ntau dua lwm lub nroog thiab. Lub nroog Xas Is Das uas nyob qaum teb, yog lub nroog Yes Xus hu thawj 5 tug Thwj Tim. Xws li Pob Zeb, As Nres, Yas Kos, Zam thiab Fis Lis Pos. Lub nroog tim 2 yog lub nroog Kos Las Ntxis thiab lwm lub nroog yog Kas Paws Nas Us, uas nyob ntawm ntug dej ntuj sab hnub poob. Kas Paws Nas Us yog lub nroog muaj cov neeg ntes ntses thiab cov neeg ua liaj nyob coob. Lub nroog Kas Paws Nas Us nto npe kawg, vim nws nyob ntawm txoj kab khiav nkoj uas nto npe. Yog txij ntawm Hais Nkws Tos teb mus txog Das Mas Kas thiab mus txog sab hnub tuaj. Dhau no lawm tseem muaj qhov tseem ceeb dua, vim nws yog lub nroog nyob npuas Nkas Lis Lais ciam teb. Kas Paws Nas Us yog lub nroog nyob ntawm ciam teb uas muaj kev sau se ntawm txhua yam toob xib. Yog qhov chaw muaj txhua haiv neeg thiab tej kab lis kev cai qhib dav dua nyob Nas Xas Les.
Yes Xus txiav txim siab mus nyob ntawd, vim Kas Paws Nas Us yog qhov chaw tos txais yam tshiab tshiab ntau dua nws lub zos uas nyob saum roob. Nyob toj siab cov neeg kheev kheev coj raws tej kab lis kev cai ntau dua, vim lawv muaj kev sib raug zoo nrog ib tsoom neeg thiab tej kev xav sib txawv. Vim li no lawv thiaj coj rawv tej kab lis kev cai thiab lawv txoj kev ntseeg. Peb paub zoo tias ib xyoos tom qab, Yes Xus rov mus cuag tsoom pej xeem thiab nws txoj kev xav txawv lawv txoj, ces lawv thiaj ntiab Yes Xus tawm mus. Yog qhov nyuab kawg uas Yes Xus lub Moo Zoo yuav nkag mus txog cov neeg no tej siab ntsws. Txawm li cas kuj xij, Mas Tais paub tias tsim nyog yuav piav txog kev xaiv ntawm Yes Xus hauv kev ntseeg, thiab qhia tias yog qhov tiav log raws li cov yaj saub hais nyob hauv Ntawv Cog Lus Qub. “Yes Xus rov mus nyob Kas Paws Nas Us, kom muaj raws li tus yaj saub His Xais xub hais tseg. Hauv daim av Ntxas Npus Loos thiab daim av Nas Tas Lis, kev mus rau dej ntuj, cov teb chaws nyob sab dej Yos Las Das tim ub, cov neeg teev pej kum dab uas nyob Nkas Lis Lais. Haiv neeg nyob hauv kev tsaus ntuj pom ib qho pom kev cig loj loj kaj cov neeg maub hauv tub tuag lub teb chaws tsaus ntuj, ib qho pom kev ci tawm tuaj lawm.”
Lub xeev Nkas Lis Lais tsis raug hais ntau nyob hauv Ntawv Cog Lus Qub, tsuas hais txog 6 zaus xwb. Vim cov Nkas Lis Lais tsis tau txais kev pom dej siab los ntawm cov Yus Das, thiab lawv yog nyob hauv cov thaj tsam uas feem coob yog cov neeg teev pej kum dab. Ces xav tias lawv txoj kev ntseeg tsis ntshiab huv zoo li nyob Yes Lus Xas Les. Mas Tais tus sau ntawv Moo Zoo ua kom pom tias nws yog tus kws Ntawv Ntshiab zoo heev, vim nws tuaj yeem nrhiav tau ib lo lus nyob hauv cov yaj saub tej lus uas hais txog Nkas Lis Lais. Yog tus yaj saub His Xais cov lus tseem ceeb nyob hauv His Xas Lais liv xwm. Peb nyob ntawm ntu kawg hauv tiam 8 ua ntej Yes Xus yuav yug los, yog lub caij cov As Xis Lias tab tom ntaus rog nyob As Xias nrab.
Xyoo 733 lawv tuaj txog Nkas Lis Lais thiab tua cheb ntxuav xws li cov teb chaws uas lawv tau mus txog. Lawv ntiab cov neeg nyob hauv nroog thiab lawv sau se hnyav kawg. Nyob hauv lub caij kub ntxhov li no, sawv daws pom tias nyias daim av tsaus ntuj nti. Qhov tsaus nti uas tsis muaj leej twg txeem mus dhau. Lub caij ntawd tus yaj saub His Xais thiaj tshaj txog kev zoo siab thiab kev cia siab. Nws hais tias :
“Haiv neeg nyob hauv kev tsaus ntuj pom ib qho pom kev cig loj loj kaj cov neeg maub hauv tub tuag lub teb chaws tsaus ntuj, ib qho pom kev ci tawm tuaj lawm.”
Qhov pom kev ntawd yog ib tug vaj loj nyob hauv lub xeem Das Vis. Tus yaj saub Nas Taas tau hais tseg tias ; tus vaj no yuav daws tso daim av uas cov As Xis Lias kav. Nov yog kev cia siab uas His Xais hais txog.
Mas Tais tus sau ntawv Moo Zoo tau pom raws li cov lus Tswv Ntuj hais rau tus yaj saub His Xais meej kawg. Thaum Yes Xus pib tshaj lub Moo Zoo nyob Kas Paws Nas Us. Lub caij ntawd muaj qhov tsaus ntuj nti, tab sis tej kev tsaus ntuj uas npog haiv neeg ntawd tau ploj mus lawm. Txij ntawd los Yes Xus pib tshaj lub Moo Zoo thiab ceeb toom tias : “Nej hloov siab mog, vim Ntuj lub Ceeb Tsheej tuaj txog ze lawm.”
Yes Xus tsis tau pib lub neej nyob ntawm ib zeej tsoom xub ntiag hauv kev qhuab qhia ntev ntev, tab sis yog los ntawm ob peb lo lus zoo li Yes Xus tau hais rau sawv daws tias : “Nej yuav muab siab rau mloog kom zoo.”
Nej yuav mloog yam kuv hais rau nej tias : “Ntuj lub Ceeb Tsheej tuaj txog ze lawm.” Kev pauv ntxeev ntawm lub ntiaj teb tau pib lawm. Tam sim no kev xav, kev hais lus thiab kev ua lub neej raug hloov mus. Nej yuav muab siab rau mloog kom zoo, vim txhua yam tab tom hloov mus. Peb paub zoo tias thaum kev kav teb chaws hloov mus, mas dab tsi yuav tshwm sim. Cov uas yav tag los muaj hwj chim, cov neeg ua txhaum thiab cov raug kaw nyob hauv nkuaj, yuav tig los muaj hwj chim. Tus neeg ncaj yuav rais ua tus neeg muaj txhaum. Hauv lub ceeb tsheej qub, Yes Xus hais tias :
“Tas txhia yam yuav raug kav los ntawm tib neeg kev ncaj ncees. Thiab peb kuj paub tias tib neeg kev ncaj ncees yog dab tsi.”
Ntawd yog kev sib tw, kev siv lub hwj chim mus rau qhov yuam kev ntawm cov neeg muaj zog, uas caij tsuj cov tsis muaj zog thiab yuam lawv ua nws cov tub txib.
Tam sim no Yes Xus ceeb toom tias : “Ntuj lub Ceeb Tsheej tuaj txog ze lawm.”
Yog lub Ceeb Tsheej uas muaj Tswv Ntuj kev ncaj ncees thiab tas txhua yam tau hloov mus lawm. Qhov Yes Xus ceeb toom, yog lub ntiaj teb tab tom raug hloov mus. Yog koj tseem ua raws lub ceeb tsheej qub tej kev ncaj ncees, mas koj yuav ceev faj. Vim koj tab tom coj koj lub neej mus rau kev piam sij. Yes Xus thov kom tig los hloov siab.
Lo lus no yog los ntawm xeem lus Hes Laas uas hais tias “metanoein”, txhais tias hloov txoj kev xav, tso lub neej qub tseg thiab txais lub neej tshiab.
Yes Xus tsis xav ua nws cov hauj lwm ib leeg. Thaum Yes Xus mus ko taw taug ntug dej ntuj Nkas Lis Lais, mas nws pom ob kwv tij, yog Xis Moos uas hu ua Pob Zeb thiab nws tus kwv As Nres. Nkawd tseem tab tom pov vas ntses rau hauv dej ntuj, vim nkawd yog tub puav ntses. Yes Xus thiaj hais rau nkawd tias :
“Neb raws kuv mus, kuv yuav tsa neb ua tub puav neeg.”
Nkawd tso plhuav cov vas ntses tam sim ntawd, nkawd raws Yes Xus mus.
Yes Xus rov mus ntxiv, ces nws pom dua ob kwv tij ntxiv. Yog Yas Kos uas nws yog Ntxes Npes Dais tus tub, thiab Zam uas yog Yas Kos tus kwv. Nkawd nrog nkawd txiv Ntxes Npes Dais nyob hauv nkoj, lawv tseem tab tom ntxiv lawv cov vas khwb ntses. Yes Xus hu nkawd, ces tam sim ntawd nkawd tso plhuav lub nkoj thiab nkawd txiv tseg, nkawd raws Yes Xus mus.
Peb tau hnov zaj hais txog Yes Xus hu thawj 4 tug Thwj Tim. Lawv tau hnov Yes Xus lub suab hu kom tig los yuav lub siab tshiab thiab ntseeg txog Yes Xus lub Moo Zoo. Raws li Mas Tais hais rau peb, mas Yes Xus hu tas ib tsoom neeg kom tig los yuav lub siab tshiab. Yes Xus tau hais rau peb ib tug zuj zus. Zaj hais txog Yes Xus hu thawj pab Thwj Tim thiaj rais ua lus paj lug hauv Yes Xus cov lus caw, kom tas txhua leej raws nws. Yog lees txais Yes Xus lub Moo Zoo.
Yes Xus tab tom taug ntug dej ntuj Nkas Lis Lais. Thaum peb hnov lo lus tias ‘dej ntuj’ hauv Mas Tais ntawv Moo Zoo, mas peb nkag siab tam sid tias yog hais txog dej ntuj hauv Ntawv Ntshiab. Dej ntuj hauv kev tsiv teb tsaws chaw, uas yog qhov qhia txog kev khiav dim ntawm lub teb chaws ua qhev mus rau lub teb chaws twj lij. Yes Xus tab tom mus kev, nws tab tom pib nws txoj kev tsiv teb tsaws chaw uas xav kom peb txhua tus muaj feem cuam nrog. Yes Xus xav rub peb tawm ntawm lub teb chaws ua qhev hauv kev ntshaw, kev muab hlob, kev xam khib, kev ntshaw cuab tam thiab kev xav kom yeej luag tej. Nyob ntawd peb tsis tau ua lub neej raws li ib tug txiv neej. Yes Xus xav rub peb kom dim ntawm lub teb chaws tsaus ntuj no thiab ua kom peb pib tsiv teb tsaws chaw, kom tau mus txog lub teb chaws uas peb ua tus txiv neej twj lij tiag. Thawj tus neeg ua raws Yes Xus cov lus yog 2 tug kwv tij uas yog Pob Zeb thiab As Nres, uas nkawd tab tom pov vas ntses. Tab sis Yes Xus hu nkawd tias : “Neb raws kuv mus.” Has Nplas Has kuj hnov lub suab hu nws kom pib tawm rooj mus kev ib yam. Tswv Ntuj hais rau Has Nplas Has tias : “Koj yuav mus rau lub teb chaws uas kuv muab rau koj pom.” Tab sis nyob hauv no nws txawv qhov ntawd. Yes Xus tsis tau hais tias : “Neb mus”, tab sis Yes Xus hais tias : “Neb raws kuv mus.” Thaum Ntawv Ntshiab hais tias Yes Xus zaum thiab pib qhuab qhia, mas txhais tias Yes Xus tab tom qhia zoo li ib tug xib hwb. Thaum Ntawv Ntshiab hais tias Yes Xus mus kev, mas txhais tias nws tab tom qhia txog nws lub neej. Koj yuav raws Yes Xus thiab saib nws tus yam ntxwv hauv kev xyuam xim, vim Yes Xus lub neej coj koj mus rau lub teb chaws twj lij. Peb kuj pom tias Yes Xus tsis tau cog lus dab tsi rau 2 tus neeg uas pib raws nws. Nws tsis tau cog lus hais txog yuav muab paj tshab dab tsi rau nkawd. Nws muab txoj hauj lwm rau nkawd ua, yog hloov kev puav ntses los ua kev puav neeg. Kev puav ntses yog hais txog kev rub neeg tawm hauv dej ntuj los. Nyob hauv As Xias nrab cov liv xwm txheej thaud, dej ntuj yog lub Cim ntawm txhua yam uas tav kev ua lub neej. Txhua yam uas ua rau lub neej tsis muaj kev vam meej. Li ntawd, cov Thwj Tim yuav tsum rub neeg tawm los ntawm tej chaw ntawd. Nov yog txoj hauj lwm uas Yes Xus muab rau cov Thwj Tim ua. Thawj ob tug Thwj Tim raug hu kom mus ua dab tsi ? Nkawd tso cov vas ntses pov tseg. Vas yog hais txog txhua yam uas khuam peb cia. Yog qhov txwv tsis pub peb raws Yes Xus. Vim peb paub tias tus nyob hauv lub vas ntses nws nti tsis tau. Lub vas uas koj yuav txiav kom tu, yog lub vas hauv koj lub neej uas tsim tawm los ntawm kev sib haum xeeb thiab kev txawj ntse. Tej ntawd yog lub vas txaus ntshai uas txwv tsis pub koj ua lub neej raws lub Moo Zoo. Yes Xus thov kom thawj ob tug Thwj Tim tso txhua yam uas khi nkawd pov tseg thiab raws Yes Xus mus. Kev txiav txim siab no yuav tsum ua tam sid. Ob tug Thwj Tim nyob hauv ntawv Moo Zoo raws Yes Xus tam sid. Thiab tom qab ntawd, Yes Xus tseem mus kev ntxiv. Nws thiaj ntsib ob tug kwv tij ntxiv, yog Yas Kos thiab Zam uas yog Ntxes Npes Dais ob tug tub. Nkawd nrog nkawd txiv nyob hauv nkoj thiab lawv tab tom ntxiv lawv cov vas ntses. Nyob hauv no lo lus tias ‘vas’, nws kuj txawv. Nws yog lub vas puav ntses los vas khwb ntses uas pov mus rau hauv dej ntuj. Yes Xus hu nkawd, ces nkawd tso lub nkoj thiab nkawd txiv pov tseg tam sid. Peb tau pom lub Cim hauv zaj hais txog vas puav ntses lawm. Qhov uas nkawd tso lub nkoj thiab tso nkawd txiv pov tseg ntawd, yog txhais li cas ? Nkoj yog lub Cim hauv lub neej uas lawv ib txwm ua los. Lawv pov cov vas puav ntses saum lub nkoj ntawd rau hauv dej ntuj. Tab sis tam sim no nkawd tso lub nkoj pov tseg, vim lub neej thiab nkawd txoj hauj lwm uas yuav ua txawv txoj qub. Tab sis tam sim no lawv nce dua ib lub nkoj. Ntawd yog lub nkoj ntawm ib tsoom neeg thiab peb paub tias nkoj yog lub Cim ntawm lub Koom Txoos. Thaum peb xav txog daim duab hauv lub tuam tsev teev Ntuj Gothic, mas peb puas xav txog ib lub nkoj ntxeev ? Hauv lub nkoj no yog qhov chaw cov neeg ntseeg tuaj sib ntsib hauv Hnub Chiv.
Ob kwv tij Zam thiab Yas Kos tau tso nkawd lub nkoj pov tseg, vim Yes Xub thov kom nkawd tso lub neej qub uas yog puav ntses tseg. Tam sim no nkawd yuav puav ntses hauv tus yam ntxwv txawv, vim tus nce lub nkoj ntawm cov neeg ntseeg yog tus lees txais lub Moo Zoo tseeb tiag. Yuav ua zoo tib yam, tab sis yog Yes Xus lub hom phiaj. Ntxas Kais yog tus neeg sau se, tab sis nws sau se hauv tus yam ntxwv txawv.
Mas Tais kuj tseem sau se ntawm rooj vag ntxiv mus, tab sis lub hom phiaj kuj txawv tsis zoo li qub. Yog koj nce dua ib lub nkoj tshiab, mas koj kuj yuav tso lub nkoj qub pov tseg. Vim thaum sawv ntxov koj teev Ntuj, koj yuav thov txog Tswv Ntuj thiab thov koj tias ; thov kom koj tej kev ua hnub no rais ua kev sov siab thiab kev nyab xeeb rau lwm tus. Ob tug Thwj Tim tso nkawd txiv pov tseg, nyob hauv Semitic cov kab ke, txiv yog hais txog cov kab ke uas lawv ib txwm coj. Yog lub Moo Zoo tiv yam uas koj xav thiab ib txwm coj los, mas thov cia lub Moo Zoo hloov pauv koj. Nws zoo li thaum koj nyuam qhuav yuav poj niam, koj tso niam tso txiv tseg, tab sis koj tseem hlub lawv. Thiab nraug vauv yuav tsis nrog niam txiv nyob ntxiv mus. Nws yeej mloog lawv, tab sis nws yuav tuav xam kev txiav txim siab nrog tus nkauj nyab.
Tam sim no peb yuav los mloog tias Yes Xus ua nws cov hauj lwm li cas ntxiv mus ?
Yes Xus mus rau lub xeev Nkas Lis Lais, nws qhia lawv nyob hauv tsev Txoos. Nws tshaj lub Moo Zoo hais txog Ntuj lub ceeb tsheej thiab nws kho mob rau ib zeej tsoom. Nqe lus kawg hauv zaj ntawv Moo Zoo hnub no, ua kom peb pom txog yam Yes Xus ua los pab ib zeej tsoom neeg nyob hauv nws lub neej, hauv thawj 3 lo lus uas Yes Xus qhuab qhia lawv.
Lo lus 1, Yes Xus yog qhov pom kev ntiab ntiaj teb qhov tsaus ntuj. Thiab qhov pom kev no pib ci pom kev thaum Yes Xus pib qhuab qhia raws ntug dej ntuj Nkas Lis Lais.
Lo lus 2, nws tshaj lub Moo Zoo. Lub Moo Zoo uas nws tshaj rau ntiaj teb yog dab tsi ? Tswv Ntuj yog kev nyiam kev hlub thiab tsuas muaj kev nyiam kev hlub xwb. Tsis muaj lwm txoj kev ntseeg twg yuav tshaj li ntawd los dua. Txhua txoj kev ntseeg thiab kev ntseeg Yus Das qhia tias ; Tswv Ntuj nyiam tus neeg ncaj ncees. Tus uas mloog cov lus txib, mloog txoj cai thiab ua raws kev npaj ntawm Tswv Ntuj. Tsis muaj qhov pom zoo, tab sis muab txim rau tus hla Tswv Ntuj txoj cai. Tswv Ntuj tus duab zoo li no yuav raug rhuav tshem mus. Lub Moo Zoo yog Tswv Ntuj hlub txhua tus tas mus li, tab txawm tias lawv ua tsis zoo kuj xij. Tswv Ntuj muab kev nyiam kev hlub thiab nws cov koob hmoov rau txhua tus neeg.
Lo lus 3, nws saib xyuas cov neeg mob. Nws kho lawv dim ntawm tej kev mob nkeeg. Tab sis tej kev kho no yog lub Cim ntawm lub neej muaj kev zoo siab, tsuas yog Yes Xus lub Moo Zoo xwb thiaj muab tau rau.
Kwv tij Hmoob sawv daws ! Hnub no peb piav Mas Tais ntawv Moo Zoo zaj 4, qib 12 txog qib 23 los xaus li no xwb. Thov nej khaws 3 lo lus no tseg mog ! Yes Xus yog qhov pom kev yeej ntiaj teb qhov tsaus ntuj. Yes Xus yog kev nyiam kev hlub nkaus xwb, thiab Yes Xus lub Moo Zoo thiaj kho tau peb tej mob nkeeg hauv peb nruab siab.
Thov Huab Tais Yes Xus Pleev lub txiaj ntsim nrog nej nyob, ua nej siab kaj lug !
Lwm zaum peb mam sib ntsib dua, nej sawv daws nyob zoo !
