Zaj nyeem hnub tim 1 lub 3 hlis 2026
Hnub Chiv, Lis Piam 2 caij Plaub Caug
Cov lus nyob hauv Mas Tais Ntawv Moo Zoo (MT 17: 1-9)
Kwv tij zoo nyiam sawv daws, hnub no yog hnub chiv lis piam 2 caij Plaub Caug. Cov lus nyob hauv Mas Tais Ntawv Moo Zoo peb hnov hnub no Huab Tais Yes Xus lub hwj chim twm los. Huab Tais Yes Xus, Pob Zeb, Yas Kos, thiab Zam tab tom mus kev mus tom Yes Lus Xas Les. Nyob ntawd, Huab Tais Yes Xus yuav ntsib kev tuag, nws yuav raug dais aum Ntoo Cuam. Ua ntej lawv yuav nce mus saum ib lub roob siab, Huab Tais Yes Xus kuj hais txog nws txoj kev txom nyem, nws yuav tuag. Cov lus no ua rau cov thwj tim ntshai kawg, lawv tsis muaj zog ua Yes Xus cov thwj tim ntxiv mus lawm, tsis muaj kev vam lawm. Tiam sis, hnub no, saum roob, Huab Tais Yes Xus ua kom lawv muaj kev cia siab lawm tias “Huab Tais Yes Xus yog Tswv Ntuj Leej Tub, nws yog Tswv Ntuj qhov chaw zoo siab.” Peb cov ntseeg txog Tswv Ntuj sawv daws yuav tsum cia siab rau Huab Tais Yes Xus. Txawm tias ntaus zaus muaj kev nyuaj siab, muaj kev ntxhov siab ntau yam tshwm sim hauv peb lub neej, ua rau peb ntshai, ua rau peb tu siab, tsis muaj zog taug kev ntxiv mus, kuj thov kom peb nco ntsoov tias Huab Tais Yes Xus nrog nraim peb zoo xws li nws nrog nws cov thwj tim nyob.
Kwv tij sawv daws, peb lub neej kuj zoo ib thiab. Peb lub neej kuj zoo li cov thwj tim. Tej zaus, peb tsis to taub, tej zaus peb tsis cia siab, tej zaus peb tsis ntseeg Tswv Ntuj tiag tiag, tej zaus peb khiav mus kom deb ntawm Tswv Ntuj vim teeb meem hauv yus lub neej, kuj tsis ua cas. Huab Tais Yes Xus tseem hlub peb, Huab Tais Yes Xus tseem nyiam peb. Huab Tais Yes Xus tsis ntxub peb. Vim nws paub zoo tias hauv peb lub neej mas, peb yuav tsum mus dhau qhov nyuaj siab nyuaj plawv ntau yam. Yog peb kho siab kom zoo lawm, kom muaj zog lawm, ces txhob tsis nco qab tias Huab Tais Yes Xus tseem tos peb kom rov los nrhiav nws. Txawm li cas kuj xij, Tswv Ntuj tseem nyiam peb. Peb tseem yog nws qhov chaw zoo siab.
Nyob zoo sawv daws.
