Hnub chiv tim 15 lub 12 hli ntuj 2024
Lus Kas 3:10-18
Lub lis piam 3 hauv Lub Caij Tos Huab Tais
“Peb ne, peb yuav ua dab tsi.”
Cov kwv tij zoo nyiam sawv daws, hnub no yog hnub chiv lub lis piam 3 hauv lub Caij Tos Huab Tais. Lub ntsiab lus ntawm lub lis piam no yog kev zoo siab los kev xyiv fab. Peb cov ntseeg sawv daws yuav tsum muaj kev zoo siab hauv peb lub siab lub ntsws, hauv peb lub neej zoo li tus yaj saub Xos Fos Nias hauv zaj nyeem ib hnub no hais tias “Leej me ntxhais Xis Yoos, koj seev suab luag lom zem mas! Tsoom His Xas Lais, nej cav lus zoo mog! Me ntxhais Yes Lus Xas Les, koj dhia hom khaj mas!, vim Huab Tais ua vaj nyob nruab nrab hauv koj.” Ntawm peb mas, peb kuj yuav tsum seev suab luag ntxhi lom zem, muaj kev zoo siab thiab vim tias Huab Tais Yes Xus yuav yug los lawm. Peb tab tom npaj peb lub neej tos txais nws, peb thiaj muaj kev zoo siab.
Lub lis piam yav tag los peb mloog Leej Ntshiab Zam Ntxuav Plig qhia kom sawv daws “npaj kev rau Huab Tais, kom sawv daws ua Tswv Ntuj txoj kev kom ncaj tuaj.” Lub lis piam no, tsoom pej xeem ntshaw xav paub txog tias lawv yuav npaj yus tus kheej zoo li cas? Lawv nug nws tias “Peb yuav ua dab tsi?” Tsoom pej xeem muab siab rau siab nhriav Tswv Ntuj, lawv xav paub Tswv Ntuj, lawv thiaj mus nug Zam kom qhia lawv tias lawv yuav tsum npaj yus tus kheej zoo li cas thiaj tsim nyog tos txais Tswv Ntuj tuaj nyob nruab nrab lawv. Li ntawd, Leej Ntshiab Zam qhia ntxiv kom meej rau tsoom sid tias lawv yuav ua dab tsi? Zam qhia tias peb yuav tsum npaj yus tus kheej los npaj Tswv Ntuj txoj kev zoo li no: “Tus muaj o blub tsho, yuav faib rau tus tsis muaj. Tus muaj mov noj, nws kuj yuav ua li ntawd thiab. Nej txhob quab yuam leej twg, txhob ntxias yuav dab tsi. Nej nyiaj hli raug npaum li cas, mas nej yuav txaus siab txais li ntawd.”
Kwv tij zoo nyiam sawv daws, cov lus qhia uas Zam qhia peb kom npaj hnub no tsis yog ib yam dab tsi uas nyuaj kawg los tsis yog ib yam dab tsi uas peb ua tsis tau. Tab sis mas yog qhov uas peb sawv daws ua tau kawg. Yam li faib lub tsho rau lwm tus uas tsis muaj, pub mov rau tus tsis muaj mov noj, hais lus zoo rau lwm tus, tsis txhob cem los npau taws rau lwm tus los hais lus phem rau lwm tus. Tej yam no yog kev npaj ntawm sab hauv, hauv peb lub siab lub ntsws, hauv peb lub tswv yim, pauv peb tus cuj pwm uas tsis zoo.
Kwv tij zoo nyiam sawv daws, lo lus nug no “peb ne, peb yuav ua dab tsi? Yog lo lus nug tseem ceeb tshaj uas peb yuav tsum rau siab mloog lo lus teb ntawm Zam Ntxuav Plig. Zam Ntxuav Plig qhia peb kom tig los yuav lub siab tshiab, mloog Tswv Ntuj Lo Lus, teev Ntuj tsis tseg kuj yog ib qho zoo lawm, tab sis mas, kev tig los yuav lub siab tshiab tsis yog qhov peb xav los yog nyob ntawm txoj kev xav xwb, tab ss mas, kev tig los yuav lub siab tshiab yuav tsum tshwm sim tiag tiag hauv peb lub neej uas sawv daws pom tau. Thaum luag pom lawv thiaj paub tias yus npaj yus tus kheej kom txhij tos txais Huab Tais Yes Xus lawm, yus npaj Tswv Ntuj txoj kev kom ncaj lawm, yus npaj txhij tos txais Huab Tais Yes Xus hauv yus lub neej lawm.
Thov kom hluav taws ntawm Leej Ntuj Plig Ntshiab hlawv txhua yam phem txhua yam tsis zoo hauv peb lub neej kom tag pov tseg kom tsis tshuav yam tsis zoo dab tsi ntxiv. Kwv tij sawv daws, nej mloog Tswv Ntuj Lo Lus hnub no tas lawm, nej ne, nej yuav ua dab tsi?
Nyob Zoo sawv daws!
