ZAJ NYEEM HNUB TIM 17 LUB 8 HLI 2025
HNUB HWM MAB LIAB MUS SAUM NTUJ
COV LUS NYOB HAUV LUS KAS NTAWV MOO ZOO (LK 1: 39-56)
Nyob zoo os kwv tij hmoob sawv daws, zoo siab tos txais nej sawv daws los mloog Tswv Ntuj lo lus ua ke. Kuv yog Txiv Plig Tshaj Moo ntawm lub koom haum Zoo Tswv Zov Yaj.
Hnub no yog hnub chiv tim 17 lub 8 hli xyoo 2025
Hnub chiv no lub Koom Txoos nyob Thaib teb hwm Mab Liab Mus Saum Ntuj. Lub Koom Txoos Kas Tos Liv caw peb kom saib ntawm Niam Mab Liab tus piv txwv. Muaj ob yam peb kuv xav nej sawv daws twm txog thiab coj los ua raws hauv yus lub neej. Ob yam no yog Niam Mab Liab kev ua neej nyob thiab nws txog kev ntseeg txog Tswv Ntuj.
Niam Mab Liab yog neeg tsis muab hlob, nws nyiam pab lwm tus, nws muab siab rau luag tej, yog lawv muaj teeb meem los qhov nyuaj dab tsi, niam Mab Liab cev tes pab lawv. Nws nyiam nyiam pab luag tej cov pluag txom nyem zoo xws li nws pab Es Lis Xas Npes, nws tsob hwb Es Lis Xas Npes peb lub hlis tej vim Es Lis Xas Npes laus laus lawm thiab nws xeeb tub. Peb pom tias Niam Mab Liab nyiam tsob hwb lwm tus vim nws paub tias ua li no yog ua raws Tswv Ntuj lub siab nyiam. Tswv Ntuj xav kom tib neeg, tsis muab hlob, tsis sib cav sib ceg, tsis ua neeg qia dub. Li ntawd, Niam Mab Liab thiaj yog tus piv txwv zoo rau peb kom ua raws. Peb thiaj ua neej nyob kom xis Tswv Ntuj lub siab nyiam.
Tsis tas li ntawd, Mab Liab tseem yog tus piv txwv zoo ntawm kev ntseeg txog Ntuj. Tom qab Leej Ntshiab Kas Nplias qhia kom nws paub tias nws yuav xeeb tub, niam Mab Liab kuj zoo siab ua raws li Tswv Ntuj lub siab nyiam. Nws ntshai kawg, nws ntxhov siab, nws nyuaj siab, nws tsis nkag siab, tiam sis, nws ntseeg ruaj nreb. Nws ntseeg ruaj ruaj tias Tswv Ntuj tsis tso nws pov tseg, Tswv Ntuj yuav pov hwm nws, Tswv Ntuj yuav mus ua ntej nws, nws yuav tsum npuab Tswv Ntuj. Niam Mab Liab thiaj txais ua raws Tswv Ntuj cov lus thov. Niam Mab Liab siab nws tus kheej yog “Tswv Ntuj tus ntxhais txib” xwb, nws zoo siab ua raws li Tswv Ntuj hais.
Kwv tij zoo nyiam sawv daws, kuv xav tias niam Mab Liab yog peb tus piv txwv, yog peb xav tias tsis muaj leej twg ua piv txwv zoo rau kuv, saib ntawm Niam Mab Liab thiab ua raws. Hnub no, peb hwm niam Mab Liab mus saum ntuj, yog kev vam kev cia siab rau peb tias yog peb ua raws li nws tus piv txwv, muaj ib hnub peb kuj yuav mus saum ntuj nrog Tswv NTuj thiab niam Mab Liab nyob thiab. Qhov no yog peb txoj kev ntseeg. Qhov tseem ceeb tshaj plaws yog tias peb tab tom taug kev hauv niaj teb no, peb yuav ua neeg zoo li cas. Peb tseem muaj txoj sia nyob, peb yuav taug hauv txoj kev twg, peb yuav ntseeg txog dab tsi? Qhov twg muaj qab hau tshaj plaws? Lub cuab tam nyob niaj teb no, los lub cuab tam nyob saum ntuj? Niam Mab Liab xaiv lub cuab tam nyob saum ntuj, hnub no nws tau txais nws lub cuab tam lawm. Thov peb siv sij hawm twm txog Tswv Ntuj lo lus hnub no kom zoo mog.
Thov Tswv Ntuj foom koob foom hmoov rau peb txhua leej txhua tus.
Nyob zoo sawv daws.
