Hnub Chiv Tim 21 Lub 4 Hlis 2024
Lub Caij Hla (lub lis piam 4)
Zam Ntawv Moo Zoo 10: 11-18
“Kuv yog tus tswv zov yaj, yog tus zoo tswv. Tus zoo tswv zov yaj siv nws txoj sia los pab nws cov yaj.”
Nyob zoo…
Cov kwv tij zoo nyiam sawv daws, hnub no yog hnub chiv lub lis piam 4 hauv lub caij Hla. Tswv Ntuj Lo Lus hauv Zam Ntawv Moo Zoo hauv hnub no caw peb kom saib Huab Tais ib yam li tus zoo tswv zov yaj. Yes Xus yog tus zoo tswv, cov ntseeg sawv daws yog tus yaj.
Hais txog tus tswv zov yaj, Zam qhia kom meej kom tseeb tias muaj ob tug yam ntxwv uas saib xyuas cov yaj. Yog tias “tus ntiav zov” thiab “tus tswv.” Hais txog tus ntiav zov mas, nws tsis yog tswv, thiab cov yaj tsis yog nws li. Thaum pom hma tuaj, los thaum raug xwv txheej, kev kub ntxhov, los muaj teeb meem loj li cas tuaj txog, nws yuav tso cov yaj pov tseg. Nws khiav lawm. Nws tsis txhawj dab tsi txog cov yaj.
Tab sis mas tus zoo tswv tsis yog li ntawd. Tus zoo tswv zov yaj siv nws txoj sia los pab nws cov yaj. Nws muab nws txoj sia tag nrho rau cov yaj ua rau cov yaj muaj txoj sia ntxiv mus.
Kwv tij sawv daws, piav li no mas, kuv vam thiab cia siab tias peb pom thiab paub zoo lawm tus yam ntxwv twg yog tus zoo, ces peb thiaj yuav tsum ua raws. Ntawv Moo Zoo phau no, Zam sau cia rau pawg ntseeg nyob ib puag ncig nws. Zam sau Ntawv Moo Zoo zeem tseeb tias Yes Xus yog tus zoo tswv zov yaj uas Phau Ntawv Cog Lus Qub hais txog: yog hais tias Yes Xus yog tus Pleev, yog Tswv Ntuj Leej Tub. Thiab cov pawg ntseeg Hauv Puas Xa Lus vam tiag tiag tias tus thawj coj ntawm cov neeg ntseeg yuav tsum ua neeg zoo li cas? Tus thawj coj ntawm cov neeg ntseeg tsis yog zoo li tus ntiav zov hauv zaj nyeem hnub no. tsis yog! Tus ntiav zov yog neeg qia dub, nws saib ntawm nws tus kheej xwb. Nws tsis qee los pauj nws tus kheej los pab cov yaj. Tab sis mas, cov pawg ntseeg Hauv Puas Xa Lus vam tiag tiag tias tus thawj coj yuav tsum tsob hwb lwm tus zoo li tus zoo tswv zov yaj, yuav tsum tsob hwb luag tej zoo li Huab Tais Yes Xus, peb tus piv txwv.
Kwv tij hmoob sawv daws, tej zaus mas, peb saib ntawm txoj hauj lwm tshaj Ntuj Lus zoo li kev ris nra xwb, tej zaus peb pom tias txoj hauj pab Lub Koom Txoos, pab tsev teev Ntuj, pab txiv plig yog ib txoj hauj lwm hnyav hnyav, yog kev ris nra xwb. Tab sis mas peb tsis pom qhov no zoo li ib txoj hauj lwm uas Tswv Ntuj hu peb los ua los Huab Tais Yes Xus hu peb los tsob hwb nws. Lo lus Latin hu tias “vocatio” los vocation los “ to call.” Tswv Ntuj hu peb los ua vim tias peb muaj peev xwm ntau yam los gifts uas peb tsob hwb Tswv Ntuj tau. Qhov no yog cov peev xwm ntawm tus thwj coj los tus zoo tswv uas Yes Xus xav kom tshwm sim tuaj.
Kwv tij sawv daws, yog peb xav tias txoj hauj lwm tshaj Ntuj Lus yog ib qho uas peb yuav tsum ua kom tiav kom tas, luag tej yuam peb kom ua xwb. Xav li no mas, peb yuav xav txog yus tus kheej xwb. Yus xav txog yus tus kheej xwb, saib tsis pom luag tej li. Peb yuav ua zoo li tus ntiav zov hnub no.
Tab sis mas, yog peb xav tias txoj hauj lwm tshaj Ntuj Lus no yog ib qho uas Huab Tais Yes Xus ua kuv kom ua, hu kuv kom tsob hwb nws, mas peb yuav saib ntawm luag tej, tsob hwb luag tej, tsis pom yus tus kheej xwb. Ua li no, mas peb ua neej zoo li tus zoo tswv zov yaj hauv hnub no.
Thov Tswv Ntuj foom hmoov zoo rau peb sawv daws txhua leej txhua tus.
