Hnub Chiv Tim 28 Lub 4 Hlis 2024
Lub Caij Hla lub lis piam 5 Zam 15:1-8
“Nej nyob hauv kuv, ib yam li kuv nyob hauv nej… yog nej ncaim ntawm kuv, nej ua tsis tau dab tsi.”Nyob zoo kwv tij hmoob hmov tshua sawv daws txhua leej txhua tus…
Kwv tij sawv daws, Tswv Ntuj Lo Lus hnub no muaj lub ntsiab lus tseem ceeb tshaj tsim nyog uas peb yuav siv sij hawm xav tswv yim txog. Huab Tais Yes Xus Lo Lus hais tias “Nej nyob hauv kuv, ib yam li kuv nyob hauv nej… yog nej ncaim ntawm kuv, nej ua tsis tau dab tsi.” Lo Lus no “Nej nyob hauv kuv” yog ib co lus uas Yes Xus thov kom peb ua kom ruaj. Abide in me, remain in me, nej nyob hauv kuv maj! Yes Xus thov kom peb cov ntseeg sawv daws ua raws kom tau kom ruaj. Txawm tias muaj teeb meem los muaj xwv txheej li cas los kuj xij, “nej nyob hauv kuv,” peb yuav tsum nyob hauv Tswv Ntuj, yog thaum peb ncaim ntawm Tswv Ntuj lawm, peb ua tsis tau dab tsi.
Kwv tij sawv daws, hais txog cov lus hais tias “yog peb tsis nyob hauv Huab Tais Yes Xus, yog peb ncaim ntawm Yes Xus mas, peb ua tsis tau dab tsi,” mas ib txhia yuav hais tias cov lus no tsis yog qhov tseeb, vim rau qhov hais tias nyob ntiaj teb no mas, muaj coob leej, lawv tsis paub Tswv Ntuj, lawv tsis ntseeg txog Yes Xus, ua cas hos lawv ua tau ntau yam loj, lawv ua tau ntau yam vam meej muaj nyiaj muaj txiag, muaj ntau yam zoo raws li lawv lub siab ntshaw. Yog maj! Yog lawm! Tab sis mas, lawv tsis yog peb, cov ntseeg txog Yes Xus. Lawv ua ntau yam zoo, tab sis tsis yog qhov uas Yes Xus lub siab nyiam. we are not trying to do good things – we are trying to do Jesus things. Qhov peb ua mas peb ua raws li Yes Xus Lo Lus qhia, qhov uas nws xav kom nws cov thwj tim sawv daws ua. Tsis yog qhov zoo xwb, tab sis yog qhov uas peb nrog Yes Xus txhim hauv lub Koom Txoos, peb nrog lub Koom Txoos txhim Tswv Ntuj lub Ceeb Tsheej nyob ntiaj teb no, ces peb nyob hauv Yes Xus, peb tsis ncaim ntawm nws. Ib yam li kuv hais ua ntej, hais tias Tswv Ntuj hu peb ib leej ib leej los nrog Tswv Ntuj ua hauj lwm, Tswv Ntuj hu peb los ua txoj hauj lwm tseem ceeb raws li peb lub rab peev xwm, raws li peb lub zog ua tau nyob hauv Tswv Ntuj lub Ceeb Tsheej. Yog peb tsis nyob hauv Huab Tais Yes Xus mas, yog tiag tiag lawm tias peb ua tsis tau dab tsi. Martin Luther, tus thawj coj tseem ceeb ntawm Amerca, thaum ub mas nws hais tias “siv kuv los ua koj lub cuab yeej tab sis tsis txhob tso kuv tseg, vim tias yog kuv ua kuv tus kheej xwb, mas kuv yuav yooj yim mus yuam kev."
Kwv tij zoo nyiam sawv daws, peb yuav ua li cas peb thiaj nyob hauv Yes Xus, tsis ncaim ntawm nws? Hauv Ntawm Moo Zoo hnub no, Yes Xus hais meej tiag tiag tias “Kuv Txiv twb tav nej lub ntsis lawm, vim lo lus kuv tau hais rau nej,” thiab nws hais tias “Yog nej nyob ruaj hauv kuv, thiab kuv cov lus nyob ruaj hauv nej, mas nej thov dab tsi, nej yuav tau raws li nej thov.” Ntawm no mas, peb paub tias Tswv Ntuj Lo Lus ua kom peb nyob hauv Tswv Ntuj. Yog peb nyeem Ntawv Ntshiab, yog peb xav tswv yim txog Tswv Ntuj, yog peb mloog Tswv Ntuj Lo Lus thiab ua raws, qhov no yuav pab peb kom nyob hauv Tswv Ntuj. Vim li ntawd, txhua hnub txhua hmo, peb thov Ntuj los peb teev Ntuj, ces peb nyeem thiab mloog Tswv Ntuj Lo Lus thiab xav tswv yim txog Tswv Ntuj hais dab tsi rau yus tus kheej. Thiab txhua hnub chiv mus teev Ntuj, mus txais lub Cim Yug uas yog Yes Xus lub cev.
Yog peb ua li no, mas peb yuav pom Leej Ntuj Plig Ntshiab nyob hauv peb, Nws tab tom coj peb hauv txoj kev nyob hauv Tswv Ntuj. Ib txhia mas yuav nug tias ua cas yus thiaj paub tias qhov yus ua tsis yuam kev?
Leej Ntshiab Paj Lug qhia peb nyob hauv Tsab Ntawv Nkas Las Tias zaj 5 hais tias “Leej twg mloog Leej Ntuj Plig, mas nws yuav txi tej lub txiv zoo li no: nws nyiam Ntuj, nws zoo siab ua neeg, nws nyob kaj lug, nws ua siab ntev, nws xyiv fab pab luag tej, nws ua siab zoo rau luag, nws tso siab rau luag, nws txawj hlub luag tej, nws txawj kav nws lub cev zoo.”
Kwv tij hmoob sawv daws, peb xav tau Tswv Ntuj. Peb ua peb xwb tsis tau, peb mus peb xwb tsis tau. Peb yuav tsum nyob hauv Tswv Ntuj tib leeg xwb. Vam thiab cia siab tias zaj nthuav Ntawv Moo Zoo hnub no yuav pab peb kom xav tswv yim txog yus thiab Tswv Ntuj. Yuav pab kom peb nyob hauv Huab Tais Yes Xus kom ruaj tuaj mog. Nyob zoo sawv daws.
