Hnub Chiv tim 29 lub 6 Hlis 2025
Hnub Hwm Leej Ntshiab Pob Zeb thiab Leej Ntshiab Paj Lug)
Lub Caij Nyob Nruab Xyoo
Mas Tais 16: 13-19
“Koj yog Leej Pleev, yog tus Tswv Ntuj Muaj Txoj Sia Leej Tub”
Nyob zoo…
Hnub chiv no lub Koom Txoos Kas Tos Liv hwm 2 tug leej ntshiab loj: nkawd yog Leej Ntshiab Pob Zeb thiab Paj Lug. 2 tug leej ntshiab no yog tus pov hwm txoj kev ntseeg, nkawd yog zoo li 2 lub pob zeb tseem ceeb tshaj plaws uas Huab Tais Yes Xus txhim nws lub Koom Txoos rau saum nkawd. Huab Tais Yes Xus lo lus nug rau nws cov thwj tim: “Nej ne, nej hais tias kuv yog leej twg?” lo lus nug no tseem ceeb tshaj plaws ntawm peb cov neeg ntseeg sawv daws. Ntawm kuv mas, Huab Tais Yes Xus yog leej twg? Huab Tais Yes Xus yog leej twg ntawm kuv lub neej? Leej Ntshiab Pob Zeb thiab Paj Lug yog tus piv txwv rau peb. Peb yuav saib nkawd teb rau Huab Tais Yes Xus lo lus nug zoo li cas?
Pob Zeb lo lus teb rau Yes Xus yog tias “nws yuav raws Yes Xus qab. Ntau zaum Pob Zeb tsis to taub ua cas Huab Tais Yes Xus qhia li no, ua cas nws hais li no, ua cas nws ua li no, tsis kav nws tseem raws Yes Xus mus. Txawm tias nws tsis lees txais Huab Tais Yes Xus 3 zaug, tsis kav nws tseem raws Yes Xus qab. Tsis yog hais tias yus lees tias Yes Xus yog leej twg ntawm yus lub neej, tiam sis yus yuav tsum tso lub neej qub pov tseg, tso qhov tsis zoo pov tseg, ces yus raws Yes Xus qab. Yus txiav siab raws Yes Xus qab, yus yeej paub Huab Tais Yes Xus zuj zus, yus yeej pom meej tias nws tseem ceeb li cas hauv yus lub neej. Yus yuav paub Yes Xus zoo dua kuj vim tias yus raws Yes Xus qab, yus coj Yes Xus cov lus qhia los ua kom tshwm hauv yus lub neej. Yus ua raws li nws qhia tiag tiag, mas yus thiaj paub nws zoo dua zuj zus. Yus thiaj teb tau rau lo lus nug tias: “nej ne, nej hais tias kuv yog leej twg?”
Ntawm Leej Ntshiab Paj Lug mas, nws kuj yog ib lub pob zeb tseem ceeb hauv lub Koom Txoos thiab. Nws coj Yes Xus cov lus qhia mus tshaj rau thoob qab ntuj. Nws ua lub neej ua tim khawv txog lub Moo Zoo, tshwj xeeb mas yog cov pej kum neeg. Ua ntej, Paj Lug yog tus tiv thaiv lub Koom Txoos, nws yog tus tiv thaiv Huab Tais Yes Xus, nws tiv thaiv Yes Xus cov thwj tim thiab cov neeg ntseeg huv tib si. Tiag tiag mas, nws tiv thaiv Tswv Ntuj tsis tau. Nws tiv thaiv Yes Xus tsis tau. Ntawm qhov tsis sib xws, mas Yes Xus hu nws kom pov hwm txoj kev ntseeg, Yes Xus hu nws kom tshaj lub Moo Zoo. Nws rau siab tshaj Ntuj Lus vim nws paub meej tiag tias ntawm nws mas, Huab Tais Yes Xus yog leej twg?
Kwv tij zoo nyiam sawv daws, peb pom meej lawm tias Huab Tais Yes Xus yog leej twg ntawm Leej Ntshiab Pob Zeb thiab Paj Lug. Ntawm peb hmoob mas, Huab Tais Yes Xus yog leej twg? Nws muaj qab hau dab tsi ntawm peb lub neej? Ua cas peb thiaj los ntseeg txog Huab Tais Yes Xus? Hnub no, peb muab khaws cia xav, saib tias peb yuav tsum teb lo lus nug li cas. Yus yuav tsum nug yus tus kheej tias “ntawm kuv, mas Huab Tais Yes Xus yog leej twg?
