ZAJ NYEEM HNUB TIM 31 LUB 5 HLIS 2026
HNUB CHIV HWM HUAB TAIS PEB LEEG
COV LUS NYOB HAUV ZAM NTAWV MOO ZOO (Z 3: 16-18)
Kwv tij zoo nyiam sawv daws, hnub no yog hnub chiv hwm Huab Tais Peb Leeg. Huab Tais Tswv Ntuj yog Huab Tais Peb Leeg uas yog Huab Tais Leej Txiv, Huab Tais Leej Tub, thiab Huab Tais Leej Ntuj Plig Ntshiab. Hauv zaj cav txog Tswv Ntuj Nto Moo ntawm thaj txi Ntuj peb thiaj hais tias “…Yes Xus Pleev, koj tib leeg nrog Leej Ntuj Plig ua tus Huab Tais Ntshiab, koj tib leeg yog tus Tswv Ntuj nyob siab tau Leej Txiv lub hwj chim. Ua li.” Peb paub zoo lawm. Qhov tseem ceeb tshaj plaws ntawm Huab Tais Peb Leeg mas yog kev nyiam thiab kev sib haum xeeb. Thaum Huab Tais Yes Xus ua hauj lwm tshaj Ntuj Lus 3 xyoo, nws kuj ua tim khawv txog txoj kev nyiam no. Li ntawd, Ntuj kev cai txog kev nyiam kev hlub, tsis yog Huab Tais Yes Xus tus, tiam sis yog Huab Tais Peb Leeg tug. Huab Tais Yes Xus yog tus coj txoj cai no los ua kom tshwm sim tuaj tiag tiag, thiab kom peb pom xyeem thiab ua coj mus ua raws li nws qhia tiag tiag hauv peb lub neej.
Kwv tij sawv daws, txhua hnub chiv hauv thaj txi Ntuj peb mloog cov txiv plig qhia txog kev nyiam kev hlub, tej zaus mas kuj dhuav kawg, tsis muaj dab tsi tshiab. Puas yog? Qhov tseem ceeb yog tias ntawm peb lub neej mas, peb yuav ua neej hauv txoj kev nyiam tau li cas? Peb yuav ua li cas kev nyiam kev hlub thiaj tshwm sim tuaj tiag? Ntawm kev ua Tswv Ntuj tus me nyuam mas tsis yog kev txais lub cim ntxuav, tiam sis yog kev ua neej nyob hauv txoj kev nyiam kev hlub: hlub yus tus kheej, hlub cov nyob ib puag ncig peb, hlub cov kwv tij neeg tsa, hlub cov pluag, hlub luag tej. Thov kom peb coj mus sim xav, sim ras txog kom zoo mog.
Nyob zoo sawv daws.
