Hnub Chiv tim 4 Lub 2 Hlis Ntuj 2024
Lub lis piam tim 5 hauv lub caij Nyob Nruab Xyoo
Mas Kos 1:29-39
“Peb mus lwm qhov chaw, hauv cov zej zog nyob tsis deb ntawm no, kom kuv tau kev tsahj lus nyob ntawd thiab.”
Nyob zoo…
Kwv tij zoo nyiam sawv daws, hnub no peb hnov lub Moo Zoo qhia peb txog Yes Xus txoj kev tshaj Ntuj Lus. Yes Xus thiab cov thwj tim mus hauv tej zej zog, tshaj Tswv Ntuj lo lus, tshaj txog Ntuj lub Ceeb Tsheej. Yes Xus kho cov muaj mob thiab ntiab cov raug dab tsis huv kom zoo tuaj. Txhua txhua hnub mas, Yes Xus yeej ua li ntawd tiag. Nws piav txog Tswv Ntuj lo lus kom sawv daws to taub. Nws ua hwj huam yees ntxwv uas yog lub cim ntawm Tswv Ntuj lub hwj chim loj rau sawv daws pom, ces lawv thiaj ntseeg. Lawv thiaj muaj kev vam khom rau Tswv Ntuj.
Hauv Ntawv Moo Zoo hnub no, Yes Xus kho neeg coob coob, nws kuj kho Xis Moos niam tais thiab. Xis Moos niam tais yog tus piv ntxwv ntawm cov neeg mob Yes Xus tau kho. Thiab Xis Moos niam tais kuj ua tus piv ntxwv rau peb sawv daws thiab, yog hais thaum Yes Xus txav los tuav niam tais txhais tes, tsa nws sawv. Tus mob kub cev cia li thim hlo. Ces nws tsob hwb lawv. Ua ntej Yes Xus yuav mus txog Xis Moos lub tsev. Xis Moos niam tais muaj mob, Yes Xus kho nws, ces nws zoo tuaj. Thaum Xis Moos niam tais zoo lawm ces, nws tsob hwb Yes Xus. Qhov no yog lo lus qhia rau peb sawv daws thiab os kwv tij sawv daws. Ntawm peb lub neej mas, peb tau ntsib Yes Xus. Yes Xus tau kho peb lub siab, nplij peb lub siab kom ntseeg txog Tswv Ntuj. Peb ntsib Yes Xus lawm, ces peb yuav tsum tsob hwb nws. Peb cov ntseeg sawv daws muaj txoj hauj lwm zoo ib yam yog tias peb yuav tsum tsob hwb Tswv Ntuj.
Muaj ib qho tseem ceeb uas Yes Xus qhia peb hnub no yog hais tias tob qab ua ntau yam hauj lwm tiav tas lawm. Yes Xus tsis hnov qab teev Ntuj. Yes Xus tsis hnov qab ua Tswv Ntuj tsaug. Thaum sawv ntxov, thaum tseem tsaus ntuj nti, Yes Xus sawv, nws tawm mus rau ib qho chaw tsis muaj neeg, ces nws teev Ntuj nyob ntawd. Kwv tij sawv daws, ntawm peb mas, peb kuj yuav tsum ua raws li Yes Xus thiab. Thaum sawv ntxov ua ntej peb yuav pib hnub tshiab, peb ua ntoo cuam lub cim, peb nco txog Tswv Ntuj, peb thov Tswv Ntuj foom hmoov zoo rau peb los peb yim neeg. Peb yuav hais 2-3 lo lus luv luv xwb kuj txaus lawm, 2-3 lo lus luv luv kuj yog zaj teev Ntuj lawm. Qhov no yog kev ua neej hauv txoj kev ntseeg txog Tswv Ntuj.
Kwv tij zoo nyiam sawv daws, ntau zaus mas peb kuj yog ib yam li cov neeg muaj mob cov neeg raug dab uas peb xav ntsib Yes Xus. Peb yuav tsum nhriav Yes Xus kom Yes Xus tau kho peb kom dim ntawm kev mob kev nkeeg, dim ntawm kev txhaum kev tsis zoo. Vim tias yog Tswv Ntuj tib leeg xwb thiaj muaj hwj huam kho tau tus mob thiab tus dab. Qhov tseem ceeb yog tias peb yuav tsum nrhiav kom tau nws, peb yuav tsum nrhiav kom ntsib nws. Hnub no mas, peb puas tau nrhiav Tswv Ntuj, peb puas tau hu txog Yes Xus lub npe?
