ZAJ NYEEM HNUB TIM 7 LUB 9 HLI 2025
HNUB CHIV LIS PIAM 23 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 14: 25-33)
Nyob zoo…
Kwv tij zoo nyiam sawv daws, hnub no yogh nub chiv lis piam 23 lub caij nyob nrub xyoo. Hauv lub Moo Zoo hnub no, Huab Tais Yes Xus muaj ob peb lo lus hais rau cov xav raws nws qab. Lus Kas qhia peb paub tias muaj neeg coob coob xav nrog Huab Tais Yes Xus taug kev. Lawv xav mloog nws hais lus, lawv xav mloog nws lo lus qhia, lawv xav pom nws ua hwj huam yees ntxwv, nws yuav ua dab tsi, lawv kuj xav ua raws. Tiam sis, hnub no, Huab Tais Yes Xus caw lawv kom ua ib yam tsis yooj yim kiag li. Huab Tais Yes Xus hais tias, “Leej twg los raws kuv, yog nws tsis nyiam kuv dua nws niam nws txiv, nws poj niam me nyuam, nws cov kwv tij thiab cov muam, thiab yog nws nyiam nws txoj sia dua kuv, mas tus ntawd ua tsis tau kuv thwj tim.” Tsis tas li ntawd, Huab Tais Yes Xus tseem hais ntxiv tias: “Nej kuj zoo ib yam li ntawd, nej leej twg tsis tso nws lub cuab tam tseg, nws ua tsis tau kuv thwj tim.”
Kwv tij zoo yiam sawv daws, nej hnov Huab Tais Yes Xus hais li no, ces nej xav li cas? Nej xav tias nej ua puas tau? Qhov tiag mas, Huab Tais Yes Xus lo lus no tsis txhais tias nws yuav peb kom xaiv Tswv Ntuj lo peb tsev neeg. Nws tsis yuam peb kom nyiam nws thiab tso peb yim neeg pov tseg. Nws tsis txhais li ntawd. Huab Tais Yes Xus lo lus qhia loj yog kev sib nyiam sib hlub. Li ntawd, nws tsis qhia kom peb tsis nyiam peb yim neeg tsev neeg. Qhov tiag mas, Huab Tais Yes Xus piv kom peb kom meej tias qhov tseem ceeb tshaj plaws ntawm peb lub neej, ntawm peb txoj kev ntseeg yog Tswv Ntuj. Nej nco puas tau “Koj yuav tsum nyiam koj tus Huab Tais tas siab tas ntsws, tas koj lub siab, tas koj tus tsuj plig, thiab koj yuav tsum nyiam luag tej zoo xws li koj nyiam koj.” Nej puas pom, Tswv Ntuj los ua ntej. Koj yuav tsum nyiam Tswv Ntuj ua ntej, ces koj nyiam koj niam koj txiv, koj cov kwv tij neeg tsa.
Nyiam Tswv Ntuj dua lwm yam txhais tias koj yuav tsum ua lub neej hauv txoj kev hlub mus tas ib txhiab ib txhis. Koj yuav ntseeg Ntuj thiab ua raws li Nws lo lus qhia mus txog hnub kawg ntawm yus txoj sia tu. Yus ntseeg Ntuj lawm ces, yus tsis ua xyem xyav. Yog koj nyiam Tswv Ntuj dua lwm yam, koj tsis tso Tswv Ntuj lo lus qhia pov tseg. Thov kom peb ua siab loj hauv txoj kev ntseeg. Thov Tswv Ntuj pab peb kom raws nws qab mus tas ib txhiab ib txhis.
Nyob zoo sawv daws.
