Qhib siab. (Be Opened!)
Ntawv Moo Zoo hnub no yog tsab ntawv Moo Zoo uas kuv nyiam tshaj, yog qhov txhawb kuv txoj kev xav thiab yog Yes Xus ib zaj hwj huam yees ntxwv. Kuv xav tias Yes Xus yog tus ua hwj huam yees ntxwv thiab yog qhov tseeb uas yuav tsum lees txais. Yes Xus yog tus tshaj qhov tseeb txog Tswv Ntuj, thiab nws tuag nyob saum Ntoo Cuam. Kuv xav tias yog qhov nyuab uas peb tsis kam lees txais tias Yes Xus yog tus ua hwj huam yees ntxwv. Yog tias koj coj thiab ntseeg raws ntawv Moo Zoo, mas koj yuav lees txais yam Yes Xus ua.
Yes Xus puas yog ua kom lwm tus pom los yog ua kom luag qhuas tias nws muaj peev xwm heev ? Tsis yog li ntawd. Yes Xus yog lub Cim ntawm Tswv Ntuj uas ntsia tsis pom raws li Leej Ntshiab Paj Lug tau hais tseg. Yes Xus yog tus sawv cev cov His Xas Lais tus Tswv Ntuj uas ntsia pom. Li ntawd, tsis hais Yes Xus yuav ua dab tsi thiab hais dab tsi, Yes Xus kuj yog tus sawv cev zim txwv no rau lub ntiaj teb. Tswv Ntuj yog leej twg thiab Tswv Ntuj zoo li cas. Tswv Ntuj xav tau dab tsi ntawm lub ntiaj teb ? Tswv Ntuj xav kom yam nws tsim uas ploj mus lawm rov zoo txhij zoo txhua.
Nyob hauv Ntawv Ntshiab thiaj hais tias : kev txhaum tsis yog raug peb xwb raws li ntawv Hauv Paus hais. Tsis yog teeb meem ntawm tib neeg xwb, kev txhaum yog teeb meem ntawm txhua yam uas tsim tawm. Txhua yam kev tsim tawm yog kev txawj sib zam thiab sib yoog. Li ntawd, kev cawm ntawm Tswv Ntuj tsis yog taw mus rau tib neeg xwb, nws tseem taw mus txog txhua yam uas yog ntuj tsim thiab. Yes Xus tuaj kho cov neeg mob, peb yuav nco txog Yas Ves uas yog cov His Xas Lais tus Tswv Ntuj, tus yuav cawm tas txhua yam Tswv Ntuj tsim rov los. Yes Xus xav coj kev thaj yeeb thiab kev kho mob tuaj rau peb, thiab nws kuj txuag kev tsim tawm kom nthuav dav.
Tam sim no peb mloog nyob hauv ntawv His Xais hais tseg tias :
“Nov yog koj tus Tswv Ntuj, nws yuav nqes los txiav txim thiab yog tus yuav cawm koj los cuag Tswv Ntuj.”
Lo lus hais tias cawm, yog txhais tias kho los yog txuag. Yes Xus nqes los kom tau txuag koj los yog kho koj. Tus neeg dig muag yuav rov pom kev, tus neeg lag ntseg yuav rov hnov lus. Tus tuag ceg yuav dhia cuag muas lwj thiab tus nplaig txhav yuav hu nkauj lom zem. Li ntawd, Yes Xus tsis yog ib tug nyob hauv cov tshaj lub Moo Zoo xwb, tab sis Yes Xus yog cov His Xas Lais tus Tswv Ntuj. Yes Xus yuav ua kom yam no tshwm sim nyob hauv nws txoj kev ua hauj lwm.
Kuv yuav nres ib pliag kom tau ua lub voj voog nyob ntawm no. Zaj no yog kev nthuav txog zaum tom ntej. Koj yuav xav tias yog zaj tseeb, ua cas Yes Xus tsis kho txhua tus neeg uas muaj mob ? Ua cas Yes Xus tsis kho txhua tus neeg dig muag thiab txhua tus neeg lag ntseg ? Vim li cas Yes Xus tsis ua kom txhua tus neeg tuag ceg dhia tau cuag muas lwj ? Tab sis saib zoo li His Xas Lais tus Tswv Ntuj pib ua tej yam loj los ntawm qhov me me. Koj saib cov noob Tswv Ntuj tseb, nws yog cov noob me me tab sis txawj loj hlob. Koj yuav xav tias Yes Xus yog tus tseb noob, cov noob yuav loj hlob los ntawm lub Koom Txoos uas yog txoj kev cawm. Yog lawm, Yes Xus kho cov neeg dig muag, cov lag ntseg thiab qee tus neeg tuag ceg. Qhov no yog qhov pib ntawm Yes Xus txoj kev kho ntiaj teb neeg. Yes Xus lub chaw nyob yog lub Koom Txoos.
Yes Xus kho tas txhua tus neeg thiab vim li cas zaj no thiaj raug nthuav tawm nyob hauv ntawv Moo Zoo. Zam ntawv Moo Zoo hais tias : “Yog kuv qhia koj tas txhua yam uas Yes Xus ua, mas tas cov ntawv nyob tas ntiaj teb yuav tsis zoo dab tsi.”
Tas txhua yam Yes Xus tau ua yog qhov tseeb thiab yog zaj tseeb uas tshwm sim. Yes Xus yog tus kho mob tiag tiag thiab qee yam yog thawj pab neeg ntseeg hais tias : yog yuav hais kom dav dua ntawd, mas yog kev kho fab ntsuj plig thiab kuv kuj xav tias yog qhov tseem ceeb.
Lawv coj ib tug neeg lag ntseg thiab nplaig txhav tuaj cuag Yes Xus. Lawv thov kom Yes Xus tsa tes rau saud. Qhov no yog ib lub Cim zoo qhia txog Tswv Ntuj txoj kev hlub neeg. Kev qaug los yog kev ntog, thov koj mus saib nyob hauv ntawv Hauv Paus zaj 3, ces koj yuav pom txog qhov tseeb hauv kev ntog. Nws yog tshwm sim nyob hauv lub caij tib neeg tsis mloog Tswv Ntuj lus. Koj yuav mus saib nyob hauv ntawv Hauv Paus zaj 11, ces koj yuav hnov hais txog Has Nplas Has hnov Tswv Ntuj lub suab hu. Nws yog Tswv Ntuj txoj kev cawm thiab peb yuav paub txog qhov Has Nplas Has hnov Tswv Ntuj lub suab. Qhov ntawd tseem qhia peb tias muaj qee leej lawv hnov Tswv Ntuj lub suab tob dua ntawd. Yog lub suab hu kev ncaj ncees thiab kev ua raws Tswv Ntuj lub hom phiaj nyob hauv ntiaj teb lub suab hu. Yog lub suab hu peb kom ua neeg nplua nuj, muaj hwj chim, muaj kev kaj siab thiab kev ua tiav log. Has Nplas Has yog tus nyob hauv ntiaj teb txoj kev kub ntxhov, nws thiaj hnov Tswv Ntuj lub suab hu. Thaum ntawd cov His Xas Lais thiaj tshwm sim ua ib haiv neeg. Peb yuav saib nyob hauv tas cov thawj coj His Xas Lais, txij Mais Xes mus txog Yos Xuas, His Xais thiab Yes Les Mias mus txog Das Vis thiab Xas Muas. Tas cov thawj coj uas peb hais no lawv yog leej twg ? Yos Nas kuj yog ib tug uas tau hnov Tswv Ntuj lo lus, nws tau hnov lub suab siab dua thiab nws muab siab rau. Tswv Ntuj hu Xas Muas thaum nws tseem yau thiab nws xav tias yog Es Lias. Nws tau muab siab rau thiab txog qhov kawg nws thiaj pib nkag siab Tswv Ntuj cov Lus.
Peb yuav los saib nyob hauv Txoj Cai Ob zaj 6. Cov His Xas Lais nej yuav mloog Tswv Ntuj tib leeg xwb. Cov tsis hnov Tswv Ntuj lub suab hu yog leej twg ? Lawv yog cov His Xas Lais thiab tas ib zeej tsoom neeg. Yog tias koj tsis hnov lub suab hu uas yog, mas koj kuj hais tsis yog.
Tus neeg lag ntseg hauv nruab thiab, nws tsis tuaj yeem hnov lus tau, nws tsis hnov qhov yog. Yog koj tsis tau hnov Tswv Ntuj cov Lus, koj tsis tuaj yeem hais tau qhov tseeb thiab koj kuj yuav piav tsis tau txog Tswv Ntuj. Tus neeg lag ntseg thiab tsis hnov lus, nws kuj yuav tshaj Tswv Ntuj lub Moo Zoo tsis tau. Nws tsis tuaj yeem qhia Tswv Ntuj cov lus rau lwm tus neeg. Tab sis yog koj hnov Tswv Ntuj cov Lus, mas koj yuav qhia tau rau luag tej kom paub txog Tswv Ntuj. Feem coob cov neeg lag ntseg thiab cov neeg ruam, mas lawv tsis hnov Tswv Ntuj cov Lus thiab lawv piav tsis tau. Thov kom peb txuas nrog Yes Xus, peb muab siab rau mloog thiab qhib siab, ces peb yuav hais tau Tswv Ntuj cov Lus meej thiab peb yuav hnov qhov tseeb.
Thov Tswv Ntuj foom hmoov zoo rau nej sawv daws
