Tus tswv zov yaj tuaj txog lawm. (The Shepherd is with us)
Cov phooj ywg zoo nyiam sawv daws ! Hnub no kuv yuav hais txog Yes Les Mias, vim kuv xav nyeem lub Moo Zoo. Tab sis kuv xav tig rov mus rau kev nyeem Paj Lug cov tsab ntawv, vim tias nws yog qhov pom kev ntawm txhua txhua lub ntsiab lus.
Li ntawd, nyob hauv Yes Les Mias, peb kuj ntsia pom ib kab lus uas koj tuaj yeem pom nyob hauv lwm tus yaj saub ib yam. Koj yuav pom lo lus ntawd nyob hauv cov Nkauj Paj Nruag. Tiag tiag mas nyob tas hauv phau ntawv Cog Lus Qub, yog hais txog Tswv Ntuj lub tswv yim saib xyuas nws pab yaj.
Thaum Yes Les Mias tab tom tshaj Tswv Ntuj cov lus, Tswv Ntuj hais li no :
“Nej cov ua tswv zov yaj nej txoj hmoov phem, vim nej ntxias dag thiab nej ua kom kuv cov yaj nyob hauv lub tshav zaub mos tawg tas.”
Li ntawd, His Xas Lais tus Tswv Ntuj thiaj tsawm cov zov yaj uas yog Tswv Ntuj haiv neeg. “Koj tau ua kuv pab yaj tawg tas thiab koj ntiab lawv khiav.” Yog koj xav tau tus tswv zov yaj ua tus coj nws pab yaj, mas cov His Xas Lais muaj tus coj thiab cov vaj tsis zoo. Das Vis ua vaj thiab tus vaj Xas Los Moos tau ua ntau yam phem. Tab txawm yog cov His Xas Lais tus vaj, tsis kav kuj ua txhaum. Yog ua raws ob tug vaj ntawd, koj yuav pom tias cov vaj ntawd lawv tsis ncaj ncees thiab ua phem. Li ntawd, cov yaj saub thiab tus sau Nkauj Paj Nruag thiaj yws yws txog kev saib xyuas His Xas Lais cov yaj yuam kev. Tswv Ntuj hais li cas ? Tswv Ntuj hais tias :
“Kuv yuav sau tas kuv cov yaj seem uas raug ntiab tawm ntawm thaj av no, thiab coj lawv rov los nyob hauv lub tshav zaub mos.”
Tswv Ntuj yuav nqes los ua tus tseem tswv zov yaj hauv cov His Xas Lais. Tswv Ntuj tau pub lub caij nyoog rau ntau leej neeg ua tus tswv zov yaj, tab sis lawv tsis txawj coj. Li ntawd Tswv Ntuj thiaj yuav nqes los ua tus tswv. Peb kuj pom ib yam zoo li ntawd nyob hauv Es Xes Kias. Nws xav txog Tswv Ntuj pab yaj uas tawg tas nyob saum roob, thiab nws yws cov tswv zov yaj tias lawv ua phem.
Tswv Ntuj hais tias : “Kuv yuav nqes los saib kuv haiv neeg.” Qhov ntawd yog kev cia siab ntawm Tswv Ntuj yuav ua vaj saib xyuas nws haiv neeg. Tab sis qhov no yuav tshwm sim tau li cas ? Kuv yuav tsa lawv ua tus tswv saib xyuas lawv, kom lawv tsis txhob ntshai thiab txhob ceeb ntxiv mus. Lawv yuav tsis muaj ib tug ploj li.
Tswv Ntuj thiab cov vaj nyob hauv Das Vis caj ces yuav ua hauj lwm ua ke, kom tau saib xyuas Tswv Ntuj haiv neeg. Rhais ruam mus tom ntej los ntawm Yes Les Mias uas yog ib lub caij raug txim nyob Npas Npis Los kwv yees 587 xyoo ua Yes Xus ntej. Dhau mus lawm yuav luag 600 xyoo, peb kuj pom lub cev uas nws txawv thiab txaus txhawj tshwm sim nyob saum cov roob Nkas Lis Lais. Xws li cov Thwj Tim los sib sau ua ke nrog Yes Xus thiab lawv tham txog ntau yam lawv yuav ua. Yes Xus thiaj xa nws cov Thwj Tim mus tshaj Tswv Ntuj cov lus. 12 tug Thwj Tim yog hais txog 12 lub xeem ntawm cov His Xas Lais. Peb tau hnov tias muaj txhua txhia haiv neeg ri mus nyob thoob ntiaj teb. Yes Xus yog qhov ntxim siab ntawm txhua lub xeem uas cov His Xas Lais sib sau ua ke. Muaj neeg coob coob mus los nyob ntawd thiab lawv tsis muaj txhiam xws noj, lawv thiaj mus rau ib lub nras tiaj. Thaum Yes Xus nqes ntawm lub nkoj los, nws pom muaj ib pab neeg coob coob thiab nws khuv leej lawv.
Li ntawd, 12 lub xeem ua kom lawv nco txog thiab lawv tuaj cuag Yes Xus. Cov neeg coob coob no, yog hais txog tas ib zeej tsoom.
Cov His Xas Lais khiav tuaj cuag Yes Xus, zoo li lawv paub tias tus tswv zov yaj tuaj txog lawm. Lawv zoo li cov yaj uas tsis muaj tus tswv zov. Yes Les Mias thiab Es Xes Kias ib txwm hu lawv zoo li ntawd. Kuv yuav tuaj ua tus tswv zov kuv haiv neeg thiab kuv yuav ua txhua yam los ntawm Das Vis caj ces. Tus neeg no yog leej twg ? Yes Xus yog leej twg ? Luag hu Yes Xus ua Das Vis leej tub. Yes Xus tuaj kom tau sau tas haiv His Xas Lais los ua ke. Yog thaum cov His Xas Lais sib sau tau ua ke lawm, mas lawv kuj yuav sau tas ib zeej tsoom neeg nyob thoob qab ntuj los ua ke thiab.
Peb yuav saib nyob hauv zaj nyeem ob, uas yog tsab ntawv Paj Lug sau mus rau ntseeg nyob Es Fes Xos. Xauv yog tus tiv thiab hiam lub Koom Txoos, tab sis Yes Xus yees tawm tuaj nyob ntawm Xauv xub ntiag thiab nws hais tias :
“Vim li cas koj thiaj hiam kuv ?” Vim cov xwm no tshwm sim tuaj zoo li ntawd, ces Xauv thiaj rais ua Yes Xus ib tug Thwj Tim, nws yog Paj Lug.
Paj Lug hais tias Yes Xus yog tus tswv zov yaj ntawm tas txhua haiv neeg. Nws yuav tsoo sab phab ntsa zeb ntawm cov His Xas Lais thiab cov pej kum neeg. Nws yuav sau tas ib tsoom neeg nyob thoob ntiaj teb los ua ke. Dhau ntawm peb cov txhaum lawm, peb pom dab tsi nyob hauv Yes Xus cov ntshav ? Peb cov txhaum ua kom Yes Xus tuag nyob saum ntoo cuam. Nws raug tsim txom thiab raug luag ntsia nyob saum ntoo cuam, ua kom neeg cov txhaum tawm los. Yog kev phem, kev ntxub ntxaug, kev lim hiam thiab kev tsis ncaj ncees. Thaum luag xuas hmuv nkaug Yes Xus hauv siab, mas nws cov ntshav ntws tawm los, ces peb pom peb cov txhaum nyob hauv Yes Xus cov ntshav. Tab sis kom peb nco ntsoov tias Yes Xus cov ntshav, yog cov ntshav pub txoj sia thiab yog cov ntshav daws tas ntiaj teb neeg cov txhaum. Yes Xus raug tsim txom thiab raug ntsia nyob saum ntoo cuam, tsis kav nws tseem thov kom Tswv Ntuj zam txhaum rau ntiaj teb neeg. Yes Xus hais tias : “Txiv ! Thov koj zam txhaum rau lawv, vim lawv tsis paub tias lawv tab tom ua dab tsi.” Tom qab Yes Xus sawv rov los, nws kuj hais rau cov neeg muab nws tua tias : “Salom, nej nyob kaj lug !”
Peb txhua leej txhua tus tau txais kev cawm los ntawm Yes Xus cov ntshav. Yes Xus cov ntshav npog tas nrho peb, thiab peb tsis muaj ib tug khiav dhau. Thaum Yes Xus sawv rov qab los, cov Thwj Tim thiaj nkag siab tias : tus tswv zov yaj uas Yes Les Mias thiab Es Xes Kias tos ntshis nws tuaj txog peb lawm, nws yog Yes Xus. Tam sim no Yes Xus tau ua txhua yam tiav tas nyob hauv nws cov ntshav ntawm ntoo cua. Nws yog tus tseem tswv zov yaj, nws tuaj txog peb lawm. Peb yuav raws nraim nws qab thiab tsis nrug nws mus li. Thov Tswv Ntuj foom hmoov zoo rau nej
