Txhim lub Koom Txoos nyob saum pob zeb. (The church is build on the rock)
Kwv tij Hmoob sawv daws ! Hnub no peb muaj lub sij hawm los zaum twj ywm xav txog 2 tug Leej Ntshiab loj. Xws li Leej Ntshiab Pob Zeb thiab Leej Ntshiab Paj Lug.
Yog 2 tug Leej Ntshiab uas yog tus cag hauv peb lub Koom Txoos. Kuv tsis tuaj yeem nco txog Leej Ntshiab Pob Zeb thiab Leej Ntshiab Paj Lug, yam tsis xav txog Los Mas thiab kev loj hlob ntawm Los Mas. Sim xav txog daim duab tias Los Mas muaj hwj chim kawg thaum nws kav lub ntiaj teb uas peb paub, kwv yees li xyoo 60. Muaj ib tug txiv neej 30 tawm xyoo tau mus hauv lub nroog no. Nws lub npe hu ua Xis Moos, Zam tus tub. Nws yog ib tug neeg puav ntses nyob hauv lub xeev Nkas Lis Lais. Lub nroog no yog qhov chaw tsis muaj dab tsi hlo li, thiab nws yog tus neeg tsis muaj dab tsi li nyob hauv lub nroog no. Tab sis nws tuaj hauv lub nroog, vim nws yog Yes Xus Nas Xas Les phooj ywg. Nws tau paub Yes Xus thiab hnov hais txog Yes Xus. Nws nto npe tias yog Kefa hauv xeem lus Aramaic, los hu ua Pob Zeb hauv xeem lus Hes Laas, Petrus hauv xeem lus Latin. Li ntawd, thiaj hu nws ua Pob Zeb, los Xis Moos uas yog Zam tus tub.
Tus Hauv Paus Xa Lus Pob Zeb mus hauv lub nroog Los Mas, kwv yees ze ntawm xyoo 60. Nws tau hnov lub moo yam tsis txaus ntseeg tias; tus Yes Xus ntawm lub nroog Nas Xas Les raug Pis Las Tos tus thawj tswj xeev Los Mas tua tuag yam txaus ntshai kawg. Tab sis Tswv Ntuj tau tsa Yes Xus sawv hauv qhov tuag rov los lawm.
Tus Yes Xus Nas Xas Les no tau ua vaj kav lub ntiaj teb zim txwv no. Nws yog tus tsim nyog tau txais kev ua ib tug nom loj uas tsis yog Caesar, tab sis nws yog Yes Xus. Xis Moos mus Los Mas vim lub moo ntawd. Lawv xav tias nws nyob hauv ib thaj tsam uas zim txwv no txaus ntseeg nyob Los Mas. Tam sim no thaj chaw ntawd muaj cov tsev muag zaub mov noj nyob puv nkaus. Yog qhov chaw hu nkauj lom zem yav hmo ntuj. Yog qhov chaw muaj txhua yam raws txheej tshiab nyiam thiab yog ib feem ntawm kev ncig tsham nyob Los Mas. Yav thaud yog qhov chaw cov Yus Das nyob.
Li ntawd, Xis Moos tau mus txog qhov chaw ntawd lawm. Cov Los Mas pom tias nws cov lus ntxim ntxub thiab meem txom heev. Txog rau xyoo 64, tej zaum ntshe yog tim qhov tus vaj Nero’s kub hnyiab thiab nws tab tom nrhiav tus neeg los theej txhoj, ces lawv thiaj ntes nws thiab coj nws rov mus dua. Tej zaum yog txij ntawm lub nroog Trist mus rau pab neeg ua yeeb yam tsiaj ntawm tus vaj Nero’s. Ntawd tsis yog pab neeg ua yeeb yam tsiaj Maximus, nws yog pab neeg ua yeeb yam tsiaj uas loj tab sis me dua. Pab neeg ua yeeb yam tsiaj no teeb nyob ntawm ntug nroog ze lub roob Vas Tis Kas. Yog nyob ntawm lub ntug nroog Los Mas qub. Nyob ntawd muaj ntau yam kev ua si lom zem, tab sis lawv kuj muab cov neeg tub sab tua ua kev lom zem rau ib tsoom neeg thiab. Tus Hauv Paus Xa Lus Pob Zeb raug ntsia nyob saum ntoo cuam nyob ntawd. Raws keeb kwm piav rov mus rov los thiab kuv pom tias zaj no txaus ntseeg kawg, vim nws txawv heev. Kuv xav tias zaj no raug sau tseg, vim nws yog zaj meej tseeb tiag.
Nyob nruab nrab hauv pab neeg ua yeeb yam tsiaj ntawm tus vaj Nero’s, yog tus pej thuam Obelisk ntawm cov Hais Nkws Tos, uas tseem ntsia pom txog niaj hnub nyem no. Nyob nruab nrab ntawm qhov uas zim txwv no hu ua lub vaj loog Leej Ntshiab Pob Zeb, tus vaj Nero’s tuag nyob ntawd thiab txiav tu nrho ntawm ntoo cuam. Dhau ntawd nws raug thau tawm los ntawm pab neeg ua yeeb yam tsiaj mus rau lub toj ntxas me me nyob saum lub roob Vas Tis Kas thiab raug faus nyob ntawd. Sim xav txog daim duab tias muaj neeg tab tom saib qhov ntawd kws yees xyoo 64, lub caij tus vaj Los Mas tab tom nto koob meej. Nyob ntawm sab phab ntsa ntug nroog sab nraud, tus txiv neej uas khuv leej no, nws yog neeg ntes ntses nrab neeg uas hmoov phem ntawm lub nroog tsis muaj dab tsi li. Nws raug tua tuag yam txom nyem ntsuav thiab raug faus tseg. Leej twg los puav leej hais tias:
“Tus neeg tais caus uas raug cov Los Mas lub hwj chim rhuav tshem. Los Mas yuav nyob mus ib txhiab ib txhis. Tsis hais tus txiv neej ntawd yuav nyob khov kho vim dab tsi kuj xij, yam ntawd yuav tsis nyob. Leej twg raug hnov qab mus ntev lawm.”
Lo lus nug yog tus vaj Los Mas nyob qhov twg? Nws ploj mus dua twg lawm? Tus hloov tus vaj Nero’s nyob qhov twg? Tsis muaj nyob tiag, dab tsi uas tseem tshuav nyob ntawm Circus Maximus, Colosseum, Forum thiab Palatine Hill? Dab tsi tseem muaj nyob? Tej vaj tse puas ntsoog thiab lub ceeb tsheej ntawm Xis Moos nyob qhov twg? Nws nyob txhua qhov chaw thoob ntiaj teb. Txij qaum teb mus txog qab teb, txij hnub tuaj mus txog hnub poob, hauv txhua xeev ntuj. Txhua qhov chaw uas koj ntsia mus thoob ntiaj teb. Lub Cim ntawm lub teb chaws uas tshaj tawm los ntawm tus Hauv Paus Xa Lus Pob Zeb thiab tus hloov nws nyob qhov twg? Kuv xav txog zaj no ntev kawg thaum kuv nyob ntawd. Tus sawv Nero’s chaw uas tuag mus lawm tsis muaj tiag. Tus sawv Pob Zeb chaw, kuv pom nws ntawm kuv lub zeem muag tawm los ntawm lub tsev teev Ntuj Leej Ntshiab Pob Zeb ib sab uas txhim nyob ntawm qhov chaw lawv faus nws xyoo 64 AD. Ntawm lub sam thiaj tsev teev Ntuj ntawd, tshwm Leo 1 lub npe, tus tim 14 uas yog tus sawv Pob Zeb chaw tim 266 hauv lub Koom Txoos. Nws yog Pob Zeb tas mus li.
Nyob hauv tsab Ntawv Moo Zoo hnub no, kev tsuj xeeb Pob Zeb thiab Paj Lug, peb muaj tsab Ntawv Moo Zoo uas pom nyob hauv Mas Tais ntawv Moo Zoo.
Yes Xus hais tias: “Nej puas paub ib zeej tsoom hais tias kuv yog leej twg?”
Qee leej hais li no, qee leej hais li ntawd. Tab sis koj ne, koj hais tias kuv yog leej twg? Xis Moos, Zam tus tub yog tus hais tias :
“Koj yog Yes Xus Pleev. Koj yog Tswv Ntuj tus muaj txoj sia Leej Tub.” Vim koj hais li no, mas koj yog Kefa thiab yog Pob Zeb. Nyob saum lub pob zeb no, kuv yuav txhim kuv lub Koom Txoos. Ntuj txiag teb tsaus lub rooj vag yuav kov tsis yeej nws. Yuav tsis muaj leej twg hauv xyoo 64, uas nyob hauv plawv nroog Los Mas thiab tus vaj Los Mas hais tias; tsis muaj dab tsi yuav rhuav tus vaj loj no tau. Ntev los lawm uas tus vaj cov yeeb ncuab tau rhuav tshem nws.
Dab tsi ua kom lub Koom Txoos piam sij? Tsis muaj dab tsi ua kom nws piam sij tau, vim nws txhim nyob saum pob zeb. Kuv pom lub tsev teev Ntuj uas txhim yog daim phiaj ntxa uas zoo nkauj tshaj nyob ntiaj teb no, thiab yog tus cag zeb ntawm Pob Zeb txoj kev ntseeg. Muaj tseeb tiag uas ntuj txiag teb tsaus lub rooj vag yuav kov tsis yeej nws, tab txawm muaj ntau yam xwv txheej nce nce nqis nqis thiab kev nyiag noj nyiaj ntawm qee tus thawj coj thiab kev txhaum ntawm cov tim xyoob. Nws muaj txhua yam li hais no nyob ntawm no. Tus hloov Pob Zeb chaw, kuv nyuam qhuav pom nws yog lub cev nqaij muaj txoj sia, ua pa tau thiab txawj luag.
Kuv thov hais rau koj puas tau tias; nyob ntawm no muaj qee yam uas yog qhov tseeb thiab piav tsis tau. Nov tsis yog lam xav hais txog tus piv txwv, tsis yog lam ua tej phau ntawv zoo, tsis yog los ntawm Yes Xus cov lus mus txog qhov kuv pom nyob Los Mas ob peb hnub dhau los. Peb tuaj yeem rov qab mus nug tau. Nov yog lo lus nug.
Kuv thov hais txog ib tug txiv neej uas yog tus txhawb siab rau peb tus Vaj Qhia tshiab uas yog tus tim xyoob. Nws yog Leej Ntshiab Aus Nkus Tis Nus nyob Hippo. Aus Nkus Tis Nus sau ib phau ntawv ntev los lawm, phau ntawv ntawd lub npe hu ua Tswv Ntuj lub nroog Um. Nws hais tias muaj ob lub nroog loj. Tib neeg lub nroog yog los ntawm kev nyiam tus kheej. Lub Cim tseem ceeb ntawm nws yog kev siv lub hwj chim, thiab kuj muaj Tswv Ntuj lub nroog. Tswv Ntuj lub nroog yog los ntawm kev pub dawb. Phau ntawv no yog los ntawm kev nyiam kev hlub uas muaj rau Tswv Ntuj. Lub hauv paus ntawm kev tsis ua phem thiab kev zam txim, muaj lo lus nug tseem ceeb uas Aus Nkus Tis Nus tau sau tseg hauv ntau txhiab phab ntawv tias; koj yog neeg nyob lub nroog twg? Koj yuav cog lus nrog tus vaj twg? Koj yog lub nroog twg li pej xeem tiag tiag? Qhov kawg nws xaus rau kev xaiv Tswv Ntuj lub nroog los tib neeg lub nroog. Kuv tsis paub tias qhov twg thiaj yuav ua kom pom txog zaj no tau zoo dua lub nroog Los Mas niaj hnub no. Ib zaug hauv kev piam sij loj ntawm ib lub teb chaws, nws lub Cim muaj nyob txhua qhov. Thiab lub Koom Txoos uas tseem muaj sia nyob no, nws muaj hnub nyoog li 2,000 xyoo. Tus hloov Pob Zeb chaw kuj tseem muaj txoj sia nyob thiab muaj zog khov kho.
Lub nroog twg, tus vaj twg? Ntawd yog tib lo lus nug uas tseem ceeb tshaj.
Kwv tij Hmoob sawv daws ! Hnub no peb tham txog “txhim lub Koom Txoos nyob saum pob zeb” los xaus li no xwb. Niaj hnub thaum nej teev Ntuj, nej yuav nco ntsoov vam txog Leej Ntshiab Pob Zeb thiab Leej Ntshiab Paj Lug los pab nej.
Vim nkawd yog tus cag ruaj khov ntawm lub Koom Txoos Kav Tos Liv.
Thov Huab Tais Yes Xus Pleev lub txiaj ntsim nrog nej nyob, ua nej siab kaj lug.
Lwm zaus peb mam sib ntsib dua, nej sawv daws nyob zoo !
