ZAJ NYEEM HNUB TIM 1 LUB 6 HLI 2026
HNUB NCO TXOG LEEJ NTSHIAB YUS TIS NUS
COV LUS NYOB HAUV MAS KOS NTAWV MOO ZOO (MK 12: 1-12)
Kwv tij Hmoob, hnub no Huab Tais Yes Xus hais zaj paj lug tias muaj ib tug tswv teb txiv cawv, nws muab daim teb tso rau cov tub zog saib. Thaum txog lub caij de cov txiv cawv, tus tswv teb xa cov tub txib mus sau feem uas yog tus tswv tug, tab sis cov tub zog xav tsis ncaj, lawv tsis kam them. Tsis tas li ntawd, lawv tseem muab cov tub txib tua thiab. Qhov kawg tus tswv thiaj li xa nws tus tub mus, los cov cov teb tseem muab tua tuag lawm thiab. Lawv siab phem kawg.
Huab Tais Yes Xus hais zaj paj lug no, yog nws xav hais qhia cov txwj laus Yus Das tias lawv zoo li cov tub zog zov tus tswv daim teb txiv cawv ntag. Thaud, Tswv Ntuj xa cov Yaj Saub tuaj ntuas Tswv Ntuj haiv neeg, tsis kav cov txwj laus tau muab cov Yaj Saub tua; nyem no Tswv Ntuj xa nws Leej Tub tuaj qhia cov Yus Das, tsis kav lawv tseem xav tswv yim yuav muab Tswv Ntuj Leej Tub tua thiab. Txawm li ntawd los, Tswv Ntuj siab zoo, Tswv Ntuj tsis muab txim tam sid rau lawv, Tswv Ntuj tos ntsoov kom lawv tig los yuav siab tshiab. Yog txog qhov kawg, lawv tseem tsis hloov siab tshiab thiab, mas Tswv Ntuj mam txiav raws li lawv cov hauj lwm.
Kwv tij Hmoob, peb muab piv rau peb ntiag tug, peb pom tias muaj ntau zaus peb ua zoo li cov tub zog siab phem no, Tswv Ntuj xav kom peb muab rab peev xwm Tswv Ntuj pub rau peb ntawd los ua hauj lwm pub rau Tswv Ntuj. Tab sis zoo li peb tsis yeem muab rab peev xwm los ua hauj lwm rau Tswv Ntuj, peb saib tias rab peev xwm no yog peb li, peb muab ua hauj lwm nrhiav txiaj ntsim qab hau rau peb xwb.
Peb tsis txhob ua li ntawd, peb yuav tig xav thiab qee los peb rab peev xwm los ua hauj lwm tsob hwb Tswv Ntuj thiab peb cov kwv tij, txog hnub kawg peb thiaj tau nrog Tswv Ntuj nyob. Nyob zoo sawv daws.
