ZAJ NYEEM HNUB TIM 1 LUB 8 HLI 2024
HNUB NCO TXOG LEEJ NTSHIAB AS FOOS XOS
COV LUS NYOB HAUV MAS TAIS NTAWV MOO ZOO (MT 13: 47-53)
Kwv tij Hmoob sawv daws, zaj paj lug Huab Tais Yes Xus hais hnub no yog muab Ntuj lub Ceeb Tsheej piv rau lub puav ntses. Thaum peb mus puav ntses los yog ntaus vas hauv ib lub pas dej, mas lub vas yuav sua tau ntau tsav ntau yam; tej zaus tau ntses, tej zaus tau tej tus ceg khaub los nplooj xyoob nplooj ntoos. Muab piv rau Huab Tais Yes Xus lub Koom Txoos mas yog zoo li ntawd; lub Koom Txoos qhib txais txhua tus neeg tsis hais neeg zoo los neeg phem, yog nom los yog qhev, muaj los pluag. Lub Koom Txoos txais sawv daws los saj Tswv Ntuj lub siab hlub thiab khuv leej neeg. Lub Koom Txoos tsis txiav tias tus twg yuav tau koob haum thiab tus twg yuav raug txim. Lub Koom Txoos tsuas pab txhawb sawv daws kom paub txog Tswv Ntuj txoj kev nyiam kev hlub, kom sawv daws muab lub peev xwm los ua neej raws tau lub Moo Zoo ib yam li Huab Tais Yes Xus lo lus tias “Thaum ib tug Kws Ntawv Ntshiab los ua thwj tim hauv Ntuj lub Ceeb Tsheej, nws zoo li ib tug tswv tsev rho tau tej yam qub thiab tej yam tshiab hauv nws lub cuab tam los.”
