ZAJ NYEEM HNUB TIM 10 LUB 2 HLIS 2024
HNUB NCO TXOG LEEJ NTSHIAB KOS LIS TIS KAS
COV LUS NYOB HAUV MAS KOS NTAWV MOO ZOO (MK 8: 1-10)
Cov kwv tij Hmoob sawv daws, Huab Tais Yes Xus muaj ib lub siab hlub thiab khuv leej neeg tas nrho. Tab sis cov thwj tim mas lawv tsis zoo li Huab Tais Yes Xus, lawv tsuas xav txog lawv ntau xwb, ces thaum Huab Tais Yes Xus pom cov neeg raws nws tsis muaj dab tsi noj mas Huab Tais Yes Xus thiaj hais rau cov thwj tim kom nrhiav rau cov neeg ntawd noj. Cov thwj tim teb tias “Qhov chaw no tsis muaj neeg nyob, yuav muab mov qhov twg rau cov neeg ntawd noj kom tsau?”
Cov kwv tij, nyob hauv peb mas muaj ntau zaus Huab Tais Yes Xus hu peb kom pab lwm tus, Huab Tais Yes Xus muab lub cib fim zoo rau peb tau ua hauj lwm tsim hmoov tseg; tab sis zoo li peb tsis to taub pes tsawg ces peb pheej hais tias ‘yuav ua li cas ne?’ los hais tias ‘kuv tsis paub yuav pab nws lost sis pab zoo?’ los nyaj peb yuav hais tias ‘ab! Tsis yog kuv hauj lwm as’.
Peb yeej nyiam ua li hais tiag! Hnub no Huab Tais Yes Xus thiaj xav qhia peb tias kom txhob xav li ntawd ntxiv, vim nyob hauv peb txhua tus mas Huab Tais Yes Xus yeej pub ib yam cia rau peb tau thau los pab cov neeg tuaj vam txog peb.
Huab Tais Yes Xus yuav hais rau peb tias ‘Muab qhov koj muaj thaum los siv mas, koj txhob ntshai tsam tas, koj txhob khuv xim. Koj qee los pub rau lwm tus ces kuv mam ua tus ntxiv rau koj.”
Kwv tij Hmoob, kom peb nco tias ua cas 7 lub ncuav mov thiab ob peb tug ntses xwb ho txaus rauplaub txhiab tawm tus neeg noj.
Yog koj qias dub tsis pub qhov koj muaj rau kuv, yog kuv ntshai tsam tas es kuv tsis thau qhov kuv muaj los rau koj; peb tsis txawj sib faib ces peb muaj ntau npaum cas los yeej tsis txaus. Tab sis yog peb saib kev sib txhawb sib nres, koj ib kuv kuv ib koj mas txawm kuv muaj me me xwb los yuav txaus pub rau koj, koj muaj tsawg tsawg xwb los yeej yuav txaus pub tau rau kuv.
Peb cov neeg ntseeg txog Yes Xus mas peb yuav ua li ntawd, thaum yam peb muaj tawm los sib pub; yam li dag zog, tswv yim, nyiaj txiag, qoob loo, los kev sis nyiam sis hlub.Nyob zoo sawv daws.
