ZAJ NYEEM HNUB TIM 10 LUB 2 HLIS 2025
HNUB NCO TXOG LEEJ NTSHIAB KOS LAS TIS KAS
HP 1: 1-5; MK 6: 53-56
Kwv tij Hmoob sawv daws, nyob hauv lub Moo Zoo hnub no peb pom tias Huab Tais Yes Xus yog cov neeg nyob hauv Nkes Nes Xas Les chaw vam khom; lawv thiaj kwv cov neeg muaj txiab mob tuaj cuag Huab Tais Yes Xus.
Cov neeg mob pw txaj mas hais tau tias lawv lub neej tsis tshuav dab tsi ntxiv li lawm, lawv lub neej nyob hauv qhov tsaus nti. Thaum lawv hnov tias Huab Tais Yes Xus kho tau cov neeg tuag ceg kom rov mus taus kev, kho tau cov neeg mob kom rov zoo tuaj, mas lawv rov muaj kev vam tias lawv yuav rov sawv tau mus kev. Lawv vam khom li ntawd, lawv pom lub teeb ci pom kev nyob hauv lub neej tsaus ntuj nti. Yog li cov neeg mob pw txaj thiaj txhib lawv cov swm neeg kwv lawv mus nrhiav Huab Tais Yes Xus.
Mas Kos piav tias cov neeg ntawd thov Yes Xus kom nws cia lawv kov nws, tab yog kov Yes Xus tw tsho xwb kuj tau. Lo lus no yog txhais tias lawv ntseeg tias Huab Tais Yes Xus muaj hwj huam kho tau lawv tiag.
Peb pom tias lawv vam khom txog Huab Tais Yes Xus, lawv ntseeg txog Huab Tais Yes Xus, ces lawv dim ntawm tus mob. Lawv rov tau ua lub neej nyob hauv qhov pom kev.
Kwv tij, lub Moo Zoo hnub no qhia peb paub tias tus twg vam khom thiab ntseeg txog Huab Tais Yes Xus, tus ntawd yuav txais kev kaj lug.
Niaj hnub no, peb tig ntsia ib ncig peb; tsis hais hauv peb tsev neeg, peb pawg ntseeg, peb lub zos. Peb ntsia saib puas zoo li tab tom yog tus mob pw txaj sawv mus kev tsis taus.
Peb ntsia tus neeg mob pw txaj, peb pom tias nws tsuas muaj khov yuag zuj zus mus, tus mob hnyav zuj zus. Peb pom li ntawd, peb tu siab, peb tag kev cia siab tias nws yuav zoo rov los.
Yog peb saib peb tsev neeg, los peb pawg ntseeg, peb lub zos tas, peb pom tias tab tom zoo li tus mob pw txaj, mas peb yuav paub tias tsis ntev ces peb tsev neeg, peb lub zos, los peb pawg ntseeg yuav maj mam ploj mus zuj zus xws li lub teeb pib qauj lias. Qhov kawg, tsis tshuav dab tsi.
Tab sis Huab Tais Yes Xus yog peb chaw vam khom. Yog nyob hauv peb tsev neeg, sawv daws ntseeg txog Huab Tais Yes Xus; yog nyob hauv peb pawg ntseeg, sawv daws tso siab rau Huab Tais Yes Xus; yog nyob hauv peb lub zos, sawv daws ua raws Huab Tais Yes Xus lus qhia; mas peb yuav ntsib qhov pom kev, kev zoo siab, kev thaj yeeb.
Huab Tais Yes Xus yog peb chaw vam khom. Li ntawd, peb yuav nrhiav Huab Tais Yes Xus xws li cov neeg mob nrhiav kev kom tau txais Huab Tais Yes Xus lub hwj huam cawm lawv.
