ZAJ NYEEM HNUB TIM 13 LUB 2 HLIS 2025
HNUB TSIB, LUB LIS PIAM 5 CAIJ NYOB NRUAB XYOO
HP 2: 18-25; MK 7: 24-30
Kwv tij Hmoob, thaum peb hnov Huab Tais Yes Xus muab tus poj niam Xis Lias Fes Nis Xias piv rau ib tug me nyuam dev mas ntshai muaj ntau leej yuav xav tias ua cas Huab Tais Yes Xus saib tsis taus lwm haiv neeg; Huab Tais Yes Xus saib cov Yus Das xwb thiaj yog neeg, hos lwm haiv mas Huab Tais Yes Xus muab lawv saib qis qis xws li tej tsiaj.
Tsis yog li ntawd. Huab Tais Yes Xus hlub tas nrho txhua haiv neeg nyob hauv lub qab ntuj no.
Yog li ua cas hnub no Huab Tais Yes Xus thiaj hais lo lus tias “Koj cia cov me nyuam noj kom tsau tso, vim yuav muab cov me nyuam cov mov los pub me nyuam dev noj mas tsis zoo.”
Tos Huab Tais Yes Xus hais cov lus li ntawd, vim nws xav hais ib co lus hnyav thiab tsis ntxim mloog kom cov thwj tim ras tau tias tab txawm tus poj niam pej kum neeg uas cov Yus Das muab piv rau tej tsiaj, tsis kav nws ntseeg txog Yes Xus; tsis zoo li cov Yus Das uas lawv cav tias lawv yog Tswv Ntuj haiv neeg tab sis lawv tsis kam lees tias Yes Xus yog Leej Pleev. Huab Tais Yes Xus yog cov mov pub txoj sia uas cov Yus Das tsis xav noj, tab sis cov pej kum neeg tos ntsoov saib cov Yus Das puas yuav muab los pub rau lawv.
Tos Huab Tais Yes Xus hais cov lus li ntawd, vim nws xav sim saib tus poj niam pej kum neeg no puas ntseeg tiag. Yog nws ntseeg mas txawm nws raug thuam npaum cas los nws yuav tsis chim tsis npau taws, nws yuav tsis tso kev ntseeg pov tseg.
Kwv tij, peb pom tus poj niam no ua tib zoo lees tias “Huab Tais, yog li koj hais! Tab sis cov me nyuam dev nyob hauv qab rooj, lawv noj tej tsig mov poob ntawm cov me nyuam neeg los.” Txhais tau tias tus poj niam no txo nws qis tshaj plaws, nws paub tias nws tsis tsim nyog yuav txais Huab Tais Yes Xus tsis kav nws ntseeg txog Huab Tais Yes Xus mas nws thiaj tuaj thov Huab Tais Yes Xus pab nws tus ntxhais.
Tus poj niam Xis Lias Fes Nis Xias cov lus ua rau cov thwj tim feeb thiab ras tias lawv niaj hnub nrog Huab Tais Yes Xus nyob, lawv puas muaj lub siab ntseeg cuag li tus poj niam no.
Kwv tij, Huab Tais Yes Xus hnov nws cov lus ntawd, mas Huab Tais Yes Xus thiaj hais rau tus poj niam no tias “Vim koj hais lo lus no, koj rov mus mog. Tus dab twb tawm hauv koj tus ntxhais lawm.”
Vim tus poj niam no ua neeg me thiab muaj lub siab ntseeg, mas Huab Tais Yes Xus tsis tas yuav mus tom nws tsev, Huab Tais Yes Xus hais lus xwb ces nws tus ntxhais cia li zoo hlo.
Lub Moo Zoo hnub no zoo qhia rau peb cov neeg ntseeg tau txais lub Cim Ntxuav ua Tswv Ntuj cov me nyuam lawm tias peb txhob xav tias “Kuv txais Cim Ntxuav lawm, ces kuv yuav tsis poob rau dab phem teb lawm.” Txhob xav li ntawd, yog peb tsis ntseeg txog Yes Xus mas lub Cim Ntxuav tsis muaj txiaj ntsim dab tsi rau peb.
Peb txhob xav tias “Kuv ntseeg Yes Xus lawm, ces kuv tau txais kev cawm lawm.” Txhob xav li ntawd, yog peb tsis ua neeg me thov kev pab ntawm Huab Tais Yes Xus thiab tsis ua raws li Huab Tais Yes Xus cov lus qhia, mas txoj kev ntseeg tsis muaj qab hau dab tsi rau peb.
Peb txhob ua zoo li cov Yus Das uas lawv hais tias lawv yog Tswv Ntuj haiv neeg, tab sis lawv tsis mloog Huab Tais Yes Xus hais.
