ZAJ NYEEM HNUB TIM 14 LUB 2 HLIS 2025
HNUB NCO TXOG LEEJ NTSHIAB XIS LIS THIAB MES TOS
HP 3: 1-8; MK 7: 31-37
Kwv tij Hmoob, lub Moo Zoo hnub no hais tias Huab Tais Yes Xus mus ntawm Tws Los mus rau lub xeev Des Kas Pos Lis, ces nyob ntawd nws kho tus neeg lag ntseg thiab nplaig txhav.
Des Kas Pos Lis nyob qhov twg?
Lub xeev Des Kas Pos Lis nyob sab hnub tuaj ntawm tus dej Yos Las Das los yog hla lub pas dej Nkas Lis Lais lawm sab tid. Yog lub xeev Huab Tais Yes Xus ntiab cov dab tawm hauv tus neeg raug dab mus nyob hauv cov npua ces cov npua dhia tsag lawm hauv dej ntuj tuag tas. Cov neeg nyob hauv lub xeev Des Kas Pos Lis tsis yog cov Yus Das, mas lawv tsis coj Mais Xes txoj cai thiab txoj kev teev Tswv Ntuj xws li cov Yus Das nyob Nkas Lis Lais thiab Yus Das teb. Yog li lawv txoj kev ntseeg thiaj txawv cov Yus Das, lawv tsis paub txog tus Pleev rws li cov Yaj Saub His Xas Lais tau hais txog. Lawv pom thiab hnov ib tug neeg twg ua hwj huam mas lawv hais tias tus ntawd yog ib tug muaj txuj ci.
Lawv hnov tias Huab Tais Yes Xus kho tau neeg mob kom zoo hlo, mas lawv ntseeg tias Huab Tais Yes Xus yog ib tug neeg muaj txuj ci. Vim li ntawd, thaum Huab Tais Yes Xus kho tus neeg lag ntseg thiab nplaig txhav, nws thiaj tsis hais lo lus xws li nyob hav cov neeg Yus Das, tab sis Huab Tais Yes Xus ua kom lawv pom tias nws kho tus neeg mob li cas.
Mas Kos piav tias Huab Tais Yes Xus muab ntiv tes ntxig rau tus lag ntseg ob lub qhov ntsej, Huab Tais Yes Xus muab aub ncaug pleev tus neeg ntawd tus nplaig, ces Huab Tais Yes Xus tsa muag ntsia saum ntuj thiab xyu ib suab tias “Koj qhib los.”
Huab Tais Yes Xus ua xws li tus neeg muaj txuj ci tab tom ua hwj huam; yam li cov txiv khawb koob thaum lawv tshuab khawv koob kho neeg.
Huab Tais Yes Xus xyu ib suab vim nws pom tus lag ntseg mas nws nco txog cov Yus Das tsis kam mloog nws cov lus; lawv zoo li lag ntseg lawm.
Thaum Huab Tais Yes Xus hais tias “Koj qhib los” mas tus lag ntseg ob lub qhov ntsej qhib hlo, cov hlua khi nws tus nplaig kuj plam nplaws.
Kwv tij Hmoob, raws li peb paub mas tos tus neeg ruam piav tes los nplaig txhav vim tias nws pob ntseg tsis hnov, ces nws qog tsis tau neeg lub suab lus. Yog li thaum tus lag ntseg hnov lus lawm, mas nws yuav xyaum yoog neeg lub suab ces nws yuav maj mam hais lus tau meej tuaj.
Zoo ib yam li tus neeg ntseeg Huab Tais Yes Xus, mas nws kuj yuav mloog Huab Tais Yes Xus, ces nws yuav tshaj cov lus nws hnov rau lwm tus tau paub. Xub thawj mas nws yuav hais tau tsis ntxaws piav tau tsis meej, tab sis ntev mus nws yuav hais tau ntxaws piav tau meej cov lus nws tau hnov.
Kwv tij, hnub no peb hnov lub Moo Zoo hais txog Huab Tais Yes Xus kho tus lag ntseg nplaig txhav no lawm, xav tias peb yuav tau qhib peb lub siab txais Huab Tais Yes Xus, qhib peb lub pob ntseg mloog Huab Tais Yes Xus, qhib peb lub tswv yim paub Huab Tais Yes Xus, qhib peb lub qhov muag pom Huab Tais Yes Xus, thiab qhib peb lub ncauj tshaj txog Huab Tais Yes Xus mog.
