HNUB TIM 15 LUB 11 HLIS; HNUB NCO TXOG LEEJ NTSHIAB AWS NPAWS
COV LUS NYOB HAUV LUS KAS NTAWV MOO ZOO (LK 17: 26-37)
Kwv tij Hmoob sawv daws, cov lus Huab Tais Yes Xus hais hauv hnub no mas yog nws tab tom hais txog ‘Neeg Leej Tub’ lub zim txwv, los yog Huab Tais Yes Xus lub caij. Yam li lub caij Huab Tais Yes Xus yuav tuag, thiab lub caij Huab Tais Yes Xus yuav rov los.
Huab Tais Yes Xus muab nws lub caij piv rau Nos Hes thiab Los lub caij.
Huab Tais Yes Xus lub caij tuag zoo li thaum Nos Hes mus hauv lub nkoj, ces dej nyab ntiaj teb rhuav cov neeg txhaum tuag tas; Huab Tais Yes Xus txoj kev tuag kuj yuav ntxuav neeg cov txhaum kom dua tas. Huab Tais Yes Xus lub caij tuag zoo li thaum Los tawm hauv lub nroog Xos Dos Mas ces leej faj poob saum ntuj los hlawv lub nroog; Huab Tais Yes Xus txoj kev tuag kuj yuav coj hluav taws tuaj hlawv neeg cov txhaum kom ploj tas.
Lub caij Huab Tais Yes Xus yuav rov los mas tsis muaj leej twg paub. Lub Koom Txoos tsuas ntuas peb tias yog lub caij peb tso lub ntiaj teb tseg.
Ob tug neeg ua neej nyob ua ke, mas ib tug lub caij yuav txawv ib tug lub caij. Tab sis nkawd yeej yuav tau pom xwb xwb.
Li ntawd, peb ua neej nyob mas thiaj tsis muaj leej twg yuav mem tau tias yus yuav muaj txoj sia nyob txog tav twg, yus tsis paub tias Tswv Ntuj yuav hu yus mus hnub no los tag kis, xyoo no los lwm xyoo. Yog li mas phim peb sawv daws thaum tseem muaj txoj sia nyob yuav ua neej nyob hauv txoj kev nyiam. Tus Hauv Paus Xa Lus Zam sau nyob hauv nws tsab ntawv tsab ob tias “Txoj kev nyiam yog txoj kev ua neej raws li lo lus qhia. Lo lus qhia yog qhov tias nej yuav nyob hauv txoj kev nyiam” (2Z 1:6).
Cov kwv tij Hmoob, Huab Tais Yes Xus tau hais tias lo lus qhia loj tshaj yog ‘nyiam Tswv Ntuj tshaj txhua yam thiab nyiam lwm tus li yus nyiam yus’. Hnub no peb tseem hnov Huab Tais Yes Xus hais ntxiv tias “Leej twg nrhiav kev txuag nws txoj sia, mas nws yuav plam nws txoj sia. Leej twg plam nws txoj sia, mas nws txoj sia yuav ciaj” (LK 17: 33).
Yog vim li no, hnub no lub Moo Zoo thiaj qhia peb tias “Peb tsis txhob muab peb txoj sia mus khi rau lub ntiaj teb kom ntau, qhov peb yuav muab txoj sia khi rau mas yog txoj kev nyiam.”
Kwv tij, peb kav tsij ua neej sib nyiam sib hlub mog.
