ZAJ NYEEM HNUB TIM 15 LUB 8 HLI 2025
HNUB HWM NIAM MAB LIAB MUS SAUM NTUJ
COV LUS NYOB HAUV LUS KAS NTAWV MOO ZOO (LK 1:39-56)
Kwv tij Hmoob sawv daws, lub Koom Txoos Kav Tos Liv muaj ntau zaj piav txog qhov ntawd, muaj ib zag hais tias thaum Mab Liab tas nws sim neej lawm, mas Huab Tais Yes Xus cov thwj tim coj niam Mab Liab lub cev mus zwm ntxa. Tag kis lawv rov mus xyuas thiab pleev tshuaj tsw qab rau tus qauv raws li cov Yus Das txoj kev cai, cas tsis pom niam Mab Liab lub cev lawm, tsuas pom muaj ib co paj ntoos ntau ntau tsw qab ntxiag nyob hauv lub ntxa xwb. Lawv hnov cov Tshiab hu nkauj zom zaws cav txog Tswv Ntuj, ces lawv thiaj paub tias Huab Tais Yes Xus tsa niam Mab Liab sawv rov los, thiab coj niam Mab Liab lub cev nrog tus ntsuj plig mus nyob saum Tswv Ntuj lub Ceeb Tsheej lawm.
Hnub no o peb cov neeg ntseeg nyob hauv lub Koom Txoos Kav Tos Liv thiaj ua lub txoos hwm niam Mab Liab mus saum ntuj. Nyob hauv cov teb chaws mus cov neeg ntseeg tsawg, mas lawv yuav ncua mus ua lub txoos nyob hauv Hnub Chiv tom qab hnub tim 15 lub 8 hli.
Cov kwv tij, hnub no peb hnov lub Moo Zoo hais txog thaum Mab Liab mus xyuas Es Lis Xas Npes, ces Es Lis Xas Npes hais tias “Mab Liab, koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov.” Es Lis Xas Npes tseem hu Mab Liab ua ‘Huab Tais leej niam’ yog nws ua pov thawj zeem tseeb tias Mab Liab yog Tswv Ntuj leej niam, tus me nyuam Mab Liab yug los yog Tswv Ntuj. Li ntawd, Mab Liab thiaj yog tus poj niam tau koob tau hmoov tshaj ib zeej tsoom.
Thaud lub Xab Cog Lus ntim daim txiag zeb sau Huab Tais Lo Lus Qhia li cas, mas niam Mab Liab lub cev kuj ua chaw xeeb Tswv Ntuj Leej Tub zoo li ntawd. Thaud Es Vas noj lub txiv ua kom ntiaj teb neeg kis txoj kev tuag li cas, mas nyem no lub txiv txi hauv niam Mab Liab lub cev tuaj thiaj coj txoj sia nyob mus li tuaj rau qab ntuj neeg li ntawd. Li ntawd, niam Mab Liab thiaj yog tus tau koob tau hmoov, nws muaj txiaj ntsim puv siab.
Niam Mab Liab yog tus hluas nkauj tsim txiaj muaj lub siab dawb siab huv, nws qhib nws lub siab tas nrho rau Tswv Ntuj. Niam Mab Liab ua tus neeg me thiab mloog Tswv Ntuj lus. Yog vim Mab Liab tau ua lub neej zoo li hais los no, mas thaum niam Mab Liab tuag, Tswv Ntuj thiaj li txais niam Mab Liab lub cev thiab nws tus ntsuj plig mus nrog lawm saum ntuj.
Mab Liab tus piv txwv zoo qhia peb sawv daws kom nyiam ua neeg me mloog Tswv Ntuj, ua tus neeg tsis muab hlob nyiam pab cov neeg txom nyem, thiab kom peb tso siab rau Tswv Ntuj, mas muaj ib hnub peb thiaj yuav tau mus nyob pem Ntuj Ceeb Tsheej ib yam li niam Mab Liab.
Kwv tij Hmoob, lub Koom Txoos Kav Tos Liv ntseeg ruaj nreb tias Tswv Ntuj txais niam Mab Liab mus nrog Tswv Ntuj nyob, nws ua poj Huab Tais Nyob saum Ntuj, ces peb niaj hnub vam khom kom niam Mab Liab thov Ntuj rau peb, thiab peb thov niam Mab Liab cev peb cov lus Thov Tswv Ntuj.
Nyob zoo sawv daws.
