Zaj nyeem hnub tim 16 lub 8 hli 2025 (Daily reflection)

ZAJ NYEEM HNUB TIM 16 LUB 8 HLI 2025

HNUB NCO TXOG LEEJ NTSHIAB TES FAS NOS NYOB HOOS NQIAS

COV LUS NYOB HAUV MAS TAIS NTAWV MOO ZOO (MT 19:13-15)

Kwv tij Hmoob, hais txog ntawm cov me nyuam yaus mas cov Yus Das lawv hais tias yog cov paj tshab Tswv Ntuj pub rau lawv. Lawv hais li ntawd tab sis lawv ho tsis saib cov me nyuam yaus muaj qab hau dab tsi, lawv cia cov me nyuam muaj 12 xyoos txwm nkaus mam mus tau hauv cov tsev txoos thiab hauv lub Tuam Tsev Teev Ntuj. Lawv hais tias thaum tus twg muaj 12 xyoos lawm, tus ntawd muaj tab txaus, nws yog tub hluas lawm.

Cov Yus Das lawv xav zoo li ntawd, mas thaum muaj neeg coj cov me nyuam tuaj rau Huab Tais Yes Xus tsa tes thov Ntuj rau, mas cov thwj tim thiaj cem cov neeg ntawd. Lawv xav tias cov me nyuam yuav los ua rau Huab Tais Yes Xus meem txom vim tias niaj hnub twb muaj neeg tuaj ntsauv Huab Tais Yes Xus coob ua rau nws tsis xyeej noj mov thiab tau so.

Tab sis Huab Tais Yes Xus hais kom cov thwj tim tsis txhob ua zoo li ntawd, nws kom lawv cia cov me nyuam los cuag nws. Huab Tais Yes Xus xav qhia rau lawv tias Ntuj lub Ceeb Tsheej yog sawv daws li, thiab tus xav tau Ntuj lub Ceeb Tsheej, mas nws yuav tsum txais thiab ua zoo rau txhua tus neeg.

Huab Tais Yes Xus tseem siv lub sij hawm no los ntuas cov tuaj mloog nws tias yog lawv xav tau Ntuj lub Ceeb Tsheej, mas lawv yuav ua zoo li cov me nyuam no; yog ua neeg siab dawb, qhib siab txais Huab Tais Yes Xus, thiab tso siab rau Huab Tais Yes Xus.

Kwv tij Hmoob, yog peb tig los saib peb tus kheej, peb yuav pom tias thaum peb tseem yau, peb muaj tus xeeb ceem zoo li cas, ziag no peb loj tuaj lawm peb tus xeeb ceem ho zoo li cas. Sib txawv ntau kawg puas yog? Vim tias thaum peb pib loj zuj zus, peb tau pom ntau, peb lub tswv yim yuav pib xav txog ntau yam, peb muab siab dai dhuam rau lwm yam, tsis zoo li thaum me me peb tsuas dai dhuam rau peb niam peb txiv xwb.

Kwv tij, peb yuav thov Leej Ntuj Plig Ntshiab ntxiv lub dag lub zog rau peb, kom niaj hnub nyob hauv peb lub neej, peb ua tiag nyiaj taus lub tswv yim phem tuaj ntxias peb, lub tswv yim tsis zoo tuaj looj koov peb. Peb yuav thov Huab Tais Yes Xus pab peb kom rov tig mus coj tus xeeb ceem xws li cov me nyuam yaus, ua siab dawb huv, luag ntxhi los mus nyob hauv Huab Tais Leej Txiv lub xub ntiag mog.

Nyob zoo sawv daws.