ZAJ NYEEM HNUB TIM 17 LUB 7 HLI 2025
HNUB TSIB, LIS PIAM 15 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 11: 28-30)
Kwv tij Hmoob sawv daws, tas niaj tas xyoo peb ua liaj ua teb los yog ua hauj lwm, mas muaj ib lub caij peb xav so; yam li yog lub caij peb ua Tsiab Peb Caug. Thaum ntawd, peb xav ua si kom siab kaj, xav pw kom txaus txaus, xav tso lub nra peb ris cia kom lub cev sib tuaj.
Qhov ntawd yog peb so peb lub cev, tab sis peb lub neej sab ntsuj plig puas tau so?
Raws li peb cov neeg ntseeg, mas tab txawm peb lub cev yuav sab npaum cas, thaum peb mus teev Ntuj, mus koom lub Txoos Txi Ntuj lawm, peb lubcev yuav sib tuaj vim peb tus plig tau txais kev nplij, tau so los siav nyob hauv Tswv Ntuj lawm. Tos peb hais li no vim tias Huab Tais Yes Xus tau hais tseg tias “Tas nej sawv daws uas nej khwv, thiab ris nra hnyav, nej tuaj cuag kuv mog! Kuv yuav cia nej so los siav.”
Kwv tij, lub cev sab mas peb paub thiab ntsuas tau, tab sis tus ntsuj plig sab mas peb tsis paub vim peb ntsia tsis pom. Nws txawv li peb cov Hmoob tseem coj qub kev cai hais tias ‘poob plig’, ua rau tus plig tsis muaj zog, ces tshwm rau lub cev kom muaj mob. Txoj kev ntseeg txog Yes Xus tsis qhia li ntawd, poob plig yog lub cev ceeb xwb, ces roj ntsha khiav tsis zoo xwb.
Peb ntsuas tsis tau tias peb tus ntsuj plig sab, tab sis peb paub tias peb tus ntsuj plig ris ib lub nra hnyav; yog peb cov txim txhaum thiab cov hauj lwm phem. Peb paub li ntawd, vim thaum peb ua txhaum, ua cov hauj lwm tsis zoo; mas muaj ib yam ua rau peb ntxhov siab, muaj ib yam ua rau peb hnov zoo li muaj ib lub nras nyob saum peb nrob qaum.
Hnub no, Huab Tais Yes Xus thiaj hais rau peb tias “Koj txo koj lub nras, koj tuaj cuag kuv, los so hauv kuv tus ntxoov ntxoo mas. Kuv mam ua tus nplij koj, thiab pas ris koj lub nra.” Yog li niaj lis piam peb mus koom lub Txoos Txi Ntuj, peb mus lees txhaum, peb mus koom nrog Huab Tais Yes Xus txi Ntuj, nws ntxuav peb cov txhaum, ces peb lub nra sib, peb tseem txais Tswv Ntuj Lo Lus thiab Yes Xus lub Cev los yug peb thiab. Yog li thiaj hais tias peb mus koom lub Txoos Txi Ntuj thaum twg, peb tus plig tau so los siav.
Huab Tais Yes Xus siab zoo npaum no, Huab Tais Yes Xus hlub peb npaum no. Phim peb yuav mloog Huab Tais Yes Xus lus thiab tso siab rau Huab Tais Yes Xus ua tus pab peb.
Huab Tais Yes Xus hais rau peb hauv hnub no tias “Nej txais kuv tus quab”, thiab hais tias “Nej kawm ntawmkuv.”
Huab Tais Yes Xus tus quab; yog Tswv Ntuj kev nyiam. Huab Tais Yes Xus xav kom peb txais Tswv Ntuj kev nyiam.
Huab Tais Yes Xus kom peb kawm ntawm nws; yog kom peb ua Huab Tais Yes Xus thwj tim.
Huab Tais Yes Xus muab nws tus quab sib kwv yooj yim los pauv peb lub nra hnyav tsuam peb tus plig; yam li Huab Tais Yes Xus muab Tswv Ntuj kev nyiam los pauv cov txhaum peb ris.
Peb txais tau Huab Tais Yes Xus tus quab, thaum peb ua Huab Tais Yes Xus cov thwj tim; yog ntseeg txog nws.
Nyob zoo sawv daws.
