ZAJ NYEEM HNUB TIM 18 LUB 1 HLIS 2025
HNUB XYA THAWJ LUB LIS PIAM, CAIJ NYOB NRUAB XYOO
HN 4: 12-16; MK 2: 13-17
Kwv tij Hmoob zoo nyiam, Yes Xus lub Moo Zoo raws li Leej Ntshiab Mas Kos phau ntawv mas pom tias Huab Tais Yes Xus pib txoj hauj lwm tshaj txog Tswv Ntuj lub Ceeb Tsheej mas thaum xub thawj Huab Tais Yes Xus qhia lawv txog lub Moo Zoo, nws ntiab dab, kho cov neeg mob; mas Huab Tais Yes Xus mus txog twg thiaj muaj neeg raws nws coob.
Mas Kos tsis sau hais txog Huab Tais Yes Xus ua hauj lwm tshaj Ntuj Lust ib leeg, nws sau piav txog Huab Tais Yes Xus hu cov thwj tim los pab nws coj sawv daws los nyob hauv Tswv Ntuj lub Ceeb Tsheej; yam li hu 4 tug tub puav ntses thiab hnub no peb hnov Huab Tais Yes Xus hut us tub sau se Les Vis.
Tsis yog nyob nyob Huab Tais Yes Xus pom lawv ces nws cia li hu lawv. Kawg lawv tsum tau hnov los tuaj mloog Huab Tais Yes Xus cov lus qhia ntau zaus lawm; lawv qhib siab rau Huab Tais Yes Xus cov lus maj mam ntxuav lawv lub siab lub ntsws, hloov lawv lub tswv yim. Txog qhov kawg, Huab Tais Yes Xus caw lawv kom raws nws mus, mas lawv thiaj txiav siab tso txhua yam rau dam qab ces nrog Huab Tais Yes Xus ua ke mus pab nws tshaj lub Moo Zoo.
Huab Tais Yes Xus lo lus yog Tswv Ntuj lo lus muaj txoj sia. Tsab ntawv xa mus rau cov Hes Nplaws hais tias Tswv Ntuj lo lus ua tau hauj lwm. Tswv Ntuj lo lus ntse dua ib rab ntaj ob sab hniav. Tswv Ntuj lo lus txeem mus tau hauv tus plig thiab hauv nruab nrab lub tswv yim. Tswv Ntuj lo lus mus tau rau hauv cov pob qij txha thiab cov paj hlwb. Tswv Ntuj lo lus txawj txiav txim rau lub siab ntshaw, thiab rau tej zaj tswv yim nyob hauv nruab siab.
Thaum peb hnov Huab Tais Yes Xus lo lus mas muaj tuaj zoo li ntawd; nyob ntawm peb txhua tus saib peb yuav qhib siab rau Huab Tais Yes Xus lo lus ua hauj lwm hauv peb los peb kaw siab rau Huab Tais Yes Xus lo lus ib yam li cov Kws Ntawv Ntshiab thiab cov Fas Lis Xais uas lawv muab hlob lawv xav tias lawv yog cov tub txawj tub ntse ces lawv tsis qhib siab mloog Huab Tais Yes Xus, lawv tseem txw lwm tus kom tsis txhob mloog thiab; lawv ua zoo li cov neeg nyob dawb haus huv. Tab sis Huab Tais Yes Xus ntuas kom peb ua zoo li cov neeg muaj mob uas tos ntsoov tus kws kho mob.
Peb txhob hais tias “Ab! Kuv tsis hnov Huab Tais Yes Xus hu kuv.” Peb txhob hais thiab txhob xav li ntawd.
Qhov peb ua mas kawg thov Huab Tais Tswv Ntuj xa Leej Ntuj Plig tuaj tshoj peb lub siab kom peb txawj ua tus neeg me, qhib siab mloog lo lus tuaj ntawm Huab Tais Yes Xus tuaj. Peb raws Huab Tais Yes Xus, mloog Huab Tais Yes Xus cov lus qhia, kawm ntawm Huab Tais Yes Xus; mas peb thiaj yuav pab tshaj tau Huab Tais Yes Xus kev cawm rau lwm tus.
Tsis muaj dab tsi yuav qhia tau yooj yim thiab nkag siab dua yus muab yus lub neej los tshaj Huab Tais Yes Xus lub Moo Zoo; ib yam li hnub no peb pom Huab Tais Yes Xus mus nrog cov neeg txhaum noj mov. Huab Tais Yes Xus muab nws lub neej ua piv txwv rau cov thwj tim pom tias lawv yuav tsum nrog cov neeg txhuam koom siab, lawv yuav tsum nrog cov neeg me nyob mas lub Moo Zoo thiaj yuav nrhau tau cag nyob hauv sawv daws. Cov thwj tim tsis txhob ua li cov Kws Ntawv Ntshiab thiab cov Fas Lis Xais uas paub Txoj Cai thiab Huab Tais Lus Qhia zoo tab sis tsis kam koom tib txog sia nrog cov neeg txhaum cov neeg me.
