ZAJ NYEEM HNUB TIM 19 LUB 6 HLI 2024
HNUB NCO TXOG LEEJ NTSHIAB LOS MUS AS DOS
COV LUS NYOB HAUV MAS TAIS NTAWV MOO ZOO (MT 6: 1-6, 16-18)
Kwv tij Hmoob sawv daws, hnub no nej hnov Huab Tais Yes Xus hais txog ‘cov neeg zoo sab nraud’ ntau zaus. Cov neeg zoo sab nraud yog cov neeg zoo li cas?
Cov neeg zoo sab nraud yog cov neeg dag siab; lawv lam ua kom luag tej pom tias lawv yog neeg zoo tab sis lawv xav phem rau nruab siab, lawv lam ntseeg tab sis lawv lub siab tsis ntseeg; xws li tej tus neeg uas tsis mloog Ntuj Lus tab sis nws ua txuj ua zoo li mloog Ntuj Lus, nws mloog txoj cai ces nws xav tias nws yog neeg zoo dua luag tej. Cov Fas Lis Xais lawv ua zoo li ntawd, Huab Tais Yes Xus thiaj hais tias kom cov thwj tim txhob ua li cov Fas Lis Xais.
Nyob hauv cov Yus Das thiab peb cov neeg ntseeg txog Yes Xus mas yog peb xav ua lub neej nyob hauv Tswv Ntuj txoj kev, peb yuav nquag pub yam peb muaj rau cov tsis muaj, peb yuav nquag teev Ntuj, thiab peb yuav yoo mov yuam peb lub cev kev ntshaw.
Cov neeg zoo sab nraud, lawv ua li hais tsis yog lawv tab tom nyob hauv Tswv Ntuj txoj kev, tab sis lawv ua li ntawd kom tau lus qhuas ntawm zeej tsoom, yog li lawv thiaj nyiam ua rau sawv daws pom, tshaj rau sawv daws hnov.
Huab Tais Yes Xus ntuas tias thaum peb ua cov hauj lwm li hais mas tsis thas yuav cia sawv daws paub. Tus peb yuav cia paub mas yog Tswv Ntuj tib tug xwb ces txaus lawm.
Kwv tij Hmoob, niaj hnub no peb ua neej nyob, tsis yog peb yuav pub rau tus tsis muaj, teev Ntuj, thiab coj kab ke yoo xwb. Niaj hnub peb tseem yuav ua qhov zoo thiab, txawm tias yuav muaj tus pom los tsis pom, tus qhuas txog los tsis qhuas, mas peb txhob tso kev ua zoo ntawd pov tseg. Peb uam us ntxiv, vim tias txhua yam peb ua Tswv Ntuj yeej ntsia ntsoov thiab muaj ib hnub Tswv Ntuj yuav pauj qhov zoo ntawd rau peb. Nej xav cia neeg pauj rau nej, los nej xav cia tus Tswv Ntuj muaj txoj sia pauj rau nej.
