HNUB TIM 2 LUB 11 HLIS; HNUB THOV NTUJ RAU COV DUA NRA
COV LUS NYOB HAUV ZAM NTAWV MOO ZOO (Z 6: 37-40)
Kwv tij Hmoob sawv daws, nag hmo peb hwm tsoom Leej Ntshiab uas yog cov tau mus nyob pem Tswv Ntuj lub Ceeb Tsheej lawm, hnub no lub Koom Txoos tseem tshwj cia peb thov Ntuj rau cov dua nra sawv daws thiab, vim tias lub Koom Txoos yeej tsis xav kom ib tug neeg twg plam Tswv Ntuj lub Ceeb Tsheej li.
Kwv tij, cov neeg dua nra los yog cov neeg tuag, lawv lub cev rov mus ua av tab sis tshuav lawv tus ntsuj plig tseem yuav nyob mus li. Neeg tus ntsuj plig yog tuaj ntawm Tswv Ntuj tuaj, neeg tus ntsuj plig thiaj yuav rov mus cuag Tswv Ntuj; tab sis yeeb vim neeg muaj txhaum hos Tswv Ntuj yog tus Ntshiab, ces neeg tus ntsuj plig yuav rov mus cuag Tswv Ntuj tsis tau yog neeg tus ntsuj plig tseem muaj txhaum, tsuas kev qhias kev phem. Li ntawd, tib neeg tuag tas, tus ntsuj plig yuav tau mus nyob hauv teb chaws them txim kom tau hlawv neeg cov txhaum kom tas tso.
Peb ntseeg tias thaum tseem muaj txoj sia xwb thiaj yuav thov Ntuj los yog ua hauj lwm tsim koob hmoov tau, tuag lawd neeg tus ntsuj plig yuav thov Ntuj thiab ua hauj lwm ntxiv tsis tau lawm. Yog li mas cov ntsuj plig hauv teb chaws them txim thiaj tsis muaj peev xwm ua dab tsi tau li, lawv tsuas vam txog peb cov tseem muaj txoj sia pab thov Ntuj rau lawv xwb. Li ntawd, hnub no thiaj yog zoo hnub uas tas nrho lub Koom Txoos yuav thooj siab koom ntsws thov Huab Tais Tswv Ntuj hlub thiab khuv leej cov ntsuj plig hauv teb chaws them txim los yog cov neeg dua nra.
Kwv tij, hnub no Huab Tais Yes Xus hais cov lus no rau peb tias “Tus tuaj cuag kuv mas kuv yuav tsis ntiab nws rau nraum zoov. Kuv nqes saum ntuj los ua raws li tus xa kuv tuaj lub siab; yog kom kuv tsis txhob ua ib yam uas nws muab rau kuv ploj li.”
Tus xa Huab Tais Yes Xus tuaj; yog Leej Txiv Tswv Ntuj. Yam uas Leej Txiv Tswv Ntuj muab rau Huab Tais Yes Xus; yog ntiaj teb neeg sawv daws. Huab Tais Yes Xus txoj hauj lwm thiaj yog tuaj nrhiav neeg ntiaj teb thiab rov coj ntiaj teb neeg mus cuag Leej Txiv Tswv Ntuj.
Li ntawd, peb thiaj ntseeg Huab Tais Yes Xus cov lus, tso siab rau Huab Tais Yes Xus ua tus pab peb, thiab peb kuj yuav nyiam lwm tus xws li Huab Tais Yes Xus nyiam thiab hlub peb.
Kwv tij Hmoob sawv daws, vim peb ntseeg, tso siab, thiab nyiam Huab Tais Yes Xus mas peb thiaj ua Huab Tais Yes Xus thwj tim. Vim peb yog Huab Tais Yes Xus cov thwj tim, peb thiaj tsum sib pab leg Huab Tais Yes Xus cov hauj lwm raws li lub Moo Zoo hnub no. Peb yuav thov Huab Tais Tswv Ntuj khuv leej peb cov pog koob yawg koob, cov niam cov txiv, cov kwv cov muam, ib tsoom ntsuj plig sawv daws uas lawv pab lawv tsis tau. Peb tsis txhob cia muaj ib tug ntsuj plig ploj li. Nyob zoo sawv daws.
