ZAJ NYEEM HNUB TIM 20 LUB 1 HLIS 2025
HNUB NCO TXOG LEEJ NTSHIAB VAJ QHIA FAS NPIAS NUS
HN 5: 1-10; MK 2: 18-22
Kwv tij Hmoob zoo nyiam, nyob hauv Yes Xus lub Moo Zoo hnub no peb hnov hais txog ‘yoo mov’ thiab hais txog ‘muab cawv tshiab ntim rau hauv cov hnab tawv tshiab’.
Yoo mov yog cov Yus Das ib txog kab ke ua lub cim tias lawv ‘hwm’Tswv Ntuj. Yog li ntau zaus cov Yus Das thiaj saib tias tus ua kab ke yoo mov muaj lub siab hwm Tswv Ntuj dua tus tsis ua kab ke yoo mov. Hnub no cov neeg tsis pom Huab Tais Yes Xus thiab cov thwj tim yoo mov thiaj nug cov lus peb hnov hauv Ntawv Moo Zoo.
Zam cov thwj tim yog lub cim hais txog ‘cov lus cog qub’ hos Yes Xus cov thwj tim yog lub cim hais txog ‘cov lus cog tshiab’.
Zam yog tus nraug vauv cov kwv luag, Yes Xus yog tus nraug vauv.
Zam yog lub hnab tawv qub, Yes Xus yog cov cawv tshiab.
Zam yog lub khaub tsho tshaj sab, hos Yes Xus yog daim ntaub tshiab.
Zam yog qhov coj raws kab ke nruj, Yes Xus yog kev zoo siab.
Zam yog txoj kev qub, Yes Xus yog txoj kev tshiab.
Kev yoo mov tsis muaj qab hau npaum kev ua raws Huab Tais Yes Xus cov lus qhia kom sis nyiam sis hlub.
Thaum Huab Tais Yes Xus tuaj mas yog lub sij hawm muaj kev zoo siab, muaj kev lom zem tsis phim yuav ua lub neej li qhov qub ntxiv. Huab Tais Yes Xus cov thwj tim tsum tau hloov lub tswv yim tshiab txhob xav li cov Yus Das thaud ntxiv. Lawv yoo mov tsis yog ua lub cim tias lawv hwm Tswv Ntuj, tiam sis lawv yuav yoo mov vim lawv hlub cov neeg txom nyem, lawv zoo siab yoo mov tsis yog lam yoo mov vim cov laus ib txwm coj li ntawd; lawv yoo kom tau qee qhov seem rau cov neeg tshaib.
Huab Tais Yes Xus cov thwj tim hloov lub tswv yim li ntawd, mas lawv thiaj yog cov cawv tshiab ntim hauv lub hnab tawv tshiab, yog daim ntaub tshiab ntxiv lub tsho tshaj sab tshiab, lawv muaj kev zoo siab thiab xyiv fab tiag.
Kwv tij Hmoob, Huab Tais Yes Xus tsis yog kom rhuav peb haiv neeg cov kab ke poj ua tseg yawm ua cia.
Huab Tais Yes Xus xav kom peb hloov lub tswv yim los muab ntsia dua tshiab; qhov tsis zoo mas peb muab kho kom haum txoj kev sis nyiam sis hlub, qhov yuam kev mas muab rub kom yog.
Peb yuav muab lub siab xws li Huab Tais Yes Xus lub los ua lub teeb tsom peb lub siab lub tswv yim mas peb thiaj yuav to taub txoj kev tshiab Huab Tais Yes Xus xav kom peb taug.
