ZAJ NYEEM HNUB TIM 20 LUB 6 HLI 2026
HNUB XYA, LIS PIAM 11 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 6: 24-34)
Kwv tij Hmoob, Huab Tais Yes Xus thiaj li hais tias “Nej ntsia cov noog saum ntuj saib, lawv tsis tseb nplej, tsis hlais nplej, tsis sau qoob rau hauv txhab, nej Txiv nyob saum ntuj pub rau lawv noj. Nej ntsia cov paj ntoos nyob tom tej nras saib, lawv cia li hlob xwb; lawv tsis khwv, tsis ua maj ua ntuag.” Huab Tais Yes Xus hais li no tsis yog kom peb nyob dag hnub dhau hnub tsis ua hauj lwm, tab sis yog Huab Tais Yes Xus xav ntuas peb kom tsis txhob ua nyiaj txiag qhev tab sis kom peb cia siab rau Tswv Ntuj ua tus saib xyuas peb. Yog peb cia siab rau Tswv Ntuj, mas peb yuav tsis muaj kev txhawj xeeb, kev ntshai xws li cov noog ya saum ntuj thiab cov paj ntoos tom nras tiaj.
Peb yuav cia siab rau Tswv Ntuj ua tus coj peb tau li cas?
Huab Tais Yes Xus teb rau peb tias “Nej xub nrhiav Tswv Ntuj lub Ceeb Tsheej thiab nws txoj kev ncaj tso, ces Ntuj yuav pub tas puav tsav yam ntawd tib si ntxiv rau nej.”
Li ntawd, niaj hnub peb thiaj li yuav muab Tswv Ntuj Lo Lus hauv Ntawv Ntshiab los nyeem thiab twm saib Tswv Ntuj hais lus dab tsi rau peb. Peb yuav niaj hnub thov Ntuj kom tau qhia peb lub siab rau Tswv Ntuj paub. Peb yuav niaj hnub ua li no.
Nyob zoo sawv daws.
