HNUB TIM 21 LUB 11 HLIS; HNUB NCO TXOG CEV MAB LIAB RAU HAUV LUB TUAM TSEV TEEV NTUJ
COV LUS NYOB HAUV LUS KAS NTAWV MOO ZOO (LK 19: 41-44)
Kwv tij Hmoob sawv daws, thaum yuav txog lub caij Huab Tais Yes Xus yuav raug tuag, nws tuaj txog lub tsheej Yes Lus Xas Les, mas nws quaj. Huab Tais Yes Xus quaj vim nws yeej ntsia pom lawm tias tsis ntev tom ntej mas cov tub rog Los Mas yuav tuaj rhuav lub tsheej Yes Lus Xas Les, ces yuav tsis muaj lub tsheej ntxiv.
Tos cov Los Mas rhuav lub tsheej Yes Lus Xas Les vim tias cov Yus Das siab kub sawv tiv cov nom Los Mas, mas tus vaj Los Mas thiaj xa tub rog tuaj ntxuav cov Yus Das siab kub, ces lub tsheej Yes Lus Xas Les thiaj nyob tsis thaj yeeb.
Kwv tij Hmoob, lub npe ‘Yes Lus Xas Les’ yog txhais tias ‘lub nroog thaj yeeb’. Tab sis ib txwm los peb yuav pom tias nyob hauv lub tsheej Yes Lus Xas Les tsis muaj kev thaj yeeb li. Yog li mas lub Moo Zoo hnub no Huab Tais Yes Xus thiaj ntsoo tias “Yes Lus Xas Les, hnub no koj kheev lam paub txog tej yam uas yuav ua kom muaj kev thaj yeeb mas!”
Kwv tij Hmoob, Huab Tais Yes Xus lo lus no kuj yog ib lo lus zoo ntuas peb thiab. Yog peb muab peb tus plig piv rau lub tsheej Yes Lus Xas Les, mas peb yuav ua li cas kom peb tus plig thiaj yuav tsis puas ntsoog mus xws li lub tsheej Yes Lus Xas Les.
Huab Tais Yes Xus tuaj txog hauv peb, nws nws coj tej yam tuaj qhia peb kom paub txog kev thaj yeeb.
Peb puas yuav txais los tsis txais Huab Tais Yes Xus los qhia kev thaj yeeb rau peb?
Huab Tais Yes Xus yog Tswv Ntuj, nws ua tau hwj huam pab peb tau tab sis tsum yog peb qhib txais Huab Tais Yes Xus thiab. Yog Huab Tais Yes Xus nws ua nws xwb mas tsis tau; yog peb ua peb xwb peb tsis vam txog Huab Tais Yes Xus mas yeej tsis tau thiab. Tsum yog Huab Tais Yes Xus thiab peb ob tog puav leej ua ua ke mas thiaj yuav cawm tau peb.
Kwv tij Hmoob, peb muab ua tib zoo xav; thaum ib tug neeg tuaj txog ntawm peb lub qhov rooj tsev, nws khob qhov rooj tab sis peb tsis sawv mus qhib mas nws puas yuav chaws los tau hauv tsev. Thaum koj pab ib tug neeg poob qhov, koj pov txoj hlua rau nws tab sis nws tsis txais txoj hlua mus khi nws cia mas koj puas yuav rub tau nws tawm los. Thaum Huab Tais Yes Xus cawm koj tab sis koj tsis ntseeg mas Huab Tais Yes Xus puas yuav cawm tau koj.
Niaj hnub mas peb yuav thov Huab Tais Tswv Ntuj tsis tseg, kom peb txawj ntsia pom Huab Tais Yes Xus, kom peb qhib siab rau mloog Huab Tais Yes Xus, kom peb ntseeg txog Huab Tais Yes Xus; mas thaum txog hnub kawg peb lub cev thiab tus plig thiaj yuav tsis raug rhuav xws li lub tsheej Yes Lus Xas Les.
