HNUB TIM 22 LUB 11 HLIS; HNUB NCO TXOG LEEJ NTSHIAB XES XI S LIAS
COV LUS NYOB HAUV LUS KAS NTAWV MOO ZOO (LK 19: 45-48)
Kwv tij Hmoob sawv daws, lub Moo Zoo piav txog thaum Huab Tais Yes Xus mus hauv lub Tuam Tsev Teev Ntuj, nws pom tsoom sid ua luam muag tsiaj txi Ntuj nyob hauv lub Tuam Tsev Teev Ntuj, nws pom cov neeg ceev nyiaj kuj nyob hauv tos pauv nyiaj. Lawv ua lub Tuam Tsev Teev Ntuj ntxhov quav niab. Lub Tuam Tsev Teev Ntuj yog qhov chaw ntshiab tab sis cov Yus Das muab ua cov hauj lwm phem. Huab Tais Yes Xus pom li ntawd, nws npau taws tam sid, ces nws thiaj ntiab sawv daws kom tawm hauv lub Tuam Tsev Teev Ntuj mus.
Kwv tij Hmoob, cov Yus Das thaum lawv txi Ntuj, mas lawv yuav muab cov tsiaj los hlawv ua txim. Lawv kuj yuav tsis siv cov Los Mas lub txiaj los muas cov tsiaj hlawv txi Ntuj vim nyob saum lub txiag nyiag mas muaj Xes Ntxas tus duab. Lawv tsum tau coj mus pauv lawv cov nyiaj tso.
Cov Yus Das nyob kev deb, lawv ceeb laj cab yaj cab tshis tuaj tua hlawv txi Ntuj, ces lawv thiaj xum tuaj yuav nyob hauv lub Tuam Tsev Teev Ntuj. Lawv xav tias thaum lawv hlawv ib tug tsiaj rog thiab du du tsis muaj ib qho tsuas li mas Tswv Ntuj thiaj yuav txais lawv cov txim, ces Tswv Ntuj yuav zam rau lawv.
Tab sis lawv yuam kev, Tswv Ntuj tsis yuav lawv cov thaj txi Ntuj muab tsiaj hlawv txi, Tswv Ntuj yuav lawv lub siab nyiam Tswv Ntuj, lawv kev tu siab rau lawv cov txhaum. Lawv muas tsiaj los txi tab sis lawv tsis hloov siab ntxub lawv cov txhaum.
Kwv tij Hmoob, cov Yus Das lawv lub siab zoo li lub Tuam Tsev muaj neeg ua luam ntxhov nti nyob hauv.
Ntawm peb txhua tus mas ntau zaus peb kuj ua lub siab ntxhov xws li ntawd thiab.
Hnub Tais Yes Xus xav los nyob hauv peb nruab siab, los ntxuav tej yam phem tawm hauv peb mus.
Peb paub li no mas peb yuav qhib siab rau Huab Tais Yes Xus los ntxuav peb siab ntsws. Peb yuav cia peb lub siab ua qhov chaws teev Ntuj tsis txhob cia ua chaw rau tub sab nkaum.
