ZAJ NYEEM HNUB TIM 23 LUB 7 HLI 2025
HNUB NCO TXOG LEEJ NTSHIAB NPIS NTSIS
COV LUS NYOB HAUV MAS TAIS NTAWV MOO ZOO (MT 13: 1-9)
Cov kwv tij, nyob hauv Mas Tais zaj 13 mas yog cov paj lug Huab Tais Yes Xus hais txog ‘Ntuj lub Ceeb Tsheej’ los yog ‘Tswv Ntuj lub Ceeb Tsheej’.
Huab Tais Yes Xus muab Ntuj lub Ceeb Tsheej piv tau rau tus tseb nplej tawm mus tseb cov noob nplej hauv daim teb. Ntuj lub Ceeb Tsheej piv tau rau cov nplej muaj cov nroj xyaw. Ntuj lub Ceeb Tsheej piv tau rau lub oob zaub roj. Ntuj lub Ceeb Tsheej piv tau rau poov xab, Ntuj lub Ceeb Tsheej piv tau rau lub hub nyiaj faus nyob hauv daim teb. Ntuj lub Ceeb Tsheej piv tau rau lub hlaws npliag deg. Ntuj lub Ceeb Tsheej piv tau rau lub vas puav ntses.
Nyob hauv hnub no yog zaj Huab Tais Yes Xus muab Ntuj lub Ceeb Tsheej piv rau tus tseb nplej.
Huab Tais Yes Xus zaj paj lug no mas yog ib zag to taub yooj yim vim tias peb cov Hmoob ib txhia tseem ua lub neej cog nplej. Peb ua tib zoo saib hauv peb daim teb npleg mas muaj raws li Huab Tais Yes Xus hais. Cov noob nplej poob rau tej qhov av tawv tsis muaj av vov mas yuav pom tej noog los tej ntsaum tuaj kwv mus tas. Cov noob nplej poob rau tej qhov av pob zeb mas cov nplej tuaj tab sis cob pob thiab tej zaus kuj qhuav mus. Cov noob nplej poob rau qhov chaw fab fab mas loj caum tsis cuag nroj, ces kuj yuav raug nroj laum. Tsuas yog cov noob nplej poob rau qhov chaw av zoo thiab tsis muaj nroj xwb, cov nplej thiaj tuaj taus thiab hlob txhawv tau hnab.
Hnub no, Huab Tais Yes Xus muab cov neeg tuaj mloog nws lo lus piv rau 4 hom av ntawd. Lo lus yog cov noob nplej. Sawv daws tuaj mloog, tab sis sawv daws yuav to taub thiab khaws lo lus tau tsis ntau ib yam. Tej tus tuaj mloog tab sis nws khaws tsis tau ib lo mus yug nws lub tswv yim, tej tus khaws tau me me, tej tus tuaj ces nrog luag tham pem ua rau nws tsis to taub lo lus, tej tus muab siab mloog ces nws to taub thiab khaws tau raws li nws lub tswv yim; cov ntawd, ib tug khaws tau 100, ib tug khaws tau 60, ib tug khaws tau 30.
Kwv tij Hmoob sawv daws, muab piv rau peb mas yog thaum Hnub Chiv peb mus ua Thaj Txi Ntuj, peb mloog tus Txiv Plig nthuav Tswv Ntuj Lo Lus. Yog peb tsis ua tib zoo cuab pob ntseg mloog thiab xav raws mas peb yuav tsis tau txais lub txiaj ntsim hauv Tswv Ntuj Lo Lus coj mus ua raws; zoo li hnub ntawd, peb mus koom cav txog Tswv Ntuj lub txiaj ntsim xwb, tab sis peb txais tsis tau Tswv Ntuj lub txiaj ntsim.
Yog li mas, xav kom peb cov neeg ntseeg sawv daws, thaum peb mus sib txoos txi Ntuj ua ke, peb muab siab rau mloog saib tus Txiv Plig tab tom cev Tswv Ntuj Lo Lus dab tsi rau peb, mas peb lub neej ua neeg ntseeg thiaj yuav txi tau txiv mog.
