ZAJ NYEEM HNUB TIM 24 LUB 1 HLIS 2025
HNUB NCO TXOG LEEJ NTSHIAB FAS NTSHIS KES DAWS XAS
HN 8: 6-13; MK 3: 13-19
Kwv tij Hmoob zoo nyiam, hnub no peb hnov zaj hais txog Huab Tais Yes Xus hu pab Kaum Ob los ua nws kwv luag thiab xa lawv mus tshaj Lo Lus. Yog peb nyeem hauv Mas Tais Ntawv Moo Zoo, mas Mas Tais hais tias lawv 12 tug no yog cov Hauv Paus Xa Lus.
Mas Kos sau tias Huab Tais Yes Xus hu lawv los nyob ze kom tau ua ‘kwv luag’ thiab ‘xa mus tshaj Lo Lus’. Huab Tais Yes Xus kuj pub ‘hwj huam ntiab dab rau lawv’.
Kwv tij, 3 lo lus no yog 3 lo lus tseem ceeb rau cov neeg yuav ua Yes Xus thwj tim; ua kwv luag, tshaj Lo Lus, ntiab dab.
Tus ua Huab Tais Yes Xus kwv luag mas nws tsum ‘nyob ze’ Huab Tais Yes Xus thiab ‘tsis fav xeeb’ rau Huab Tais Yes Xus. Tus nyob ze Huab Tais Yes Xus mas nws thiaj yuav paub thiab to taub Huab Tais Yes Xus.
Kwv tij Hmoob, peb ua Huab Tais Yes Xus tus kwv luag, peb nyob ze Huab Tais Yes Xus tau; yam li peb niaj hnub mloog los yog nyeem Tswv Ntuj Lo Lus hauv Ntawv Ntshiab, peb mus hwm thiab txais lub Cim Yug, peb teev Ntuj thiab thov Ntuj tsis tseg, peb ua tus kwv luag nrog cov neeg peb ntsib peb pom raws li Huab Tais Yes Xus lo lus tias “Yam koj ua rau tus me tshaj hauv kuv tsoom kwv, mas yog koj ua rau kuv.”
Tus ua Huab Tais Yes Xus thwj tim mas nws tsum ‘tshaj Lo Lus’ rau cov neeg nyob ib puag ncig nws. Kev tshaj Lo Lus tsis yog tias peb tawm mus nyob tom tej ntug kev qw tias “Tswv Ntuj lub Ceeb Tsheej los txog ze lawm, nej hloov siab tshiab mog”, los mus ntsib cov neeg thiab hais rau lawv tias “Yes Xus yog tus Huab Tais Cawm Seej, koj ntseeg Yes Xus mas koj thiaj tsis tuag.”
Kev tshaj Lo Lus tsis yog li ntawd xwb, tseem muaj ntau yam tseem ceeb dua lo lus peb hais tawm ntawm lub ncauj; yam li nyiam thiab hlub cov neeg nyob ib puag ncig peb, ua kwv luag nrog sawv daws, muab lub sij hawm rau tus neeg raug tso pov tseg, pab tus neeg txom nyem.
Kwv tij Hmoob, peb tsis yuav mus saib deb, peb tig ntsia hauv peb vaj peb tsev mas peb pom tias peb muaj cov laus nrog peb nyob, peb muaj cov me nyuam yaus nrog peb nyob, peb muaj cov neeg mob nrog peb nyob. Ib hnub dhau ib hnub peb puas muab lub sij hawm nrog lawv nyob, nrog lawv tham pem, nrog lawv ua si, pab tu thiab saib xyuas lawv.
Piv li peb hais rau peb niam peb txiv tias “Niam thiab txiv, kuv hlub neb” tab sis peb tsis tu tsis saib nkawd, peb tsuas muab lub sij hawm luv luv nrog nkawd nyob tham pem. Li no yuav zoo dua, los peb hais rau nkawd tias peb hlub nkawd thiab peb nquag nrog nkawd tham nquag tu nkawd saib nkawd, li no yuav zoo dua.
Kwv tij Hmoob, Huab Tais Yes Xus pub hwj huam ntiab dab tau rau cov thwj tim. Niaj hnub no Huab Tais Yes Xus tseem pub lub hwj huam no rau peb. Tsis yog kom peb ntiab cov dab nkag los nyob hauv neeg raws li Hmoob hais tias ‘raug dab’, kuj tsis yog kom peb ntiab poj ntsoog. Tab sis lub hwj huam ntiab dab uas Huab Tais Yes Xus pub rau peb mas yog kom peb ntiab tau ‘txoj kev phem kev ntxias siab’ kom neeg poob rau txoj kev txhaum.
Tus ntseeg txog Yes Xus, nws kawm ntawm Yes Xus, nws coj tau tus yam ntxwv phim lub Moo Zoo, nws muaj lub siab nyiam lwm tus; nws nrog cov neeg nyob ib puag ncig nyob mas nws ua tus piv txwv zoo rau sawv daws pom, nws hais lus tseeb tsis dag sawv daws, nws hlub tus txom nyem, nws zam rau tus ua phem rau nws. Huab Tais Yes Xus cov thwj tim ua lub teeb pom kev rau cov neeg tsis tau ntseeg txog Yes Xus, ces nws ntiab tau tus dab phem tawm hauv lawv mus.
