ZAJ NYEEM HNUB TIM 25 LUB 12 HLIS: HNUB HWM YES XUS YUG LOS
COV LUS NYOB PHAU NTAWV HIS XAIS (HX 52: 7-10)
COV LUS NYOB HAUV PHAU NTAWV HES NPLAWS (HN 1: 1-6)
LUB MOO ZOO RAWS LI ZAM (Z 1: 1-5, 9-12)
Kwv tij Hmoob sawv daws, hnub no tas lub Koom Txoos muaj kev zoo siab thiab xyiv faj vim tias hnub no tus Huab Tais Cawm Seej yug los lawm.
Kwv tij, hnub no peb hnov tus Yaj Saub His Xais hais tias sawv daws yuav tsa suab qw zoo siab vim sawv daws pom Huab Tais Tswv Ntuj rov qab los lawm, sawv daws luag ua suab ntas ntua vim Huab Tais Tswv Ntuj tuaj txhiv nws haiv neeg lawm.
Tus Hauv Paus Xa Lus Zam sau nyob hauv nws phau Ntawv Moo Zoo tias Huab Tais Tswv Ntuj hais ib lo lus xwb mas txawm muaj tuaj xws li tau hais, Huab Tais Tswv Ntuj tsim txhua yam tawm hauv Tswv Ntuj lo lus los. Lub sim ceeb tawm tuaj kuj yog vim Tswv Ntuj lo lus. Tib neeg tawm tuaj kuj yog vim Tswv Ntuj lo lus.
Tswv Ntuj lo lus yog ‘Leej Lo Lus’; yog Huab Tais Yes Xus.
Huab Tais Yes Xus nrog Huab Tais Leej Txiv thiab Huab Tais Leej Tub koom ua tib tug Tswv Ntuj.
Txheej thaud Huab Tais Tswv Ntuj tshoj cov neeg siab ncaj ua Yaj Saub cev Tswv Ntuj lo lus rau cov His Xas Lais, kom lawv nyob rawv hauv Tswv Ntuj txoj kev.
Huab Tais Tswv Ntuj xa ntau tus Yaj Saub tuaj, tiam sis cov His Xas Lais tsis mloog, lawv muab cov Yaj Saub tua.
Txog lub caij teem, mas Huab Tais Tswv Ntuj thiaj xa ‘Leej Lo Lus’ uas yog Tswv Ntuj Leej Tub nqes los xeeb lub cev nqaij neeg kom tau hais lus rau tib neeg. Leej Lo Lus los yog Tswv Ntuj Leej Tub xeeb nyob hauv tus nkauj ntshiab Mab Liab, nws yug nyob hauv lub dab nyuj nyob Npes Les Hes.
Hnub Leej Lo Lus yug los yog hnub no. Hnub no thiaj yog hnub zoo rau tas lub qab ntuj. Hnub no Tswv Ntuj Lo Lus tuaj nyob hauv peb, hnub no Tswv Ntuj Lo Lus ci ntsa hauv peb, hnub no Tswv Ntuj Lo Lus pub txoj sia tshiab rau peb, hnub no Tswv Ntuj Lo Lus tuaj cawm peb. Yog tias peb txais Tswv Ntuj Lo Lus los nrog peb nyob, peb txais Tswv Ntuj Lo Lus los yug peb txoj sia, peb ntseeg Tswv Ntuj Lo Lus lub npe tias ‘Yes Xus’.
