ZAJ NYEEM HNUB TIM 25 LUB 6 HLI 2025
HNUB PLAUB, LIS PIAM 12 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 7: 15-20)
Kwv tij Hmoob, Huab Tais Yes Xus hais kom ceev faj txog cov yaj saub cuav. Yog li cov yaj saub cuav yog cov zoo li cas?
Huab Tais Yes Xus qhia ntxiv tias cov yaj saub cuav yog cov zoo li tus yaj tab sis lawv yog hma.
Hnub no peb tsis hais txog cov neeg tshaj Tswv Ntuj Lo Lus, los cov neeg niaj hnub tuaj tshaj txog kev ntseeg rau peb tej zej zos. Tab sis peb yuav rov hais txog peb cov neeg ntseeg.
Peb txais lub Cim Ntxuav thaum twg, mas peb tau txais txoj kab xwm ua Vaj, ua Leej Choj, thiab ua Yaj Saub.
Tus Yaj Saub mas nws yog tus neeg uas Tswv Ntuj hu los ceeb toom cov lus uas Tswv Ntuj xav qhia rau ntiaj teb neeg, los yog Tswv Ntuj ib tug tiam lis los ib tug xa xov, yog ib tug neeg txhais Tswv Ntuj lo lus thiab piav rau tsoom sid paub meej. Li ntawd, peb cov neeg ntseeg, peb txoj hauj lwm ua Yaj Saub thiaj yog ua tim khawv txog txoj kev ntseeg txog Yes Xus rau luag tej.
Huab Tais Yes Xus hais tias tus twg ntseeg txog nws mas tus ntawd yog nws cov yaj. Peb ntseeg txog Yes Xus tiag, ces peb thiaj yog Huab Tais Yes Xus cov yaj. Tab sis peb soj ntsuam saib nyob hauv peb, peb puas yog tus tseem yaj los peb lam hnav daim tawv yaj xwb, sab hauv peb mas yog tus hma.
Kwv tij Hmoob sawv daws, tus neeg muaj ib lub siab zoo mas nws ua yam twg nws kuj ua qhov zoo, tus neeg lub siab phem nws tsuas xav ntsoov txog qhov phem ces nws cov hauj lwm thiaj tsuas yog ua phem. Tus neeg xav qhov phem thaum nws xav tau ib yam dab tsi ntawm sawv daws mas nws ua txuj ua zoo, hais lus luag ntxhi ntxias sawv daws kom qaug qav rau nws cov hauj lwm los cov lus mos lus muag. Tab sis thaum tau raws nws ntshaw lawm, peb mam pom tias tej yam nws ua los hais ntawd tsuas yog hauj lwm dag thiab lo lus cuav. Peb ntsia pom tej no ntau zaus thaum txog lub caij xaiv nom xaiv tswv. Cov nom tswv yuav tuaj hais li ub li no, tuaj cog lus rau tsoom pej xeem tias ‘Nej xaiv kuv mas, kuv mam sawv los kho nej lub zos kom zoo tuaj. Nej pov ntawv rau kuv, ces nej yuav tsis tshaib tsis nqhis ntxiv.’ Tab sis thaum luag tau nom, luag tsis tshwm tuaj rau yus pom, luag hais dua lwm yam tuaj.
Tus yaj thiab tus hma, tus tseem Yaj Saub thiab tus yaj saub cuav; nkawd sib txawv yog qhov ntawd; yog cov txiv nkawd txi, yog nkawd cov hauj lwm.
Peb yuav paub tau tias peb yog tseem yaj los yog hma, peb puas yog tus yaj saub cuav, mas yog peb rov ntsia peb lub neej, saib peb txi tau cov txiv zoo los cov txiv phem, peb coj lub neej raws lub Moo Zoo los yog peb coj lub neej raws ntiaj teb tus yam ntxwv.
Kwv tij Hmoob, peb yog tus neeg ntseeg txog Yes Xus, yog Huab Tais Yes Xus cov thwj tim, yog nws pab yaj, yog ib tug Yaj Saub; mas peb yuav kub siab nyeem Yes Xus lub Moo Zoo, mloog saib niaj hnub Huab Tais Yes Xus hais dab tsi rau peb, Huab Tais Yes Xus xav kom peb coj tus yam ntxwv zoo li cas thiaj yuav phim rau nws lub Moo Zoo.
Peb ua li ntawd, peb thiaj yuav txi tau cov txiv zoo, yog tus tseem Yaj Saub, yug tus tseem yaj.
Kwv tij, peb ua peb xwb mas tsis tau, peb yuav thov Tswv Ntuj pab peb kom muaj ib lub siab ntseeg, txawj tso siab, thiab nyiam Tswv Ntuj, kom peb lub tswv yim to taub Tswv Ntuj Lo Lus niaj hnub hais rau peb.
