ZAJ NYEEM HNUB TIM 27 LUB 11 HLIS 2025
HNUB TSIB, LIS PIAM 34 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 21: 20-28)
Kwv tij sawv daws, nyob rau hauv zaj no Huab Tais Yes Xus hais txog lub zim txwg kawg.
Thawj nqe lus yog hais txog lub zim kawg ntawm haiv His Xas Lais, lub nroog Yes Lus Xas Les, lub Tuam tsev teev Ntuj loj thiab ib puas tsav yam hauv haiv His Xais Lais raug luag lwm haiv neeg tuaj ntaus tawg thiab tsoo puas ntsoog tas, haiv neeg His Xas Lais tawg ua sab ua sua.
Hos nqe ob yog hais txog lub caij ntiaj teb kawg. Txhua txhia yam yeej tau tshwm sim tuaj raws nkaus li Huab Tais Yes Xus tau hais tseg tiag, nyob rau xyoo 70 cov Los Mas tuaj vij lub nroog Yes Lus Xas Les, lawv tsoo thiab hlawv ib puas tsav yam puas tsuaj tas, cov neeg raug tua tuag thiab tawg ua sab ua sua, raug ntes mus ua qhev coob kawg.
Cov phooj ywg, yog peb nyeem txog tej nqe lus no, mas yeej ua rau peb poob siab me ntsis, tab sis, txawm li cas los xij, thov kom peb muaj kev ntseeg thiab tso siab rau Ntuj, tso siab rau peb tus Huab Tais Yes Xus pleev, ces peb yuav ua tau siab loj, vim Tswv Ntuj yuav pab tiv thaiv peb thiab txuag peb zoo yam li thaum ub nws tau pab thiab txuag tus Yaj Saub Das Nias, uas nws muaj txoj kev ntseeg ruaj txog Tswv Ntuj. Yog tias peb muaj txoj kev ntseeg, mas tab yog peb txoj sia nyob ntiaj teb no yuav ploj, tiam sis, peb yuav txuag tau txoj sia nyob hauv Tswv Ntuj lub Ceeb Tsheej mus li.
Peb tsis txhob qab siab ua neej dhau, niaj hnub nrhiav nyiaj thiab kov xov tooj, thiab kov tej yam tsis tseem ceeb, nyob tsam peb tsis nco ceev faj, ces txhua yam yuav lig dhau rau peb nawb mog.
Nyob zoo sawv daws.
