HNUB TIM 27 LUB 11 HLIS; HNUB PLAUB LUB LIS PIAM 34 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 21: 12-19)
Kwv tij Hmoob sawv daws, ua ntej yuav txog Huab Tais Yes Xus lub caij, nws tau qhia cov thwj tim tias thaum lawv raws Huab Tais Yes Xus mas lawv yuav ntsib xwv txheej tau yam; yam li lawv yuav raug ntes, raug coj mus kaw hauv tsev loj faj, raug nce rooj txiav txim, raug tua tuag. Txawm lawv yuav raug li ntawd, mas kom lawv tsis txhob thim lawv txoj kev ntseeg, lawv tsis txhob nrhiav tej zaj tswv yim los hais kom lawv dim; yam cov thwj tim yuav ua mas yog qhov tias lawv yuav txaus siab thiab zoo siab hlo ris tej kev iab tuaj raug lawv ntawd, lawv yuav ua tim khawv txog qhov tseeb, lawv yuav hais raws li qhov tseeb. Txawm tias lawv raug txov txoj sia tsis kav lawv yuav tau txais txoj sia nyob mus li; yog lawv ua raws li Huab Tais Yes Xus hais.
Kwv tij Hmoob, Huab Tais Yes Xus qhia lawv txog yam lawv yuav ntsib, tsis yog nws xav hem lawv tab sis yog Huab Tais Yes Xus tsis xav yuam lawv kom nrog nws ris kev txom nyem. Huab Tais Yes Xus hais ua ntej kom lawv xaiv saib lawv puas tseem yuav raws nws mus los lawv thim rov qab.
Nyob ze lub caij Tos Huab Tais, mas lub Koom Txoos thiaj cev Huab Tais Yes Xus cov lus hais txog tej kev iab uas cov raws Huab Tais Yes Xus qab rau peb tau mloog thiab ntuas peb siab, kom peb ras tias thaum peb txiav siab raws Huab Tais Yes Xus, txais Huab Tais Yes Xus los ua peb tus Huab Tais, mas peb yuav tsum txaus siab txais tej yam phem yuav tuaj raug peb xws li thaud cov Hauv Paus Xa Lus txais.
Peb raug kev txom nyem, peb yeem ris lub nras hnyav, mas peb yuav tau nrog Huab Tais Yes Xus nyob tsis ib hnub twg los yeej yuav yog ib hnub twg.
Lub Koom Txoos tsis xav kom peb nrauj Huab Tais Yes Xus, lub Koom Txoos tsuas xav kom peb yim khaub zig Huab Tais Yes Xus, yim npuab siab rau Huab Tais Yes Xus kom ruaj dua tuaj.
Kwv tij Hmoob, peb tab tom yuav chaws mus hauv lub caij Tos Huab Tais lawm tiag, peb yuav kub siab teev Ntuj kom ntau kom peb txoj kev ntseeg yim nyob ruaj mus li mog.
