ZAJ NYEEM HNUB TIM 27 LUB 12 HLIS: HNUB UA HMOOV LEEJ NTSHIAB ZAM TUS SAU NTAWV MOO ZOO
ZAM TSAB NTAWV, TSAB IB (1Z 1: 1-4)
LUB MOO ZOO RAWS LI ZAM (Z 20: 1-8)
Kwv tij Hmoob sawv daws, yog nco tau mas nag hmo peb hais tias tom qab hnub hwm Yes Xus yug los, lub Koom Txoos tshwj 3 hnub sib law los ua hmoov txog Yes Xus 3 tug tseem phooj ywg; yam li hnub tim 26 ua hmoov Leej Ntshiab Tes Fas Nos thawj tug tuag ua tim khawv, hnub no ua hmoov Leej Ntshiab Zam tus raug txom nyem vim Yes Xus lub npe, thiab tag kis ua hmoov cov me nyuam siab ntshiab tuag thaum Yes Xus yug los.
Hnub no peb yuav tham me ntsis txog Leej Ntshiab Zam, nws yog tus thwj tim Yes Xus nyiam, nws yog Ntxes Npes Dais tus tub. Lub Koom Txoos ntseeg tias Zam yog tus sau phau Ntawv Moo Zoo, yog tus sau 3 tsab ntawv mus ntuas cov Koom Txoos, thiab sau phau ntawv Qhib Yav Tom Ntej.
Zam xav qhia tias Huan Tais Yes Xus yog Leej Lo Lus tuaj ntawm Tswv Ntuj tuaj, yog Leej Lo Lus muaj txoj sia, thiab Yes Xus yog Tswv Ntuj, yog tus nyiam peb tshaj, ces Zam thiaj hais tias Tswv Ntuj yog kev nyiam.
Kwv tij, Zam yog tus ua tim khawv txog Huab Tais Yes Xus sawv rov los, raws li cov lus Zam sau nyob hauv nws phau Ntawv Moo Zoo tias thawj hnub pib lub lis piam, Mab Liab Mas Ntas Las dhia tom lub qhov ntxa los hais rau Pob Zeb thiab nws tias tsis pom Huab Tais Yes Xus lub cev lawm, ces ob Zeb thiab Zam nkawd khiav mus xyuas. Nkawd pom muaj li Mab Liab hais. Zam pom li ntawd mas nws nco tau tias Huab Tais Yes Xus xub hais tseg tias peb hnub Yes Xus yuav sawv rov los, ces nws ntseeg cov lus Huab Tais Yes Xus tau hais tseg, nws ntseeg tias Huab Tais Yes Xus sawv los lawm tiag.
Zam tseem yog tus tau pom Yes Xus lub hwj chim Tswv Ntuj tawm tuaj nyob saum roob ua ntej lawv yuav tuaj Yes Lus Xas Les, Zam tseem yog tus tau pom Huab Tais Yes Xus tsa Yais Los tus ntxhais tuag lawm kom rov muaj txoj sia. Zam kuj tseem yog tib tug thwj tim tau pom Huab Tais Yes Xus txoj sia tu nyob saum Ntoo Cuam.
Hnub no Zam thiab Pob Zeb tsis pom Huab Tais Yes Xus lub cev lawm, Zam ntseeg.
Yog peb nyeem Ntawv Moo Zoo ntxiv mas peb yuav pom tias Zam tus no yog tus zeem tau Huab Tais Yes Xus nyob ntawm dej ntug Tis Npes Lias.
Kwv tij, raws li cov kwv huam piav mas tom qab Huab Tais Yes Xus mus saum ntuj tau 12 xyoos, Zam mus tshaj lub Moo Zoo nyob As Xias Me thiab nyob Es Fes Xos. Nyob ntawd, Zam thiaj siv lo lus ‘Leej Lo Lus’ los hais txog Huab Tais Yes Xus vim lo lus no yog lo lus ib txwm cov Hes Las thiab Los Mas nyiam siv los hais txog qhov tseeb thiab nyob mus li. Nyob Es Fes Xos, Zam tau sau nws phau Ntawv Moo Zoo hais txog tej yam nws nco tau thiab tseem tsis tau sau tseg hauv Mas Tais, Mas Kos, thiab Lus Kas lawv 3 phau Ntawv Moo Zoo. Nyob ntawm no, Zam kuj sau nws 3 tsab ntawv mus ntuas cov Koom Txoos kom ntseeg ruaj nreb tias Huab Tais Yes Xus yog Tswv Ntuj vim lub zim txwv ntawd, muaj ib cov thwj tim cuav qhia tej zaj yuam kev txog Huab Tais Yes Xus; yam li lawv tsis ntseeg tias Huab Tais Yes Xus yog Tswv Ntuj, lawv tsis ntseeg tias Huab Tais Yes Xus tuag txhiv lub qab ntuj neeg cov txhaum.
Thaum tus tuam vaj Los Mas ntes Zam mus kaw nyob hauv lub pov txwv Pas Mos, mas Zam thiaj mam sau phau ntawv Qhib Yav Tom Ntej. Zam rov los nyob Es Fes Xos ces nws tuag nyob ntawd kwv yees xyoo 100.
Lub Koom Txoos thiab tas cov neeg ntseeg txog Yes Xus saib tias Huab Tais Tswv Ntuj tshoj cov neeg kom sau Ntawv Ntshiab mas los xaus ntawm Zam. Dua zam lawm, tsis muaj cov tau pom Huab Tais Yes Xus, ces lawv cov phau ntawv los yog tsab ntawv mas tsis hais tias yog cov Ntawv Ntshiab, tsuas yog cov lus sau sib fim, sib ntuas, thiab nthuav Lo Lus lawm xwb.
Kwv tij Hmoob, Huab Tais Yes Xus nyiam Zam kawg, ntawm Zam mas nws kuj nyiam Huab Tais Yes Xus tshaj thiab, mas nws thiaj sau piav txog Huab Tais Yes Xus kev nyiam tau cuag li peb pom nyob hauv Zam cov ntawv.
Hnub no, kuj yog lub sij hawm zoo rau peb rov tig los tshuaj peb saib peb puas nyiam Huab Tais Yes Xus xws li Zam, peb puas ntseeg xws li Zam ntseeg.
Nyob hauv Zam phau Ntawv Moo Zoo, mas Zam tsis sau txog nws lub npe, nws tsuas sau hais tias ‘tus thwj tim Yes Xus nyiam’. Tos Zam sau li ntawd, vim Zam xav kom cov ntseeg sawv daws uas tau nyeem txog Zam phau Ntawv Moo Zoo, lawv yuav to taub tias tus thwj tim Yes Xus nyiam ntawd yog lawv ntag. Kom tus nyeem to taub tias Huab Tais Yes Xus nyiam tus tab tom nyeem Zam phau Ntawv Moo Zoo.
Kwv tij, Huab Tais Yes Xus nyiam nej, nej kav tsij lees ua Huab Tais Yes Xus tus tseem phooj ywg tshaj Yes Xus lub npe xws li Zam mog.
