ZAJ NYEEM HNUB TIM 28 LUB 12 HLIS: HNUB UA HMOOV COV ME NYUAM SIAB NTSHIAB TUAG UA TIM KHAWV
ZAM TSAB NTAWV, TSAB IB (1Z 1: 5-2: 2)
LUB MOO ZOO RAWS LI MAS TAIS (MT 2: 13-18)
Kwv tij Hmoob sawv daws, hnub no lub Koom Txoos ua hmoov cov me nyuam siab ntshiab tuag ua tim khawv nyob hauv lub caij Yes Xus yug los, raws li lub Moo Zoo hnub no sawv daws tau hnov.
Huab Tais Yes Xus yug los, nws coj qhov pom kev tuaj kaj lub ntiaj teb tab sis cov neeg nyob hauv qhov tsaus ntuj tsis kam txais qhov pom kev, ces lawv sawv los tiv qhov pom kev; xws li Hes Los tsis kam txais Huab Tais Yes Xus yug los, ces nws nrhiav Huab Tais Yes Xus tua pov tseg.
Lub Koom Txoos qhia peb tias cov me nyuam yog lub txiaj ntsim Huab Tais Tswv Ntuj pub rau niam thiab txiv; lawv yog cov koom hmoov Huab Tais Tswv Ntuj pub rau ntiaj teb neeg. Cov me nyuam coj kev zoo siab, coj kev luag ntxhi, coj kev vam tuaj rau lub tsev neeg. Cov me nyuam yog xws li qhov pom kev rau niam thiab txiv.
Tus neeg txov lwm tus txoj sia, mas nws yog tus nyob hauv qhov tsaus ntuj, nws lub siab tsis muaj kev nyiam neeg.
Kwv tij, Huab Tais Yes Xus yug los kom tau cawm ntiaj teb neeg, kom pub qhov pom kev tuaj kaj lub qab ntuj neeg tab sis neeg tsis nyiam qhov pom kev, neeg muab kev phem kev tsis zoo los ntoo, neeg hnav lub siab txhaum, ces neeg thiaj ntshai qhov pom kev, ntshai txais Huab Tais Yes Xus los nyob hauv neeg.
Kwv tij, hnub no kuv xav kom peb rov nco txog Leej Ntshiab Zam cov lus hauv nws tsab ntawv uas peb nyuam qhuav hnov tas los; yog cov lus no “Tswv Ntuj yog qhov pom kev. Yog peb hais tias peb nrog Tswv Ntuj koom siab, tab sis peb tseem mus taug txoj kev tsaus ntuj, mas peb dag xwb, peb tsis nyob hauv qhov tseeb. Yog peb mus taug txoj kev kaj, mas peb nrog sawv daws koom siab, vim Tswv Ntuj nyob hauv txoj kev kaj, ces nws Leej Tub Yes Xus cov ntshav ntxuav peb ntawm txhua yam txhaum kom peb huv. Yog peb hais tias peb tsis muaj txhaum, mas peb rov dag rau peb, qhov tseeb tsis nyob hauv peb lawm. Yog peb lees peb cov txhaum, mas Tswv Ntuj yuav daws peb cov txhaum, nws yuav ua kom peb huv tuaj thiab ncaj tuaj.”
Kwv tij Hmoob, peb txais Huab Tais Yes Xus los nyob hauv peb, peb ua lub neej nyob hauv qhov pom kev mog.
