ZAJ NYEEM HNUB TIM 29 LUB 1 HLIS 2025
HNUB PLAUB LUB LIS PIAM 3 CAIJ NYOB NRUAB XYOO
HN 10: 11-18; MK 4: 1-20
Kwv tij Hmoob, Huab Tais Yes Xus zaj paj lug hais tseb nplej nej hnov hauv lub Moo Zoo hnub no, mas Huab Tais Yes Xus twb muab nthuav meej kawg lawm tias cov noob nplej yog Lo Lus, cov av nyob ntawm ntug kev yog cov neeg txais Lo Lus tab sis Xas Tas tuaj rho Lo Lus tawm hauv lawv mus, cov av pob zeb yog cov neeg tsis ruaj ces thaum lawv raug txom nyem los yog raug hiam vim Lo Lus mas lawv tso Lo Lus pov tseg vim Lo Lus tsis muaj cag nyob nruaj hauv lawv, cov av muaj pos yog cov neeg muab siab dai rau ntiaj teb lub cuab tam ces Lo Lus txi tsis taus txiv, cov av zoo yog cov neeg zoo siab txais Lo Lus thiab lawv txi txiv.
Huab Tais Yes Xus twb nthuav meej kawg li ntawd, ua cas niaj xyoo lub Koom Txoos tseem cev Huab Tais Yes Xus cov lus no rau peb tau muab xav tswv yim thiab ntuas siab?
Raws li xav mas ntshai yog lub Koom Txoos xav kom peb muab ua tib zoo xav saib peb yuav xaiv ua cov av twg; av ntawm ntug kev, av pob zeb, av muaj pos, los daim av zoo.
Tus Hauv Paus Xa Lus Zam qhia tias Lo Lus yog Huab Tais Yes Xus.
Huab Tais Yes Xus hais tias nws yog txoj kev, qhov tseeb, thiab txoj sia.
Nyob hauv lub neej ua neeg ntseeg, Lo Lus los yog Huab Tais Yes Xus thiaj yog lub Koom Txoos txoj sia, yog yam cheem tsum rau cov neeg ntseeg txog Yes Xus lawv txoj sia.
Peb tseem paub ntxiv tias phau Ntawv Ntshiab yog ntim Lo Lus. Li ntawd, peb thiaj nrhiav txoj sia tau nyob hauv phau Ntawv Ntshiab. Peb xav muaj txoj sia mas peb yuav tau nyeem Ntawv Ntshiab kom tau Lo Lus los yug peb. Peb xav kom Lo Lus txi txiv nyob hauv peb mas peb yuav ua thaj av zoo.
Kwv tij Hmoob, nej ua teb mas nej yeej paub zoo tias yuav ua kom thaj av zoo tau li cas; yam li tu kom daim teb txhob fab, khaws pob zeb pov tseg, tsoo pob a kom mos, rau chiv, ywg dej kom txaus.
Peb xav ua thaj av zoo mas peb kuj yuav ua li ntawd; yam li peb yuav tu peb lub siab lub tswv yim kom txhob fab, peb yuav rho lub tswv yim phem tawm hauv nruab siab pov tseg, peb yuav muab txoj kev nyiam lwm tus los ywg lub siab kom muag tuaj.
Kwv tij, peb ua siab kom kaj, ua siab kom muag mas peb thiaj txais tau Lo Lus tuaj nyob hauv peb thiab Lo Lus thiaj nrhau tau cag rau hauv peb siab ntsws.
Peb yim nyeem Ntawv Ntshiab, peb yim mloog lub Moo Zoo mas peb lub tswv yim yuav nco tau cov lus peb tau nyeem los tau hnov. Leej Ntuj Plig kuj yuav pab kom Lo Lus nkag mus tau rau hauv peb cov txha paj hlwb, hauv peb cov nqaij cov ntshav, hauv peb lub tswv yim. Thaum ntawd, peb yuav hloov tau lub siab tshiab, peb yuav plhis ua tus neeg tshiab. Lo Lus txi txiv nyob hauv peb.
