ZAJ NYEEM HNUB TIM 29 LUB 5 HLIS 2025
HNUB NCO TXOG LEEJ NTSHIAB VAJ QHIA PAJ LUG RAU
COV LUS NYOB HAUV ZAM NTAWV MOO ZOO (Z 16: 16-20)
Kwv tij Hmoob sawv daws, thaum Huab Tais Yes Xus qhia tias nws yuav raug kev txom nyem loj, mas tas sawv daws ntxhov siab. Yog peb yog ib tug koom rooj mov hauv hmo ntawd mas ntshai peb kuj yuav ntxhov siab thiab xav tsis thoob ib yam li cov thwj tim. Sawv daws tseem nyob hab nuv li ntawd, tsis kav Huab Tais Yes Xus tseem hais dua ib co lus tsis to taub ntxiv tias tshuav me ntsis ntxiv xwb, mas lawv yuav tsis pom nws lawm, tab sis ib me ntsis ntxiv lawv yuav rov pom nws dua.
Cov thwj tim thiaj sib nug tias cov lus no yog Huab Tais Yes Xus xav qhia dab tsi.
Kwv tij, cov lus no tom qab no peb mam to taub tias yog Huab Tais Yes Xus hais txog nws txoj kev tuag thiab sawv rov los. Tshuav tsis puas tsawg teev mas yuav muaj neeg tuaj ntes Huab Tais Yes Xus, ces cov thwj tim yuav tso tes khiav, lawv yuav tsis pom Huab Tais Yes Xus mus txog hnub nws tuag. Tab sis Huab Tais Yes Xus tuag 3 hnub xwb, nws sawv rov los ces thaum ntawd Huab Tais Yes Xus tawm tuaj xyuas cov thwj tim; lawv mam rov pom Huab Tais Yes Xus dua.
Huab Tais Yes Xus zoo li lub hnub uas coj qov pom kev tuaj rau lub ntuj, tab sis tsis ntev mas lub hnub yuav poob ces lub ntuj yuav tsaus. Thaum Huab Tais Yes Xus nrog lawv nyob mas lawv lub tswv yim kaj, lawv muaj kev zoo siab. Thaum Huab Tais Yes Xus raug txom nyem thiab tuag mas lawv lub tswv yim tsaus nti, lawv yuav quaj yuav seev. Tab sis lub hnub poob tsis txhais tias lub hnub yuav tsis sawv ntxiv, Huab Tais Yes Xus tuag, nws kuj yuav rov sawv thiab. Thaum ntawd, cov thwj tim lub suab quaj yuav hloov ua suab luag, lub suab seev yuav hloov ua lub suab hu nkauj, lawv kev tu siab hloov ua kev zoo siab.
Kwv tij Hmoob, lub neej paub Huab Tais Yes Xus mas zoo li ntawd, yog lub neej muaj kev zoo siab.
Muaj ntau yam tshwm sim nyob hauv peb lub neej yam li peb xav tsis txog, peb tsis to taub, ua rau peb quaj peb seev tab sis peb tso siab rau Huab Tais Tswv Ntuj, ces peb lub siab kaj tuaj, peb zoo siab txawm tias nyob hauv kev tu siab.
Hnub no, peb thov hais rau peb ib tsoom Hmoob tab tom ntsib kev txom nyem; yam li kev mob nkees, kev tu siab, kev quaj ntsuag tias thov kom nej tsa muag ntsia Huab Tais Yes Xus tus Ntoo Cuam, nej yuav pom Huab Tais Yes Xus tsa tes puag nej, Huab Tais Yes Xus yuav daws nej kev txom nyem thiab tsa nej sawv los nrog Huab Tais Yes Xus zoo siab mus li. Nyob zoo sawv daws.
