ZAJ NYEEM HNUB TIM 3 LUB 2 HLIS 2024
HNUB NCO TXOG LEEJ NTSHIAB NPLAS XIS
COV LUS NYOB HAUV MAS KOS NTAWV MOO ZOO (MK 6: 30-34)
Cov kwv tij Hmoob sawv daws, peb ua neeg nyob thaum tshaib plab peb yuav nrhiav mov noj, thaum nqhis dej peb yuav nrhiav dej haus, thaum ua hauj lwm ib hnub los txog tsev peb qaug zog mas peb yuav nrhiav chaw so kom tau los siav. Nyob hauv txoj kev ntseeg mas kuj yuav zoo li ntawd thiab; thaum peb nqhis Tswv Ntuj Lo Lus peb yuav tau nrhiav mloog, thaum peb txoj kev ntseeg tsuag peb yuav tau txhab ntxiv rau, thaum peb txoj kev ntseeg tsis muaj zog peb kuj yuav tau thov Leej Ntuj Plig pab. Thaum peb tus plig sab thiab lim peb thiaj yuav nrhiav chaw so nyob hauv Huab Tais Yes Xus.
Lub Moo Zoo hnub no, Huab Tais Yes Xus thiaj hais rau cov Hauv Paus Xa Lus kom nrhiav ib qhov chaw xu kev mas lawv thiaj yuav tau so vim lawv tawm mus tshaj lub Moo Zoo rau hauv cov zos tau ntev hnub mas lawv sab. Thiab thaum Huab Tais Yes Xus pom tsoom sid coob nrhiav nws, mas nws thiaj saib lawv zoo li yog pab yaj tsis muaj tsw vim tsis muaj neeg nplij lawv.
Kwv tij Hmoob sawv daws, peb niaj hnub nrhiav txhiam xws yug peb lub cev, peb niaj hmo nrhiav chaw zoo pw kom sov cev, peb niaj zaus nrhiav lub caij kom tau nyob kaj. Txawm peb niaj hnub niaj zaus ua li ntawd tas zog, tab sis nyob tob tob hauv peb mas peb yeej paub ntsoov tias yam peb ua ntawd zoo li tsis puv peb siab tas zog, yog li peb thiaj nrhiav tej kev teev hawm los ntim rau kom puv peb siab. Nyob hauv lub ntuj no peb paub tias muaj ntau txoj kev teev hawm, tab sis tsuas muaj tib txog xwb thiaj yuav pab tau kom peb siab puv npo tuaj, kom peb tus ntsuj tus plig nyob tau yam kaj siab lug mus li; yog txoj kev ntseeg txog Yes Xus, vim Huab Tais Yes Xus thiaj yog lub qhov txhawv cov dej cawm siav, yog kuab tshuaj cawm neeg, yog cov mov pub txoj sia, yog tus zoo tswv zov yaj. Huab Tais Yes Xus tuaj nrhiav peb, coj peb rov mus cuag npoj, thiab coj peb mus txog lub tshav zaub mov.
Nyob zoo sawv daws.
